Հմայակ Հովհաննիսյան. Զգուշացեք Լիսկան արդեն շրջում է քաղաքում
Լրագրողների հետ հանդիպմանը ԲՀԿ համամասնական ցուցակի իններորդ հորիզոնականը զբաղեցնող, Քաղաքագետների միության նախագահ Հմայակ Հովհաննիսյանը խոստացավ պատմել մի պատմություն, որը ցույց կտա իշխող ռեժիմի կողմից ցուցաբերվող անհանդուժողականությունը, «թեև խոստացել էր հանդուրժող լինել»: Նա նշեց, թե միության շենքում աննախադեպ միջոցառումներ են իրականացնում, որոնք անգամ չեն եղել Խորհրդային միության օրոք, սակայն, ըստ նրա, իշխանությունը չի թողնում մեկ ուրիշն անգամ ձեռքը վերցնի քաղաքացիական նախաձեռնությունը:
Հովհաննիսյանն ասաց, թե միության աշխատակիցներին արգելել էր խոսել միության նկատմամբ այս տարվա հունվարից կիրառվող ճնշումներից, քանի որ տոգորված էր մի նպատակի հասնելու ցանկությամբ: «Ես ճիշտ վարվեցի, քանի որ ինձ հաջողվեց անցկացնել տասներկու սեկցիոն նիստեր տարբեր ուժերի ներկայացուցիչների մասնակցությամբ»,-շարունակեց նա, ավելացնելով, որ դրանց արդյունքում ստեղծվել է աննախադեպ մի համագործակցության որակ՝ ընտրությունների վերահսկման միասնական շտաբը:
Նրա խոսքով, իրենք ճնշումների տեղի չեն տվել ու չեն տալու: Այսքան պատմությունից հետո, նա անցավ բուն թեմային: Սենիկ Ջուլհակյանը, ով ծագումով Գորիսից է, «իբր թե ներդրող ու բարերար, ով ամպագորգոռ հայտարարում է, թե պատրաստվում է փրկել Հիդրոէներգոնախագիծ ինստիտուտը», առաջարկել է վաճառել Քաղաքագետների միության զբաղեցրած տարածքը: Միության շենքի վերևի երկու հարկը զբաղեցնում է հիշյալ ինստիտուտը: Հովհաննսիյանը մերժել է, հետո պարզել, թե գաղտնի ձայնագրել է իր ողջ խոսակցությունը, «դրանից հետո սկսեց ջրհեղեղի նման մի բան, վերևից սկսեց ջուր թափվել: Ես ոստիկաններ հրավիրեցի, արձանագրվեցին վնասները»:
Ըստ Հովհաննիսյանի, մարտի քսանյոթին ստանում է գրություն, որով պահանջում են ազատել տարածքը, քանի որ կատարվում է վերանորոգում: Գրությանը կցվել է այս տարվա մարտի մեկի կառավարության որոշումը, ըստ որի ինստիտուտից օտարվել է տարածք: «Սա մեր տարածքին չի վերաբերվում, քանի որ նշվում է իմ սեփականտիրական իրավունքի մասին»,-պատմությունը շարունակեց նա:
Հովհաննիսյանը խորհրդանշական է համարում հենց մարտի մեկին նման որոշում կայացնելը, երբ այստեղ լսումներ են ընթանում: Ըստ նրա, Ջուլհակյանը հավակնություններ է ցուցաբերում ընդհանուր օգտագործման տարածքների նկատմամբ, «էս ծառն իմն է, էս սարն իմն է սկզբունքով»: Հովհաննիսյանը պարզել է, որ «Եվրոէնեգոբլոկ» անունով հոլդինգ Չեխիայում չկա, որի անունից հանդես է գալիս Ս. Ջուլհակյանը:
Հ. Հովհաննսիյանի խոսքով, Ջուլհակյանի հետևում կանգնած է Սյունիքի մարզպետ Սուրիկ Խաչատրյանը, ով Ջուլհակյանին իր սեփական տարածքներ է տրամադրել` գրավադրելու բանկերից մեկում գումար ստանալու համար: «Զգուշացեք Լիսկան արդեն շրջում է քաղաքում: Նա Երևանում է, Կենտրոնում, Ազատության հրապարակի մատույցներում: Մեր աշխատակիցները տեսել են նրան, եկել է այստեղ դրսից շոյել պատերը»,-ասաց նա: «Խայտառակ որոշում է: Ես բողոքարկելու խնդիր չունեմ այն»,-ասաց նա: