Ձեր վստահելի աղբյուրը

«Մենք չունենք նման քննարկումները: ՀՀԿ-ն չի խուսափում կոնսուլտացիաներից, բայց դրանք պետք է լինեն հիմնավորված, ապագային միտված, ոչ թե ինքնանպատակ: Ինքնանպատակ կոալիցիաները դատապատված են շուտ վախճանի, ինչին ականատեսը եղանք  ներկա խորհրդարանում»,- Ազգային ժողովում ճեպազրույցների ժամանակ ասաց ՀՀԿ խմբակցության ղեկավար Վահրամ Բաղդասարյանը՝ պատասխանելով ընտրություններից առաջ կուսակցությունների խոշորացման մասին հարցին:

Ինչ վերաբերում է  ընդդիմության  կոնսուլտացիաներին,  խոշորացմանը, ՀՀԿ-ական գործչի կարծիքով՝ այլ ելք չկա:

«Եթե  առանձին քաղաքական ուժերի ռեյտինգը ուսումնասիրեք, մոնիտորինգ անեք, կտեսնենք, որ շատ տխուր իրավիճակ է, դրա համար պետք է լինեն խոշորացումներ,  բանակցություններ, միացումներ: Մենք բազմիցս ենք հորդորել: Բայց պետք է ուշադիր լինեն, որպեսզի միացումները լինեն գաղափարական հենքի, մոտեցումների վրա, լինեն ընդհանրական, որպեսզի  երկար ճանապարհ ունենան: Տեսաք, թե այս խորհրդարանում ինչ կատարվեց՝ մի խմբակցություն ամբողջովին քայքայվեց, երկու  խմբակցություն կիսաքայքայման եզրին են: Եթե միակ նպատակն այն է, որ ինչ-որ ձևով մանդատը վերցնեն ու մուտք գոծեն Ազգային ժողով, դրանով քայքայում ենք քաղաքական դաշտը»,- ասաց Վ. Բաղդասարյանը:

Քաղաքական գործչին թվում է, որ բոլոր քաղաքական ուժերի, քաղհասարակության նպատակն այն է, որ Հայաստանում քաղաքական դաշտը լինի կայացած, իշխանությանը համարժեք ընդդիմություն լինի, որ իշխանությունը լինի ավելի զգոն:

Հարցին, թե հասկանալի է, որ քայքայված խմբակցությունը «Ժառանգություն»-ն է, իսկ որո՞նք են կիսաքայքայվածները, Վ. Բաղդասարյանն ասաց. «Նկատի ունեցեք, օրինակ՝ տարբեր քաղաքական ուժերի, հայացքների տեր մարդիկ  հայտարարություն անելով՝ նրանք այդ խմբակցությունների հետ որևէ կապ չունեն: Այսինքն նշանակում է, որ այդ խմբակցությունով եկել են Ազգային ժողով, բայց ինչ-ինչ պատճառներով տարբեր հայտարարություններով սկսում են իրենց անկախություն ապահովել և դառնալ անկախ պատգամավորներ: Ինձ թվում է՝  այդ մոտեցումը քաղաքական չէ, առավել ևս պառլամենտական  համակարգում դա շատ վտանգավոր է: Օրինակ այսօր ՀԱԿ-ը, ԲՀԿ-ն ունեն նման խնդիրներ: Ցանկալի է, որ բոլոր քաղաքական ուժերը, նաև մենք ցուցակները կազմելիս շատ ուշադիր լինենք, որպեսզի նման երևույթներ չունենանք»:

Ինչ վերաբերում է վարչապետ Կարե Կարապետյանի՝ ՀՀԿ փոխնախագահ նշանակվելուն, ՀՀԿ խմբակցության ղեկավարն ասաց, որ կա այդ թեկնածությունը, բայց պետք է համբերել, շուտով կլինի կուսակցության խորհրդի նիստի, բոլոր հարցերի պատասխանները կլինեն:

Հարցին, թե ՀՀԿ ցուցակում ո՞ր համարը պետք է լինել ՀՀԿ առաջնորդ Սերժ Սարգսյանը, Վ. Բաղդասարյանն ասաց, որ Սերժ Սարգսյանը ՀՀԿ առաջնորդն է, որևէ հիմք չկա, որ առաջնորդը չգլխավորի ցուցակը: