Ձեր վստահելի աղբյուրը

Կառավարության երեկվա  նիստում  հավանության արժանացած 2017 թ. պետական բյուջեի նախագիծը տնտեսագետ Մեսրոպ Առաքելյանին առաջիկա տարում ավելի լավ ապրելու հույսեր չի տալիս:

«Նախագիծը էականորեն չի տարբերվում նախորդ տարիների բյուջեներից: Այս փաստաթուղթը ցույց տվեց, որ դրական փոփոխությունները, որի ակնկալիքները կային կառավարության կազմի փոփոխությունից հետո, տնտեսության մեջ չենք ունենալու»,-Panorama.am-ի հետ զրույցում կարծիք հայտնեց Մ. Առաքելյանը:

Նրա խոսքով, չկա տնտեսության այնպիսի աճ, որը կբերի կենսամակարդակի բարձրացման, չկա թոշակների, աշխատավարձերի բարձրացում:

«Հաշվի առնելով նաև ներդրումների կանախատեսվող նվազումը, կարելի է  ասել՝  տնտեսության մեջ տեղի չեն ունենալու փոփոխություններ  կապված աշխատատեղերի ստեղծման հետ, որը հնարավորություն կտա ունենալ բարեկեցություն որոշակի բարելավում»,-ասաց մնա:

Նախագիծն ուսումնասիրելուց հետո, տնտեսագետը  փաստում է, որ հարկերի մասով նախատեսվում է 0.5 տոկոս աճ:

«Կառավարությանը ներկայացվեց, որ դա հիմնականում պայմանավորված է շահումով  խաղերի, մասնավորապես ինտերտներտ խաղերի  ոլորտում որոշակի հարկատեսակների խստացմամբ: Եթե սա դնենք մի կողմ, ապա  հարկերի այդչափ նախատեսված աճը խոսում է  այն մասին, որ ստվերի մակարդակի նվազում չի լինելու»,-ասաց Առաքելյանը՝ չբացառելով, որ նման աճ կարելի է ունենալ նույնիսկ ոչինչ չանելու պարագայում:

Ծախսերի բաժնում նախատեսած 17 մլրդ դրամի խնայողությունը տնտեսագետին չի ուրախացնում.  պետական ապարատի ծախսերը չեն նվազում,
կրկնակի նվազում են բնակարանային շինարարությանն ուղղված ծախսերը,
նվազում են երկրի զարգացման համար երկու կարևորագույն ոլորտներին՝  առողջապահությոան, կրթության հատկացումները:

«Դա ձեռքբերում չի կարելի համարել, կրթության ու առողջապահության ոլորտների ծախսերը պետք է ավելանան: Հաշվի առնելով աղետի գոտու առկայությունը, տարեցտարի բնակֆոնդի մաշվող վիճակը, բնակարանաշինությունը ևս պետք է դառնա պետության առաջնահերթություններից, շինարարության ոլորտում 2017-ին աճ չի կանխատեսվում»,-նշեց նա:

Տնտեսագետին մտահոգում են  ներդրումների՝ մոտ 2 տոկոսով նվազելու վերաբերյալ կանխատեսումները. «Սա անհասկանալի է: Կառավարության գլխավոր առաջնահերթությունը պետք է լիներ այնպիսի տնտեսական միջավայրի ձևավորումը, որը նպաստեր ներդրումների աճին: Նվազումը չնչին է, բայց 2016-ին ներդրումների ծավալն այնքան չնչին է, որ այդ մակարդակի  պահպանումն արդեն իսկ վտանգավոր է: Նախատեսվում է նաև սպառման նվազում, թոշակների, նպաստների, աշխատավարձերի չափի պահպանում, սա նշանակումէ , եթե մի փոքր գնաճ լինի, ապա բնակչությունն ավելի է աղքատանալու»:

Բյուջեի նախագծի համաձայն, 19 մլրդ դրամով ավելացել է պետական պարտքի սպասարկման ծախսերը: Տնտեսագետը դա այս կառավարության բացթողումը չի համարում, սակայն վտանգավոր միտում է որակում:

«Պետական պարտքը 2017-ի վերջին, ըստ կանխատեսումների, կկազմի 6.3 մլրդ դոլար, այս տարվա  5.4 մլրդ դոլարի համեմատ, աճը կազմում է մոտ 20 տոկոս: Այսինք, շարունակելու ենք  վարկեր վերցնել, որի մի մասը սպասարկելու է բյուջեի դիֆիցիտի ֆինանսավորմանը, արտաքին պարտքերի սպասարկումը տարեցտարի ավելի մեծ բեռ է դառնալու բյուջեի վրա»,-ասաց նա:

Մ. Առաքելյանն ուրախացնող մի բան գտել է նախագծում՝ բյուջեի պակասորդը 2016-ի համեմատ նվազելու է. «Հաշվի առնելով հարկերի մուտքերի թերակատարումը, կարծում եմ, որ 2016-ին պակասորդը կկազմի ՀՆԱ-ի 6 տոկոսը: 2017-ի բյուջեի նախագծով կանախտեսվում է ՀՆԱ-ի 3 տոկոսի չափով՝ մոտ երկու անգամ քիչ:  Սակայն պետք է նշել, որ բյուջեի պակասորդի ցանկացած ծավալ արդեն բեռ է դառնում պետական պարտքի վրա: Կուտակած այնքան պարտք ունենք, որ մի փոքր աճն էլ արդեն խնդրահարույց է  դառնում»: