Ձեր վստահելի աղբյուրը

2016 թվականը, հավանաբար, կեզրափակվի 1%-ից ավելի ցածր տնտեսական ակտիվությամբ, ինչը պայմանավորված է մի շարք  ներքին և արտաքին գործոններով: Այս մասին այսօր լրագրողների հետ հանդիպման ժամանակ ասաց «Այլընտրանք» հետազոտական կենտրոնի ղեկավար, տնտեսագիտության դոկտոր, պրոֆեսոր Թաթուլ Մանասերյանը:

«Համաշխարհային տնտեսության աճի տեմպերի դանդաղումը, ինչպես նաև ներքաղաքական և ներքին տնտեսական բավական հակասական միտումները, որ գրանցվեցին նախորդ տարի, չէին կարող բացասական ազդեցություն չունենալ տնտեսության վրա: Իհարկե սա չի կարող մեզ մխիթարել, քանի որ չի օգտագործվում այն պոտենցիալը, որն ունի Հայաստանի տնտեսությունը»,- նշեց Թաթուլ Մանասերյանը:

Անդրադառնալով ֆինանսական հատվածին՝ տնտեսագետն ասաց, որ  2016թ-ին Հայաստանում ֆինանսական հատվածը բավական հավասարակշռված է  եղել: Ըստ նրա, եթե համեմատեն հետխորհրդային երկրների հետ, ապա Հայաստանը միակ երկիրն է, որ արդեն երկրորդ տարին անընդմեջ և դրամավարկային քաղաքականության, և ազգային արժույթի կայունության առումով դրականորեն առանձնանում է:

«Այդուհանդերձ, մեր սպասելիքներն ավելի  են, բանկերը պետք է կարողանան տնտեսական աճին  նպաստող գործունեություն ծավալել, ինչպես նաև կարողանան իրենց վրա վերցնեն ռիսկերը, որպեսզի նպաստեն տնտեսության զարգացմանը»,- ընդգծեց Թաթուլ Մանասերյանը: 

Ինչ վերաբերում է 2017 թ-ի տնտեսական աճին, տնտեսագետը նշեց, որ այս տարին բավական հագեցած է լինելու տարբեր զարգացումներով: Ըստ նրա՝ առաջին հերթին պետք է ճիշտ օգտագործվեն մարդկային ռեսուրսները, ԵՄ-ի և ԵԱՏՄ-ի հնարավորությունները:

«Պատերազմական իրավիճակում գտնվող Հայաստանը պարտավոր է փոխել իր տնտեսության զարգացման մոդելը և այն համահունչ դարձնել պատերազմական պայմաններին, քանի որ ազատ շուկայական պայմաններում առկա օրենքներն այստեղ չեն կարող գործել: Մենք պարտավոր ենք լուրջ ուշադրություն դարձնել ռազմաարդյունաբերության զարգացմանը, սակայն դա բեռ չպետք է դառնա տնտեսության համար, հակառակը, շոգեքարշի դեր պետք է ունենա»,- նշեց  Թաթուլ Մանասերյանը:

Տնտեսագետը մտահոգիչ համարեց նաև այն, որ չնայած կառավարության փոփոխությանը, գործելաոճի փոփոխությունները դեռ ամենուր տեղ չեն հասել:

«Սա է պատճառը, որ ՀՀ վարչապետի՝ իր աշխատանքի 100 օրն ամփոփոխ ասուլիսում հնչած բազմաթիվ դրույթները կարելի է գնահատել որպես վարչապետի  գործունեության, բայց ոչ կառավարության գործունեության հաշվետվություն: Ես կհորդորեի, որ Կառավարության անդամները գոնե եռամսյակը մեկ հանրությանը ներկայացնեն իրենց կատարած աշխատանքը»,- ասաց տնտեսագետը:

Նրա խոսքերով՝ կառավարությունում պետք է լինի թիմային աշխատանք: Ըստ նրա՝ գրեթե բոլոր վարչապետներն ունեցել են անթաքույց ձգտում՝ առողջացնելու, զարգացնելու տնտեսությունը, սակայն թիմային աշխատանք չի եղել:

«Եթե վերին օղակներում՝ նախարարների մակարդակով կան մարդիկ, որոնք վայելում են վարչապետի կամ նախագահի վստահությունը, նաև հանրության մոտ դրական տպավորություն են թողնում, ապա դրանից ներքև՝ կադրային քաղաքականությունում  կան բավականին լուրջ խնդիրներ: Ոչ միայն ներկայիս, այլև նախկին վարչապետների հռչակած նպատակները գոնե ժամանակին չեն կատարվել, քանի որ միջին օղակներում նստած են մարդիկ, որոնք կարող ենք հաջողությամբ չեզոքացնել այդ դրական միտումները: Դա շարունակվում է նաև այսօր»,- ընդգծեց Թաթուլ Մանասերյանը՝ հավելելով, որ պետք է գերատեսչություններում օպտիմալացումն անել շատ զգույշ:

Ըստ նրա` գերատեսչություններում կան իրենց աշխատավարձը չվաստակող մեծ թվով չինովնիկներ:

«Չեմ կարծում, որ կառավարման ապարատի առնվազն կեսն այսօր իրենց տեղերում են գտնվում, ավելին, կան մեկ-երկու նախարարություններ, որոնց գործունեությունը  բացարձակ իմաստազուրկ է: Օպտիմալացման գործընթացը պետք է այնպես արվի, որ չվնասի արհետավարժ մարդկանց»,- նշեց տնտեսագետը՝ ավելացնելով, որ որքան բարձր է կառավարման համակարգի արդյունավետությունը, այնքան տնտեսությունը շահում է և հակառակը: