ՔՊ վարչության նոր նախագահ է դարձել Սասուն Միքայելյանը
Քաղաքացիական պայմանագիր կուսակցության հոկտեմբերի 30-ին տեղի ունեցած արտահերթ համագումարի արդյունքներով կուսակցությունը վարչության նոր կազմ է ընտրել, որն այսուհետ կղեկավարի արցախյան ազատամարտի մասնակից, նախկին Հանրապետական, ԱԺ նախկին պատգամավոր Սասուն Միքայելյանը։
Ի դեպ, վարչության նախագահի երկու թեկնածու են եղել՝ Արարատ Միրզոյանը և Սասուն Միքայելյանը, սակայն վարչությունը ընտրել է վերջինին։ Նշենք, որ ՔՊ վարչության նախկին նախագահը Արայիկ Հարությունյանն էր։
Կուսակցությունը արտահերթ համագումար որոշել էր անցկացնել տեղական ինքնակառավարման մարմինների վերջին ընտրություններից հետո, որի արդյունքները կուսակցության ղեկավարությունը համարել էր խայտառակություն։
Կուսակցությունը երեկվա համագումարում ընտրել է նաև վարչության նոր կազմ՝ Նիկոլ Փաշինյան, Արայիկ Հարությունյան, Զարուհի Բաթոյան, Լենա Նազարյան, Սուրեն Պապիկյան, Սասուն Միքայելյան, Տիգրան Ավինյան, Արարատ Միզոյան, Գարիկ Սարգսյան, Վահագն Հովակիմյան, Հովիկ Աղազարյան, Ռոմանոս Պետրոսյան, Ալեն Սիմոնյան։
ՔՊ արտահերթ համագումարին ներկա են եղել ՀՀՇ ներկայացուցիչ Ալեքսանդր Արզումանյանը, Հանրապետություն կուսակցության նախագահ Արամ Սարգսյանը և Ժողովրդավարական հայրենիք կուսակցության նախագահ Պետրոս Մակեյանը։
Արզումանյանը այս կուսակցության արտահերթ համագումարը համարել է նախադեպային, քանզի, չի եղել նման կուսակցություն, որի վարչությունը ընտրությունների վատ արդյունքներից հետո հրաժարական տա ու ընտրվի նոր վարչություն։
«Կուզենայի միասին աշխատեինք գաղափարական հենքի վրա, հնարավորինս լայն համախմբում ապահովենք։ Պետք է փորձենք աշխատել միասին, մենք պատրաստ ենք համագործակցության այն ուժերի հետ, որոնց համար անընդունելի է Հայաստանի կործանումը», -հայտարարել է Ալեքսանդր Արզումանյանը։
Հնարապետություն կուսակցության նախագահ Արամ Սարգսյանը, որպես հրավիրյալ, իր ելույթում հայտարարել է, որ եթե հաջորդ տարվա ապրիլին խորհրդարանական ընտրությունները անցնեն արդար, թափանցիկ, կսեղմեն ընտրվածների ձեռքը և կմաղթեն հաջողություն, իսկ եթե «իշխանությունները իրենց սովորության համաձայն թիվ կրակեն, ապա տեղերում առաջադրված թեկնածուներն իրենց ազգուտակով գալու են Ազատության հրապարակ»։
«Եթե մեննք իրական փոփոոխություն ենք ուզում, կարևոր է դառնում իրական և կեղծ ընդդիմության տարանջատումը։ Իշխանություններն այսօր վերակենդանացնում են նոր հաճախորդներ, նոր ոչ իշխանական ուժեր։ Այսօր համար մեկ խնդիրը քաղաքական թիմերի իրական ընդդիմության միավորման մեջ է լինելու»,-հայտարարել է Սարգսյանը։