Հայաստանի արտահանման ապահովագրական գործակալությունը այս տարի մտադիր է ապահովել պորտֆելի շուրջ 50 տոկոսանոց աճ
«Հայաստանի արտահանման ապահովագրական գործակալություն» ԱՓԲԸ գործադիր տնօրեն Վազգեն Աբգարյանն այսօր լրագրողների հետ հանդիպման ժամանակ ներկայացրել է գործակալության գործունեության արդյունքները, հիմնադրման օրվանից արված աշխատանքները:
Գործակալությունը, որը հիմնադրվել է 2013թ.-ին ՀՀ կառավարության որոշմամբ, որպես արտահանման խթանման արդյունավետ գործիքակազմ և ունենալով 100 տոկոս պետական մասնակցություն՝ հայկական ապահովագրական շուկայում միակն է, որը ՀՀ ռեզիդենտ արտահանողներին առաջարկում է ծառայություններ՝ ուղղված արտահանման հետ կապված չվճարման վնասների նվազեցմանը և անգրավ ֆինանսավորման ռեսուրսների հասանելիության ապահովմանը, ինչպես ապրանքի արտադրության, այնպես էլ հետարտահանումային փուլերում:
Գործակալությունը ստեղծման օրվանից առ այսօր մատուցում է ապահովագրական ծառայություն, որը պաշտպանում է արտահանողներին՝ մատակարարված ապրանքների եւ/կամ մատուցված ծառայությունների դիմաց գնորդների կողմից չվճարման ռիսկերից և հնարավորություն է ստեղծում հետվճարման պայմանով մատակարարված ապրանքների եւ/կամ մատուցված ծառայությունների գումարը՝ անգրավ, կարճաժամկետ վարկի կամ ֆակտորինգի տեսքով ստանալ նախապես՝ մինչև գնորդի վճարումը: Այս գործիքով լայն հնարավորություններ են ստեղծվում նաև արտարժութային ռիսկերի կառավարման համար։
Ընկերությունն արտահանման խթանման գործիքակազմը ընդլայնելու նպատակով 2016 թվականից մատուցում է նաև «Նախաարտահանման ֆինանսավորման ապահովագրություն», որի խնդիրն է արտահանողների համար ապրանքի արտադրության փուլում շրջանառու կապիտալի ֆինանսավորման հնարավորությունների ստեղծումը: Տվյալ ծառայությունն արտահանողներին հնարավորություն է ընձեռում արտադրության փուլում բանկերից և ՈՒՎԿ-ներից ստանալ ֆինանսավորում, վերջիններիս գրավի փոխարեն առաջարկելով ՀԱԱԳ վկայագիր: Ֆինանսավորումը կարող է ուղղվել արտահանման պայմանագրի կատարման համար հումքի եւ նյութերի ձեռքբերման, մաքսային, տրանսպորտային, փաթեթավորման եւ արտադրանքը շուկայական տեսքի բերելու համար իրականացվող ծախսերի ֆինանսավորման ուղղություններով:
2016 թվականի ընթացքում Գործակալության կողմից հաստատվել են 4,037,939,657 ՀՀ դրամի ապահովագրական սահմանաչափեր՝ նախորդ տարվա նույն ժամանակահատվածի նկատմամբ աճը կազմել է շուրջ 286%։ Կնքվել են թվով 116 ապահովագրության պայմանագրեր, որոնց ընդհանուր ապահովագրական գումարը արտահայտված ՀՀ դրամով կազմել է 2,185,616,559՝ նախորդ տարվա նույն ժամանակահատվածի նկատմամբ աճը կազմել է շուրջ 463%։
2017 թվականի 1-ին եռամսյակի ընթացքում Գործակալության կողմից հաստատվել են ապահովագրական սահմանաչափեր, որոնց ընդհանուր արժեքն արտահայտված ՀՀ դրամով կազմել է 957,646,290՝ նախորդ տարվա նույն ժամանակահատվածի նկատմամբ աճը կազմել է շուրջ 75%։ Կնքվել են ապահովագրության պայմանագրեր, որոնց ընդհանուր ապահովագրական գումարը արտահայտված ՀՀ դրամով կազմել է 580,243,018՝ նախորդ տարվա նույն ժամանակահատվածի նկատմամբ աճը կազմել է շուրջ 372%։
Նախորդ տարվա ընթացքում Ընկերություն ներդրվել է ապահովագրական ռիսկերի գնահատման և ստանձնման նոր մեթոդ, որը 2017 թվականի հունվարի 1-ից թույլ է տալիս դիտարկել նաև այն տնտեսվարող սուբյեկտների դիմումները, որոնց գնորդ կազմակերպությունների ֆինանսական հաշվետվությունները բաց աղբյուրներից հասանելի չեն կամ որոնք արտահանում են անմիջապես իրենց հետ փոխկապակցված ընկերություններին:
Ընկերությունն իր գործունեության սկզբից անդամակցում է արտահանման ապահովագրությամբ զբաղվող միջազգային ապահովագրողների պրոֆեսիոնալ միությանը՝ Բեռնի միություն, ինչը հնարավորություն է ստեղծում Ընկերությանն իրականացնել լավագույն միջազգային փորձի փոխանակում, ինչպես նաև Հայաստանի Հանրապետությունը ներկայացնել միջազգային շուկայում։ ՀԱԱԳ-ն իր գործունեության ընթացքում կնքել է համագործակցության պայմանագրեր մի շարք այլ արտահանման ապահովագրական գործակալությունների հետ, օրինակ՝ Ռուսաստանում, Բելառուսում, Չեխիայում, Չինաստանում, Իրանում և այլն:
Համագործակցության հուշագրեր է կնքվել ԳԴՀ կառավարության կողմից արտահանման և ներդրումների խթանման նպատակով մանդատ ստացած Euler Hermes և PricewaterhouseCoopers գործակալությունների կոնսորցիումի հետ, ինպես նաև իտալական SACE Spa ընկերության հետ: Այս համաձայնագրերը կարող են էական խթան հանդիսանալ նշված կառույցների ապահովագրությամբ դեպի ՀՀ տեխնոլոգիաների ներմուծման ֆինանսավորման գործընթացում։
2017 թվականին պլանավորվում է ապահովել պորտֆելի շուրջ 50 տոկոսանոց աճ, ինչպես նաև ապահովել հանրային իրազեկվածության շարունակական բարձրացում։ Որպես հավելյալ աջակցություն նոր գործարար հարաբերությունների ստեղծմանը՝ Ընկերությունը իր կայքում հրապարակել է ավել քան 1000 գնորդ կազմակերպությունների մանրամասն տվյալներ ըստ ոլորտային բաշխման, որն օգտագործելով տնտեսվարողները հնարավորություն են ստանում կնքել արտահանման նոր պայմանագրեր։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ