«Այս առևտրի կենտրոնով զարկ ենք տալու նաև տեղական արտադրանքի խթանմանը». Խ. Սուքիասյան
« «Երևան տոնավաճառ» առևտրի կենտրոնի բացման արդյունքում ստեղծվել է սպասարկման անձնակազմի 70 և առևտրային տաղավարների 400 աշխատատեղ»,-այսօր կենտրոնի բացման արարողությունից հետո լրագրողների հետ զրույցում հայտնեց «Երևան տոնավաճառի» գործադիր տնօրեն Էդգար Առաքելյանը:
Նշենք, որ կենտրոնի ստեղծումը նախաձեռնել է «ՍԻԼ Կոնցեռն» ընկերությունը:
«Տոնավաճառում ներկայացված են Հայաստանի արտադրող և ներմուծող ամենամեծ ընկերությունները: Շենքի ներսում տեղեկայված են հիմանականում մանրածախ առևտրի համար նախատեսված 400 տաղավար, իսկ բակային հատվածում՝ մեծածախ առևտրի համար նախատեսված հարյուր տաղավար: Հիմնական ապրանքատեսականու մեջ մտնում են տնտեսական ապրանքներ, կենցաղային տեխնիկա, հագուստ, խաղալիքներ, և այլն»,-ասաց գործադիր տնօրենը:
Նրա խոսքով, այս ամենից բացի, կենտրոնը մատուցում է նաև այլ ծառայություններ. «Այստեղ գործում է բանկ, ապահովագրական ընկերություն, տուրիստական գործակալություն, ավիատոմսերի վաճառք և ժամանցային տարատեսակ կետեր: Ունենք նաև գրասենյակային տարածքներ՝ տնտեսվարող սուբյեկտների համար: Ներկայումս կենտրոնն ունի 95 տոկոս ծանրաբեռնվածություն»:
Էդգար Առաքելյանը կարևորեց նաև տոնավաճառի տեղակայման վայրը. «Այն գտնվում է տրանսպորտային հանգույցի կենտրոնում՝ «Սասունցի Դավիթ» մետրոյի կայարան, մայրաքաղաքից դեպի մարզեր մեկնող և ժամանող ավտոբուսների վերջին կայարան, ունենք երկու մուտք Սևանի և Արշակունյաց փողոցներ: Այսպիսի հանգույցը շատ կարևոր է առևտրի կենտրոնի համար»:
«ՍԻԼ Կոնցեռն» ընկերության հիմնադիր նախագահ Խաչատուր Սուքիասյանն էլ լրագրողների հետ զրույցում տեղեկացրեց, որ կենտրոնում ունեն նաև տեղական արտադրողների համար նախատեսվա հարթակ. «Երրորդ հարկում կլինի կոշիկի արտադրության համար նախատեսված վայր: Գիտեք, որ մեր ընկերությունը նաև ֆինանսական համակարգ է, որով կարող ենք տարբեր գործունեություններ ապահովագրել և վարկավորել: Մենք կոշիկի արտադրության համար տալիս ենք արտոնյալ վարկեր: Վստահեցնում եմ, որ կոշիկի արտադրությունը Հայաստանում առաջիկա երեք տարվա ընթացքում բավականին մեծ վերելք կարող է ունենալ: Ուղղակի տեխնիկական խնդիրներ պետք է լուծվեն, նոր սարքավորումներ պետք է ներկրվեն: Կոշիկ ասելով միայն կաշին պետք չէ հասկանալ, այնտեղ տարբեր բաղադրիչներ կան, որոնք նույնպես պետք է ՀՀ տարածքում արտադրվեն»:
Խաչատուր Սուքիասյանի խոսքով՝ կոշիկի արտադրությամբ Հայաստանը կարող է ոչ միայն ինքնաբավություն ապահովել, այլև արտադրանքն արտահանել. «Մեր ամբողջ մոտեցումն ու վարկավորումը նրա համար է, որպեսզի սկզբանական շրջանում արտադրողներն իրենց դիրեքրը բարելավեն ՀՀ տարածքում՝ այնուհետև դուրս գան այլ երկրների շուկաներ: «Երևան տոնավաճառ»-ում արդեն ունենք տեղական արտադրանքի տաղավարներ և այս առևտրի կենտրոնով զարկ ենք տալու նաև տեղական արտադրանքի խթանմանը» :
2016թ. հունվարից մինչև հոկտեմբեր տոնավաճառի շինարարության աշխատանքներում մշտապես ներգրավված են եղել ավելի քան 250 աշխատակից, որոնց միջին ամսական աշխատավարձը կազմել է 200.000 ՀՀ դրամ: Տոնավաճառի առաջին փուլով շահագործման հանձնված հատվածում կբացվի 550 աշխատատեղ՝ ամսական միջինը 150.000 ՀՀ դրամ աշխատավարձով: Կառույցի այս փուլի ներդրումները, պատասխանատուների հավաստմամբ, կազմել են շուրջ 2 մլրդ 500 մլն ՀՀ դրամ: Երկրորդ փուլի իրականացման արդյունքում 2017թ. ամռանը Երևանը կունենա 43 000 քմ տարածքով, 850 մանրածախ և մեծածախ առևտրի համար նախատեսված վաճառքի տաղավարներով հագեցված և ժամանակակից բոլոր պահանջներին համապատասխանող տոնավաճառ, որտեղ կբացվի շուրջ 1000 աշխատատեղ՝ միջին ամսական 150 000 ՀՀ դրամ աշխատավարձով:
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ