Ձեր վստահելի աղբյուրը

Երևանի Շենգավիթ վարչական շրջանում գտնվող թիվ 126 մանկապարտեզն այսօր իր սաներին ընդունեց բոլորվին նոր՝ վերանորոգված տեսքով: 1974 թվականին կառուցված մանկապարտեզը խորհրդային տարիներից մինչ օրս չէր վերանորոգվել, հիմա այն ունի ոչ միայն գեղեցիկ շենքային պայմաններ, այլ նաև նոր անուն՝ «Ժպիտներ»:

Թիվ 126 մանկապարտեզը վերանորոգվել է  ՀՀ առաջին տիկին Ռիտա Սարգսյանի նախաձեռնությամբ:

Բացմանը արարողությանը ներկա ՀՀ առաջին տիկինը պատմեց, թե ինչպես են ընտրել հենց այս մանկապարտեզը և վերանորոգել այն. «Օրերից մի օր Ռուսաստանի մեր հայրենակիցներից մեկը, ում ես չեմ ճանաչում ինձ մոտեցավ  և ասաց. «Իմ տանը ծանր հիվանդ մարդ է եղել, և ես ինքս ինձ խոստացել եմ, երբ նա բուժվի ու ամեն ինչ լավ ավարտվի, ես Հայաստանի մանուկների համար անպայման նվիրատություն եմ անելու, հիմա թույլ տվեք ինձ խոստումս իրականացնել»:  Շատ ուրախացա, ասացի, որ բոլորին ասելու եմ դրա մասին, սակայն նա ասաց՝ ոչ մի դեպքում, չեմ ուզում իմ անունը հնչեցնեք, դա արդեն բարգործություն չի լինի: Քանի որ նախկինում մանկապարտեզում եմ աշխատել, ես ինքս նրան առաջարկեցի, որ այս նախագիծն էլ նվիրենք  բալիկներին: Դիմեցի Երևանի քաղաքապետարան, խնդրեցի, որ տրամադրեն մայրաքաղաքի ամենամեծ ու ամենավատ վիճակում գտնվող մանկապարտեզի հասցեն: Ամենամեծ մանկապարտեզն ուզեցի, որպեսզի ավելի շատ փոքրիկներ օգտվեն այս բարիքից»:

Ռիտա Սարգսյանը նշեց, որ վերանորոգման աշխատանքներին է միացել նաև «Լույս» հիմնադրամը, Երևանի քաղաքապետարանն ու Շենգավիթի թաղապետարանը:

«Բարի գործերը վարակիչ են լինում, քաղաքապետարանը մեզ նվիրեց  կահույք, Շենքավիթի թաղապետարանը՝ մանկապարտեզի բակում խաղահրապարակներ սարքեց, իսկ երբ գնում էի խանութներ մանկապարտեզի համար ինտերիեր ընտրելու, խանութում իմանալով մեր աշխատանքի մասին՝ բոլորն իրենց կողմից նվերներ էին ուղարկում: Մեծ սիրով իմ կողմից էլ եմ նվերներ բերել մանկապարտեզի համար»:

Հանրապետության առաջին տիկինը առանձանացրեց մանկապարտեզի ամենայուրահատուկ ձեռքբերումը՝ ձմեռային այգին. «Իմ կողմից նվերներ եմ բերել այգու համար, թոռնիկներս մեծացել են, գնում են դպրոց, թող հիմա էլ ուրիշ փոքրիկներն ուրախանան այգում գտնվող հեքիաթի հերոսներով»:

Մանկապարտեզում շրջայցի ժամանակ Ռիտա Սարգսյանը մեծ ջերմությամբ ու մանրամասն պատմում էր յուրաքանչյուր ընտրված դեկորի ու աշխատանքի մասին. «Ուզում էի, որ երեխաները լացելով չմտնեն մանկապարտեզ: Արել ենք ամեն հնարավորը, որ երեխաները սիրով գան, սիրեն այս վայրը, անգամ մանկապարտեզի բուժկետն ենք այնպես զարդարելու, որ երեխաները չվախենան այնտեղ գնալուց: Մուտքի մոտ էլ հատուկ գրատախտակ ենք դրել, որպեսզի ծնողները ծանոթանան  երեխաների այդ օրվա ճաշացանկին ու տանը նույնը չպատրաստեն»:

Նշենք, որ այս մանկապարտեզը կտարբերվի շենքային պայմանների ևս մեկ կարևոր առանձնահատկությամբ՝ վերանորոգումից հետո  բոլոր խմբերի սենյակների կողքին առանձին փոքրիկ խոհանոցներ կան, որտեղ կլվանան և դարակներում կպահեն են տվյալ խմբի սպասքն առանձին: Դրա շնորհիվ մանկապարտեզի սանիտարահիգիենիկ պայմաններն ավելի կբարելավվեն:

Երևանի քաղաքապետարանի կրթության վարչության պետ Գայանե Սողոմոնյանն էլ լրագրողների հետ զրույցում նշեց, որ այս մանկապարտեզի վերանորոգումը միշտ ձգձգվում էր, քանի որ նրա վերանորոգման ֆինանսական միջոցների չափով հնարավոր էր լինում երկու-երեք ուրիշ մանկապարտեզ վերանորոգել. «Ծայրահեղ անմխիթար վիճակում էր, վերանորոգման համար լուրջ ներդրում էր անհրաժեշտ»:

Թիվ 126 մանկապարտեզի տնօրեն Լենա Լևոնյանն էլ հայտնեց, որ վերանորոգումից հետո բացվեց մանկապարտեզի 12-րդ խումբը, այժմ մանկապարտեզ է հաճախում 400 երեխա: Մանկապարտեզն ունի 60 աշխատող. «Այժմ ունենք վերանորոգված  մարզադահլիճ՝ իր ողջ գույքով, հանդիսությունների երկու դահլիճ: Այս ամենի շնորհիվ երեխայի առօրյան պետք է ավելի գեղեցիկ ու հետաքրքրիր դարձնենք: Ի վերջո իրականավություն  դարձավ մանկապարտեզի աշխատողների ու ծնողների երազանքը»: