Ուրիշներն ասում են՝ գալու ենք փոփոխություն անենք, մենք արդեն անում ենք այդ փոփոխությունը. Աղվան Վարդանյան
«Այսօր Դաշնակցությունը ճիշտ իր տեղում է՝ մեր ժողովրդի Ազատության հրապարակում: Մեր դրոշին, որ մեր պատիվն է, գրված է՝ Ազատություն: Միայն ազատ քաղաքացին կարող է ուժեղ, ազատ երկիր ունենալ, արժանավայել կյանքով ապրել»,- այս մասին այսօր Ազատության հրապարակում տեղի ունեցած ՀՅԴ-ի հանրահավաքի ժամանակ հայտարարեց ՀՅԴ Գերագույն մարմնի ներկայացուցիչ Աղվան Վարդանյանը:
Նրա խոսքերով, իրենք այստեղ են՝ պաշտպանելու յուրաքանչյուր հայ մարդու ազատ ապրելու, ազատ ընտրություն կատարելու իրավունքը:
«Այդ իրավունքի վրա բռնացողները, սակարկության առարկա դարձնողները մեր տեսակի, հայ ինքնության հետ կապ չունեն: Քաղաքական ուժի չափանիշը փողը կամ իշխանական լծակները չեն: Իրական քաղաքական ուժի հատկանիշը կենսագրությունն է, սկզբունքայնությունը, ինքնուրույնությունը, հավատարմությունը նպատակներին, ինչպես նաև հետևողական աշխատանքը՝ իր երկրի ու ժողովրդի ապագայի հանդեպ վստահ լավատեսությամբ աշխատանքը»,- ասաց Աղվան Վարդանյանը:
Նա նշեց, որ չարությամբ, ատելությամբ, հուսահատությամբ ոչ մի գործ չի արվում:
«Հիմա ընտրություն է: Մեզ համար՝ նոր սկզբի, արդար Հայաստանի ընտրություն: Արդարությունը հիմքերի հիմքն է՝ հայ տեսակի բնույթը, էությունը: Միայն արդարությամբ խաղաղ, անվտանգ, զարգացող, ուժեղ, բարեկեցիկ, ազատ Հայաստան կունենանք: Այդպիսի Հայաստան մենք ստեղծելու ենք: Ստեղծելու ենք՝ հավատալով հայ մարդուն, հավատալով Հայաստանին, գործելով պատասխանատվությամբ: Մե՛ր կամքով, մե՛ր վճռականությամբ, ծառայությամբ: Ազգային-պետական մտածողություն ունեցող, մեր այս վիճակով մտահոգ, գիտակից, ինքն իրեն հարգող, երիտասարդ, հոգում հայրենիք ունեցող մեր քաղաքացիներին ապավինած, նրանց կողքին կանգնելով»,- նշեց Աղվան Վարդանյանը՝ հավելելով, որ թե սուտ է, թե նրանք քիչ են և ավելացրեց. «Փողատերերի, իշխանությամբ նվաստացնողների, ամբոխավարությամբ խաբել փորձողների պատկերացումով են նրանք քիչ: Մեզ համար՝ Դաշնակցության համար մեր ժողովրդի բացարձակ գերակշիռ մասը հենց այդպիսին է»:
Ուստի, ըստ նրա, իրենց խնդիրն է այդ հարյուր հազարներին իրենց արժանի իշխանությունը տալ: Դրա համար, ինչպես նշեց Աղվան Վարդանյանը, մտածողության, հոգեբանության փոփոխություն է պետք, որ արդեն սկսել են:
«Ուրիշներն ասում են՝ գալու ենք փոփոխություն անենք, մենք արդեն անում ենք այդ փոփոխությունը: Կա դրված նպատակ, գծված են ուղղությունները, առաջին արդյունքները նկատելի են: Ով կհավատա, կմասնակցի, մի քար կդնի, նա կմոտեցնի իր, իր ընտանիքի, իր երկրի բարեկեցությունը, իրականություն կդարձնի համերաշխ հասարակություն ունենալու բոլորիս երազանքը»,- հայտարարեց Աղվան Վարդանյանը՝ հավելելով, որ կարևորը ազատ կամքով կատարված ընտրությունն է և այդպիսի ընտրությամբ է մեր երկրում, մեր մեջ որակ փոխվելու:
«Մեր օրակարգը հայկականության օրակարգն է: Այսօր այն դարձրել ենք, դարձնում ենք անկախ պետականության օրակարգ: Ով մեզ հետ է, ով հավատում է ինքն իրեն, ով իր երեխաների ապագան տեսնում է հայրենիքում, նա ապրելու է ուժեղ, ինքնուրույն, արդար Հայաստանում: Միասին մենք այդ անելու ենք: Դաշնակցության գաղափարները միևնույն է կյանք են դառնալու: Դաշնակցության գաղափարները հաղթելու են, Դաշնակցությունը ազգային մշակույթի, արժանապատիվ մարդու, արժանապատիվ խաղաղության, արժանապատիվ աշխատանքի կուսակցություն է: Իրական կուսակցություն է»,- եզրափակելով խոսքն՝ ասաց Աղվան Վարդանյանը:
Հարակից հրապարակումներ`
- ՀՅԴ-ն լոկ շարքային քաղաքական կուսակցություն չէ. Ազատության հրապարակում ՀՅԴ-ի եզրափակիչ հանրահավաքն է
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ