Ձեր վստահելի աղբյուրը

Վերակազմյալ Սոցիալ-դեմոկրատ Հնչակյան կուսակցությունը ընտրություններին մասնակցելու հետ կապված առայժմ որևէ ծրագիր չունի։ Այդ մասին այսօր Panorama.am-ին տեղեկացրեց վերակազմյալ ՍԴՀԿ-ի նախագահ, ԱԺ պատգամավոր Լյուդմիլա Սարգսյանը։

Հարցին, թե հնարավո՞ր է չմասնակցեն խորհրդարանական ընտրություններին, Սարգսյանը պատասխանեց. «Իհարկե, հնարավոր է»։

Մյուս հարցին, թե արդյոք Սարգսյանը շփում ունեցե՞լ է Գագիկ Ծառուկյանի հետ և փորձե՞լ է ընդգրկվել նրա կողմից ղեկավարվելիք դաշինքում, Լյուդմիլա Սարգսյանը պատասխանեց. «Դուք այնպիսի հարց եք տալիս, որին չեմ ցանկանում պատասխանել։ Ի՞նչ կարևոր է շփվել եմ, թե չեմ շփվել»։

Իր ղեկավարած կուսակցության քաղաքական ապագայի մասին հարցին ի պատասխան տիկին Սարգսյանն ասաց, որ ինքը «բավականաչափ ժամանակ» ունի մտածելու։

Դիտարկմանը, թե փետրվարի 16-ին ավարտվում է առաջադրումների ժամկետը, Սարգսյանը պատասխանեց. «Դե հիմա, վաղն առաջադրումներն ավարտվում են, բայց կյանքը դրանով չի ավարտվում։ Եթե չի ստացվի, չենք մասնակցի ընտրություններին ու կշարունակենք ապրել»։

Անդրադառնալով Սոցիալ-դեմոկրատ Հնչակյան կուսակցության՝ «Ծառուկյան» դաշինքից հեռանալուն, Լյուդմիլա Սարգսյանը նկատեց, որ անհամաձայնություն վաղուց եղել է ու կա անհանդուրժողականություն երկու կուսակցությունների թևերի միջև։

«Իմ կողմից դա շատ բնական է, քանի որ արհեստական կերպով ու ապօրինի ճանապարհով ինձանից խլեցին ՍԴՀԿ-ն։ Շատ բնական է, որ իմ կողմից նրանց նկատմամբ կա անհանդուրժողականություն», -հավելեց տիկին Սարգսյանը։

Նրա խոսքով, երկու թևի բաժանված ուժերի՝ միմյանց նկատմամբ անհանդուրժողականությունը չի խանգարում իրենց քաղաքական ուղուն, քանզի իրենք իրենց գործողություններով ու ծրագրերով չեն խաչվել երբևէ։

Հետաքրքրվեցինք, թե ինքը՝ Սարգսյանը չէ՞ր ցանկավա ընդգրկված լինել Ծառուկյանի ղեկավարելիք դաշինքում, վերակազմյալների ղեկավարը պատասխանեց.

«Նախ, որպես այդպիսին, դաշինք չկա։ Իսկ ցանկություն բնականաբար, եղել է, որովհետև մենք մի քանի տարի համագործակցել ենք «Բարգավաճ Հայաստան» կուսակցության հետ ու բնականաբար, մեզ համար նախընտրելի էր հենց այդ դաշինքը ու համագործակցությունը Գագիկ Ծառուկյանի հետ»։

Ինչ վերաբերում է հայ Ազգային կոնգրես կուսակցության հետ համագործակցության եզրերին, Լյուդմիլա Սարգսյանը նկատեց, որ այս պահին ոչ համագործակցության եզր կա և ոչ էլ առաջարկ համագործակցելու մասին։

Այսօր ՍԴՀԿ ատենապետ Նարեկ Գալստյանը Ծառուկյան դաշինքում կատարվածի մեջ մեղադրել էր Նաիրա Զոհրաբյանին՝ նշելով, որ  ՍԴՀԿ-ի վերաբերյալ մամուլում եղած «բոլոր կեղտոտ» հրապարակումների հետևում կանգնած է եղել Զոհրաբյանը: 

«Իմ կարծիքով, դա բացարձակ անհեթեթություն է, որովհետև այնտեղ որոշումներ կայացնողը Գագիկ Ծառուկյանն է և որևէ մեկը չի կարող նրա որոշումների վրա ազդել։ Ես դա գիտեմ խոհանոցից։ Այնպես որ համարում եմ, որ նման հայտարարություններ անելը անբարոյականություն է, որովհետև եթե ինչ-որ բան չի ստացվել, չի կարելի հրապարակավ նման բաներ ասել ու մեղադրանքներ ներկայացնել։ Դա ես աբիժնիկություն եմ համարում։ Ես էլ կարող էի շատ բաներ վեր կենալ, հայտարարել, չէ՞ որ ինձ մոտ էլ չստացվեց, բայց ես նման բան չարեցի», -Գալստյանի հայտարարության առնչությամբ ասաց Լյուդմիլա Սարգսյանը։

Դիտարկմանը, թե փաստորեն պատգամավորի քաղաքական ճակատագիրը առկախված վիճակում է, Լյուդմիլա Սարգսյանը ժպտալով արձագանքեց. «Այո, ես առկախված վիճակում եմ, բայց դրա մեջ ոչ մի ողբերգություն չեմ տեսնում»։