Ձեր վստահելի աղբյուրը

ՍԱՊԾ պետի փոփոխության փաստի ու  սպասվելիք հնարավոր արդյունքների մասին Panorama.am-ը զրուցել է  «Իրազեկ և պաշտպանված սպառող» ՀԿ նախագահ Բաբկեն Պիպոյանի հետ:

Panorama.am . ԳՆ Սննդամթերքի անվտանգության ծառայության նոր պետի անունն արդեն հայտնի է: Նա «Նատֆուդ» ընկերության տնօրեն Իշխան Կարապետյանն է: Ինչպե՞ս եք գնահատում այս փոփոխությունը:

Բաբկեն Պիպոյան. Նման գնահատական տալու համար դեռ վաղ է: Պատճառները տարբեր են: Մասնավոր հատվածից դեպի պետական վերահսկողություն անցումը կարող է ունենալ կրկնակի նշանակություն: Առաջին՝ նախկինում տնտեսվարող  սուբյեկտը շատ լավ կարող է ծանոթ լինել առկա իրավիճակին, ներկայացվող պահանջներին, ավելին՝ քաջ գիտակցել, թե ինչ հետևանքներ կարող են առաջացնել չարաշահումները:

Մյուս կողմից՝ կարող է լինել շահերի բախում: Ավելի ճշգրիտ գնահատական հնարավոր կլինի  տալ, երբ օրինակ հստակ գնահատվի «Նատֆուդ» ընկերության գործունեությունը:

Շատ կարևոր է, որ հասարակական ոլորտի ցանկացած ներկայացուցիչ՝ ՀԿ, ԶԼՄ  իրեն համարի ՍԱՊԾ անդամը և կոլեգան: Սա կարող է  լինել միայն այն դեպքում, երբ պետական մարմինն աշխատի ազդանշաներով և ուղերձներով, ցույց տա, որ վերջիններիս անհրաժեշտությունը զգում է: Ցավոք սրտի, վերջին շրջանում այս առումով բացթողում կար, մեղքը ոչ թե հասարակական սեկտորինն էր, այլ պետական մարմնինը: Մենք մեզ կոլեգա չենք համարել: Մինչդեռ ամենուր ամենօրյա վերահսկողություն կարող ենք ունենալ, երբ ցանկացած ոք իրեն համարի պետական վերահսկողություն իրականացնող մարմնին հավասար, որովհետև պետությունն արձագանքելու է  նույն ռիթմով ու տեմպով:

Panorama.am. ՍԱՊԾ պետի պաշտոնանկության մասին հաճախ էին մամուլում լուրեր լինում, սակայն որոշումը եղավ երեկ: Սպասելի՞ էր: Ինչպե՞ս եք գնահատում արդեն նախկին պետի պաշտոնավարումը:
Բաբկեն Պիպոյան. Արմեն Հայրապետյանի գործունեությունը գնահատելիս այն պետք է բաժանել երկու համահավասար մասերի: Ի՞նչ էինք անկնկալում մենք և ի՞նչ խնդիր էր լուծում նա՝ սահմանված նախկին գործադիր իշխանության կողմից:

Այստեղ մոտեցումներում կան էական տարբերություններ: Հասարակական շերտը նրանից ակնկալում էր գործունեություն օրենսդրության շրջանակներում, համաձայն որ՝ իրենց հիմնական սկզբունքը սպառողների շահերի պաշտպանությունն էր: Մինչդեռ նախկինում այստեղ փաստված էր, որ տնտեսվարողների շահերը պետք է վեր  դասել շատ արժեքներից:

ՍԱՊԾ-ն պատասխանատու է երեք հիմնական ոլորտի համար՝ անասնաբուժություն, բուսասանիտարիա, սննդի անվտանգություն:

Անասնաբուժության ոլորտում, չնայած դաբաղի մասին հայտարարություններին, հերքումներին, փաստն այն է, որ մինչ օրս որոշ ապրանքատեսակների ՌԴ արտահանաման սահմանափակում է կիրառվում:  Չնայած հայտարարվում էր, որ սահմանափակումը ժամանակավոր է ու մի քանի շաբաթվա հարց: Սա նշանակում է, որ մեր ռազամավարական դաշնակից Ռուսաստանը բավարարված չէ դաբաղ հիվանդության կանխարգելման դեմ իրականացված աշխատանքներից:

Ինչ վերաբերում է բուսասանիտարիայի ոլորտին. կամայական մի ֆերմերի հետ զրույցը բերել-հանգեցնելու է նրան, որ  օր օրի կորցրած բույսերի տեսակների թիվն ավելանում է, օրինակ՝ անտառի տանձ էլ չունենք, էլ չեմ քննարկում կարտոֆիլի որակական անկման հետ կապված խնդիրները:

Ինչ վերաբերում է սննդի անվտանգության ոլորտին, ապա բոլոր այն ոլորտները, որտեղ հասարակական սեկտորն իրականացնում է մոնիտորինգ, խայտառակ պատկեր է արձանագրում, և, ըստ էության, անգամ գիտական կազմակերպությունների գնահատականով՝ նախորդ տարիների համեմատ ունենք հետընթաց:

Ըստ էության, տնտեսության զարգացման հեռանկարի վերաբերյալ իմ տեսլականը հետևյալն է. մենք պետք է ունենանք որակյալ ու մրցունակ ապրանք, որպեսզի աշխարհը լինի մոտիվացված մեր ապրանքն ընդունելու և ներմուծելու: Մենք չպետք է ունենանք հիվանդություններ այս ոլորտներում, միայն այդ պարագայում աշխարհը կլինի շահագրգիռ՝ ներմուծելու մեր ապրանքը:

Այս ամենը չունենալու համատեքստում, եթե գնահատում ենք արտահանման հեռանկարները, ապա այստեղ կատարվել է մեծ աշխատանքը: Նման որակի ու նման անվտանգության ապրանքները շատ ավելի լուրջ սահմանափակումների ներքո կարող էին լինել: Այսինքն, որպես սննդամթերքի անվտանգության դեսպան անհատական մակարդակում աշխատանք տարվել է և լավ: Սակայն լուրջ բացթողումներ ունենք ինստիտուցիոնալ աշխատանքում, դրա լավ կատարման  պարագայում դիվանագիական նման աշխատանքի կարիք չէր լինի:

Panorama.am. ՍԱՊԾ նախկին պետը նշանակվելու է Գյուղատնտեսության նախարարի խորհրդական: Ինչպե՞ս եք գնահատում:
Բաբկեն Պիպոյան. Այս իրավիճակում, երբ մենք չունենք սննդամթերքի պատշաճ որակ ու պատշաճ վերահսկողություն, պետությանը պետք էր մի մարդ, ով «դիվանագիտական կորպուսում» կկատարեր աշխատանքներ: Թերևս այստեղ կարելի է ասել նրա աշխատանքը հաջողված է, կարծում եմ,  նշանակումը պայմանավորված է նաև դրանով: Սա էր այն պաշտոնը, որ պետք է զբաղեցներ նմա խնդիրները լուծելու ունակ մարդը: