Չեմ կարծում, որ «Ծառուկյան» դաշինքը արմատական ընդդիմադիր է. Շարմազանով
«Չեմ կարծում, որ «Ծառուկյան» դաշինքը արմատական ընդդիմադիր է: Մեր քաղաքացիներից շատերը, այդ թվում՝ միգուցե դաշինքում ընդգրկված որոշ գործիչներ այդ դաշինքը ընդդիմադիր չեն համարում»,- այս մասին այսօր ՀՀԿ Գործադիր մարմնի նիստից հետո լրագրողների հետ զրույցում ասաց ՀՀԿ խոսնակ Էդուարդ Շարմազանովը:
Հարցին, թե Գագիկ Ծառուկյանը հայտարարել է՝ եթե իրենց նախընտրական ծրագրի 15 կետերը կատարեն, համաձայն է կոալիցիա կազմել, Էդուարդ Շարմազանովն ասաց. «Հայաստանի Հանրապետական կուսակցությունը որևէ կուսակցության հետ, բացառությամբ ՀՅԴ-ի, որի հետ այս պահին գտնվում է կոալիցիայում, հետընտրական զարգացումների հարց չի քննարկել, այդ թվում՝ «Ծառուկյան» դաշինքի: Ինչ վերաբերում է ապագայում կկազմե՞նք, թե՞ ոչ, ամեն ինչ ցույց կտան ապրիլի 2-ի արդյունքները»:
Էդուարդ Շարմազանովի խոսքերով՝ ընտրություններից հետո նախ կֆիքսեն, թե ո՞ր ուժերն են իրավունք ձեռք բերել ունենալ խմբակցություններ նոր խորհրդարանում, երկրորդ՝ կա՞ ուժ, որը կարող է միայնակ կազմել կառավարություն:
«Կոալիցիան ինքնանատակ չի լինելու: Բոլոր կոալիցիաների, մանավանդ խորհրդարանական կառավարման համակարգում, հիմքը պետք է լինի ընդհանուր ծրագրային տեսլականը: ՀՀԿ-ն առանց ընդհանուր ծրագրային տեսլականի, առանց գաղափարական հիմքի, չի պատրաստվում որևէ ուժի հետ կոալիցիա կազմել»,- նշեց ՀՀԿ խոսնակը՝ միաժամանակ հավելելով, որ եթե կոալիցիայի պահանջը լինի, քննարկումներ կանեն:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ