Նոր Կյանքի գյուղապետը հնարավոր կեղծիքների մասին հայտնել է իրավապահներին
Արարատի մարզի Նոր Կյանք համայնքի ղեկավար Գարիկ Սարգսյանն ուսումնասիրություններ է սկսել համայնքի նախկին տարիների գործունեության վերաբերյալ և մի շարք բացահայտումներ արել: Այսօր Փաստաբանների պալատում կազմակերպած մամուլի ասուլիս ժամանակ այս մասին հայտնեց համայնքապետի շահերը պաշտպանող փաստաբան Ռուստամ Բադասյանը՝ ներկայացնելով իրենց կողմից կատարված գործողությունները։
«Մենք ներկայացրել ենք երկու հաղորդում հանցագործության մասին, որոնցից մեկը կապված է համայնքապետարանում հնարավոր չարաշահումների հետ, երկրորդը՝ համայնքի մանկապարտեզում թույլ տրված խախտումների հետ»,-ասաց փաստաբանը։
Նրա խոսքով՝ ավագանու արձանագրությունները, որոնք կազմվել են 2000-ից մինչև 2016 թվականի կեսերը, ողջամիտ կասկած է առաջանում, որ կեղծված են. «Նախկին ավագանու անդամներից մի քանիսի, որոնք ներկայումս էլ շարունակում են աշխատել, 2016 թվականի նոյեմբերից հետո ավագանու արձանագրություններում դրված նրանց ստորագրությունները չեն համընկնում նախկինում դրված ստորագրությունների հետ։ Ավագանու անդամներից մեկը, որն աշխատել է նաև նախկին ավագանու կազմում, ի պատասխան փաստաբանական հարցման՝ հաստատել է այն փաստը, որ 2016 թվականի նոյեմբերից առաջ դրված մի շարք արձանագրություններում ստորագրությունն իրենը չէ»։
Անդրադառնալով մանկապարտեզին՝ Ռուստամ Բադասյանն ասաց, որ այնտեղ հայտնաբերած հնարավոր խախտումներից ամենաակնառուն այն է, որ 2013-2015 թվականների նոյեմբեր ամսին՝ ջեռուցում չունենալու պատճառով հարկադիր պարապուրդի է գնում մանկապարտեզը և չի աշխատում, սակայն աշխատավարձի ցուցակ կոչվող փաստաթղթում նշված է, որ աշխատավարձ է վճարվել և եկամտային հարկ է պահվել. «Սակայն այդ ամսվա համար եկամտային հարկի հաշվարկ չի ներկայացվել հարկային մարմնին, և կրկին մանկապարտեզի աշխատակիցներից մեկը հարցմանն ի պատասխան հաստատել է, որ այդ ամսին ինքն աշխատավարձ չի ստացել, իսկ իր անվան դիմաց դրված ստորագրությունն իր կողմից չի դրվել»։
Նա նշեց, որ այս երկու փաստերի հիման վրա ներկայացրել են հաղորդումներ՝ յուրացման և պաշտոնական լիազորություններն անցնելու պաշտոնեական կեղծիքի հոդվածներով։
«Ներկայացրել ենք նաև երկու քաղաքացիական հայց՝ այդ կազմված արձանագրություններից մեկի հիման վրա համայնքային սեփականություն հանդիսացող հողամասերը օտարվել են նախկին համայնքապետի ընտանիքի անդամներին՝ կնոջը և աղջկան։ Մենք հայցով պահանջում ենք անվավեր ճանաչել նշված գործարքը։ Այսօր արդեն տեղեկացա, որ գործը մակագրվել է դատավորին, սպասում ենք հետագա ընթացքին»։
Նախորդ տարվա հոկտեմբեր ամսից համայնքի ղեկավարի պաշտոնը ստանձնած Գարիկ Սարգսյանին ուղղված լրագրողների հարցին, թե արդյոք կարելի է ասել, որ ինքը դուրս է եկել նախկին գյուղապետի դեմ, նա պատասխանեց. «Ես դուրս չեմ եկել ինչ-որ անձանց դեմ, ես սպասարկում եմ իմ համայնքի շահերը և պատրաստ եմ մինչև վերջ գնալու և համայնքին պատճառված վնասը ետ վերադարձնելու»։
Համայնքապետը նշեց, որ այս ուսումնասիրությունները կատարել է համայքի զարգացման հնգամյա ծրագիրը ներկայացնելու ընթացքում։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ