Ձեր վստահելի աղբյուրը

Հոկտեմբերի 16-ին Երևանի քաղաքապետարանը «Վերադարձ Հայաստան» հիմնադրամի հետ համատեղ մայրաքաղաքում կանցկացնի «Կոկա-Կոլա Երևան Կիսամարաթոն» վազքի մրցույթ: Մանրամասների մասին այսօր լրագրողների հետ զրույցի ժամանակ խոսել են Երևանի քաղաքապետարանի աշխատակազմի զարգացման և ներդրումային ծրագրերի վարչության պետ Տիգրան Սարգսյանը, «Կոկա-Կոլա Հելլենիկ Արմենիա» ընկերության գլխավոր տնօրեն Սայյորա Այուպովան և «Վերադարձ Հայաստան Հիմնադրամի» գործադիր տնօրեն Վարդան Մարաշլյանը:

Առաջին անգամ կիսամարաթոնն անցկացվել է նախորդ տարվա հոկտեմբերի 4-ին, որին մասնակցել են շուրջ 30 երկրների 1500 մասնակիցներ: Ի՞նչ է սպասվում մարաթոնի ընթացքում, ի՞նչ նպատակ է հետապնդում այն և ովքե՞ր կարող են մասնակցել, պատմել է Երևանի քաղաքապետարանի աշխատակազմի զարգացման և ներդրումային ծրագրերի վարչության պետ Տիգրան Սարգսյանը:

«Կարևորելով ֆիզիկական կուլտուրայի և սպորտի մասսայականացումն ու զարգացումը մայրաքաղաքում, ինչպես նաև խթանելով առողջ ապրելակերպը, մի շարք միջոցառումներ է իրականացվում: «Կոկա-Կոլա Երևան Կիսամարաթոնը» նպատակ ունի խթանել առողջ ապրելակերպը՝ միաժամանակ մայրաքաղաքում ու հանրապետությունում նպաստելով մարզական տուրիզմի զարգացմանը: Սփյուռքից ժամանակ սիրողական մակարդակի բազմաթիվ մասնակիցներ կունենանք: Մարաթոնը միջազգային կարգավիճակ ունեցող ծրագիր է: Ինչպես նախորդ տարիներին, այնպես էլ այս տարի կիսամարաթոնին աջակցում են մի շարք մասնավոր կազմակերպություններ, իսկ գլխավոր հովանավորը «Կոկա-Կոլա Հելլենիկ Արմենիա ընկերությունն է»: Հուսով եմ, որ այս ծրագիրը տարեցտարի կամրապնդվի ու իր տեղը կունենա միջազգային մարաթոնների օրացույցում»,- ասաց Տիգրան Սարգսյանն ավելացնելով, որ կարևոր է սփյուռքահայ մարզիկների և սիրողական վազորդների համար մայրաքաղաքը դարձնել ավելի գրավիչ՝ ամրապնդելով նրանց կապը հայրենիքի հետ:

Panorama.am-ի թղթակցի այն հարցին, թե ինչո՞ւ է կիսամարաթոն և կարո՞ղ է հետագայում այն դառնալ մարաթոն, Տիգրան Սարգսյանը պատասխանեց, որ քաղաքի երթևեկությունը և ենթակառուցվածքային գործունեությունը չխաթարելու համար անցկացվում է կիսամարաթոն: Եվ եթե ամեն ինչ հաջող ընթանա և սպասելիքներն արդարանան, ապա հետագայում իսկապես նպատակ ունեն այն դարձնել մարաթոն:

«Կոկա-Կոլա Հելլենիկ Արմենիա» ընկերության գլխավոր տնօրեն Սայյորա Այուպովան վստահություն հայտնեց, որ այդ օրը Երևանում իսկապես տոնական մթնոլորտ կստեղծվի: Բոլորին խնդրեց գալ միմիայն բարձր տրամադրությամբ և հույս հայտնեց, որ հոկտեմբերի 16-ին եղանակը ևս բարեհաճ կգտնվի մեր նկատմամբ:

«Կոկո-Կոլա» ընկերության հիմնական նպատակներից մեկը սպորտին աջակցելն է: Տեղական մակարդակով մենք համագործակցում ենք քաղաքապետարանների հետ, որպեսզի հասկանանք, թե որ ուղղություններն են կարևորվում սպորտի զարգացման համար: Նկատել ենք, որ Հայաստանում սպորտի նկատմամբ հետաքրքրությունը մեծ է: Ընտրել ենք վազք մարզաձևը, քանի որ այն հեշտ է ու կարող է ընդգրկել մեծ զանգվածներ, բացի այդ մեծ ներուժ ունի: Ի դեպ՝ մեր ընկերության աշխատակիցները նույնպես մասնակցում են այս ծրագրին: Ես ինքս վազում եմ: Արդեն 3 տարի է վազքն իմ կյանքի կարևորագույն մասնիկն է, քանի որ նպաստում է ոչ միայն առողջության ամրապնդմանը, այլև ազդում է տրամադրության, կենսակերպի վրա ու լավ օրինակ է մեր երեխաների համար»,- ասաց տիկին Այուպովան:

«Կոկա-Կոլա Երևան Կիսամարաթոնը» կմեկնարկի առավոտյան 9-ին՝ Շահումյանի անվան հրապարակից ու կշարունակվի մինչը 13.30-ը՝ ընդգրկելով 21,1 կմ վազքատարածություն: Անցնելով Հանրապետության հրապարակով Մ. Նալբանդյան, Վարդանանց, Ալ. Մանուկյան, Ավ. Իսահակյան փողոցներով և Կասկադ համալիրով՝ վազորդները կշարունակեն երթուղին դեպի Մոսկովյան, Մ. Սարյան փողոցներ, այնուհետև Լեոյի, Հ. Պարոնյան, Ձորափի փողոցներով (մինչև Դավթաշենի կամուրջ), Հրազդանի կիրճով, Հաղթանակի կամրջով, Արգիշտի, Իտալիայի, Վ. Սարգսյանի փողոցներով՝ մրցավազքը եզրափակելով մեկնարկային վերջնագծում:

Մրցուղին ունի 4 տարբեր երկարություն: 1 կմ վազքուղին նախատեսված է 6-12 տարեկան երեխաների համար, 5 կմ՝ 13 տարեկան և ավելի, 10 կմ՝ 16 տարեկան և ավելի, 21.1 կմ՝ 18 տարեկան և ավելի: 21 և 10 կմ մրցավազքի համար առաջին երեք տեղերը զբաղեցրած մասնակիցները կստանան դրամական պարգևներ: Վազքի բոլոր մասնակիցները կստանան շապիկներ և մեդալներ՝ անկախ ցուցաբերած արդյունքից:

«Վերադարձ Հայաստան Հիմնադրամի» գործադիր տնօրեն Վարդան Մարաշլյանը տեղեկացրեց, որ կիսամարաթոնի կազմակերպիչները ստեղծել են անվճար մարզման ակումբ, որին կարող է միանալ ցանկացած վազորդ՝ անկախ պատրաստվածության աստիճանից: Երևանյան կիսամարաթոնն ունի նաև բարեգործական բաղադրիչ. Վազքին մասնակցելու են հաշմանդամ վազորդներ, որոնք մրցելու են 5 կմ վազքուղում:

Հավելենք, որ մասնակցության հայտ են ներկայացրել 1000-ից ավելի հայաստանյան ու արտասահմանյան սիրողական ու պրոֆեսիոնալ մակարդակի վազորդներ, այնպես որ սպասվում է հետաքրքիր պայքար: Ինչու ոչ՝ նաև թեժ, սակայն պայքարից բացի այստեղ կտիրի ջերմ-բարեկամական մթնոլորտ:

Երևանի քաղաքապետարանն էլ խոստանում է նման հետաքրքիր մարզական միջոցառումների քանակն ավելացնել՝ ընդգրկելով նորանոր մարզաձևեր: