Հովհաննեսի վերքերի վրա խավարասերներ էին վխտում. Փաստաբաններ
«Սասնա ծռեր» խմբի անդամ, «Դատապարտյալների հիվանդանոց» քրեակատարողական հիմնարկում գտնվող Հովհաննես Հարությունյանի փաստաբանները ահազանգում են իրենց պաշտպանյալի առողջական ծանր վիճակի մասին:
«Նրա առողջական վիճակի հետ կապված որոշակի անորոշություն կա, տարբեր բժիշկներ են զննել, որոնք պատճառաբանում են, որ նրան չի կարելի վիրահատել, քանի որ վերքերը դեռ չեն լավացել», -այսօր լրագրողների հետ հանդիպմանը հայտարարեց փաստաբան Հայարփի Սարգսյանը:
Հուլիսի 26-ին, երբ վիրավոր Հովհաննես Հարությունյանին տեղափոխում են «Էրեբունի» բժշկական կենտրոնի վերակենդանացման բաժանմունք, նրան հսկել են ոստիկաններ, փաստաբանը մի դրվագ ներկայացրեց ոստիկանների հետ կատարված միջադեպից ու ներկայացրեց կալանավորի պահման պայմանները.
«Նրան հսկել են զինված զինված ոստիկաններ, որի իմաստը մեզ համար անհասկանալի էր: Բուժքույրը հորդորել է, որ դուրս գան` նշելով, որ ստերիլ չեն, Հովհաննեսն էլ է հորդորել, որ դուրս գա ոստիկանը, սակայն, ոստիկանը պատասխանել է` հեսա կթքեմ վրեդ: Հովհաննես Հարությունյանին այնուհետև «Դատապարտյալների հիվանդանոց» են տեղափոխել, իր ասելով՝ սպանելով:
Տարել, շպրտել են մի խուց, որտեղ անմարդկային պայմաններ են: Ներս էինք մտնում խուց, բորբոսնած պատերով, օդ չկար շնչելու, քարանձավի նման: Հովհաննեսը պառկած էր ցանցով մահճակալի վրա, որը կորացած էր դեպի ներքև: Նա հյուծված պառկած էր մահճակալին, խավարասերներ էին վխտում նրա վերքերի վրայով, նրա ձեռքերը չէին հասնում, որ վերքերից հեռացնի խավարասերներին:
Այնուհետև նրան նոր սենյակ տեղափոխեցին, և այն պայմանները, որում նա գտնվում է, էականորեն չեն տարբերվում, ուղղակի պատերն են ներկվել, մահճակալն է նոր, էլի բռնվելու տեղ չկա, վիրավոր ոտքի վրա ուժ է գործադրում, որպեսզի կարողանա նստել: Միջատներ կան, հակասանիտարահիգիենիկ պայմաններ են, նա իր բնական կարիքները հոգում է հիվանդասենյակում և քանի որ չի կարողանում շարժվել, դա ժամերով մնում է հիվանդասենյակում այս շոգ պայմաններում»:
Նկատենք, որ Հովհաննեսին ուրիշ հիվանդասենյակ տեղափոխել են այն բանից հետո, երբ փաստաբանները մե աղմուկ բարձրացրին՝ հնչեցնելով վատ պայմանների մասին:
Հայկուհի Սարգսյանի խոսքով, Հովհաննես Հարությունյանին բուժօգնություն տրամադրում են «Էրեբունի» բժշկական կենտրոնի բժիշկները, բայց նրանք ամեն օր չեն գալիս «Դատապարտյալների հիվանդանոց»:
«Նա երեկ հենակներով փորձել է քայլել, ընկել է, որովհետև այդ պահին նրա մոտ չի եղել բժիշկ», -փոխանցեց փաստաբանը:
Հովհաննես Հարությունյանի պահման պայմանների վերաբերյալ Հայկուհի Սարգսյանի հայտարարություններին օրերս արձագանքել էր ԱՆ ՔԿՀ վարչության լրատվական ծառայությունը՝ նշելով, որ փաստաբանի հայտարարություններն անհիմն են և այդպես շարունակվելու դեպքում դիմելու են Փաստաբանների պալատ՝ փաստաբանի նկատմամբ կարգապահական վարույթ հարուցելու խնդրանքով:
«Վերջերս քրեակատարողական վարչությունը չափերն անցել է, իմ մասին հայտարարություններ անելով: Քրեակատարողական հիմնարկն ինձ հետ կապված վարկաբեկող հայտարարություններ է անում, իբր իմ հայտարարություններն իրականությանը չեն համապատասխանում: Սա էլ ճնշման մի ձև է, քանի որ Հովհաննեսին խոշտանգում են», -հայտարարեց Սարգսյանը:
Մեկնաբանելով ԱՆ ՔԿՀ վարչության հայտարարությունները Հովհաննես Հարությունյանի պահման պայմանների մասին, մյուս փաստաբան Արա Ղարագյոզյանը հայտարարեց, որ դրանք ապատեղեկատվություն են:
«Մատնանշելով, թե իբր իմ ներկայությամբ Հովհաննեսի անկողինը փոխվել է, ապատեղեկատվություն է: Ես հայտարարում եմ, որ երեք օր չի փոխվել նրա անկողինը, արյունից սևացած էր այն: Հովհաննես Հարությունյանը նաև բնական կարիքները հոգալու համար պետք է երկու ժամ սպասի, որպեսզի սանիտարը գա, ամբողջ գիշեր չեն տարել այն, այս ամեն ինչով փորձում են Հովհաննես Հարությունյանին նվաստացնել:
Իմ ներկայությամբ բուժքույրը սիստեմա էր միացնում, եկել էր, չէր կարողանում միացնել ու ասում էր` ես հոգեբանական բաժանմունքից եմ, կյանքում առաջին անգամ եմ միացնում սիստեմա, դրա համար էլ չի ստացվում», -հավելեց փաստաբանը:
««Դատապարտյալների հիվանդանոց» ՔԿՀ-ի կալանավորված անձ Հովհաննես Հարությունյանը անհրաժեշտության դեպքում ստացել և ստանում է ցավազրկող դեղամիջոցներ, հակաբիոտիկներ, պարբերաբար կատարվում են վերքերի մշակումներ, ժամանակին փոխվում են վիրակապերը», -ավելի վաղ պարզաբանում էր տարածել ԱՆ ՔԿՀ վարչության լրատվական ծառայությունը:
Հարակից հրապարակումներ`
- Հովհաննես Հարությունյանի հարազատների հրավիրած բժիշկը կզննի նրան
- Հովհաննես Հարությունյանի նկատմամբ «Դատապարտյալների հիվանդանոց»-ում խոշտանգում է իրականացվում. Իրավապաշտպաններ
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին