Ձեր վստահելի աղբյուրը

Արդեն 8-րդ տարին է Արենի համայնքում անկացվում է Արենի գինու ավանդական փառատոնը: Փառատոնի տնօրեն Նունե  Մանուկյանը Panorama.am-ի հետ զրույցում նշեց, որ տարեցտարի ավելանում են և գինի արտադրող ընկերությունների, և տնական գինի արտադրող անհատների մասնակցությունը:

«Այս տարի Հայաստանից գինի արտադրող 18 կազմակերպություն է մասնակցում փառատոնին, ինչպես նաև տնական գինի արտադրող մոտ 60 անհատ: Արցախից այս տարի փառատոնին երեք կազմակերպություն է մասնակցում՝ երկու գինի արտադրող և մեկ զբոսաշրջային»,- նշեց նա:

Փառատոնի տնօրենի խոսքով՝ նախորդ տարվա համեմատ գինի արտադրող 4 կազմակերպություն է ավելացել: Ըստ Ն. Մանուկյանի, արդեն տարածքի խնդիր է առաջանում:

Փառատոնի բացմանը Արենիի գյուղապետ Սերգեյ Սուքիասյանը նշեց, որ այս տոնին մեծ ուրախությամբ են սպասում արենցիները, քանի որ հնարավորություն են ունենում ներկայացելու իրենց արդար քրտինքով ստեղծած բերքն ու բարիքը:

«Աշխատասեր արենցին գինու արարման արհեստը սերնդեսերունդ է փոխանցում  ու ավելի կատարելագործում»,- նշեց նա:

Արցախի «Ասկերան-վայն» ընկերության տնօրեն Գարիկ Շահրամանյանը Panorama.am-ի հետ զրույցում ասաց, որ իրենք գինին արտադրում են ավանդական տեխնոլոգիաներով:

«Միայն խնդողնի տեսակի խաղողից ենք գինի արտադրում, սակայն ունենք նաև նռան այգիներ, և, հնարավոր է, շուտով սկսենք նաև նռան գինի արտադրել: Արտահանում դեռ չկա, արտադրանքը սպառվում է տեղում, սակայն մեծ ցանկություն ունենք նաև արտասահմանում ներկայացնել մեր արտադրատեսակը»,- նշեց Գ. Շահրամանյանը:

Փառատոնը համընկնում է Տուրիզմի համաշխարհային կազմակերպության տարեկան համաժողովի հետ, որն այս տարի անցկացվում է Երևանում: Այդ առիթով Հայաստան են ժամանել 20-ից ավելի երկրի 70 պատվիրակ:

Փառատոնին ներկա էկոնոմիկայի փոխնախարար Գարեգին Մելքոնյանը նշեց, որ Հայաստանն առիթն օգտագործում է հյուրերին ներկայացնելու իր զբոսաշրջային պոտենցիալը: Նրա փոխանցմամբ՝ այս երկու օրերի ընթացքում, բացի Արենիից, հյուրերը կայցելեն Հայաստանի զբոսաշրջության համար առավել հետաքրքիր վայրեր, կհանդիպեն ՀՀ նախագահի, վարչապետի հետ:

Տուրիզմի համաշխարհային կազմակերպության գործադիր տնօրեն Կառլոս Վոգելերն  ասաց. «Հիացած ենք ձեր ջերմ ընդունելությամբ և հյուրասիրությամբ: Առաջին անգամ է, որ համաժողովին նմանատիպ մոտեցում է ցուցաբերվում: Կազմակերպությունը պատրաստ է համագործակցել Հայաստանի հետ, քանի որ տեսնում է նրա զբոսաշրջային պոտենցիալը: Հայերը միշտ պատրաստ են սրտաբաց ընդունելության, ջերմության, ինչն էլ փնտրում է զբոսաշրջիկը»: