Ս.Ֆարմանյան. Կատարվածը ներկայացնել ՀՀ-ԵՄ հարաբերություններում որպես փակվող դուռ` շատ հեռու է իրականությունից
«ՀՀ-ը կարևոր նշանակություն է տալիս ԵՄ հետ համագործակցությանը, այդ համագործակցությունը պետք է հիմնված լինի համամարդկային արժեքների վրա, որոնք մենք կիսում ենք: Վստահ եմ, առաջիկայում կճշտվեն այն թիրախներն ու ուղղությունները, որոնցով կգնա այդ համագործակցությունը»,- ԱԺ-ում լրագրողների հետ հանդիպման ժամանակ հայտարարեց ՀՀ-Եվրամիություն խորհրդարանական համագործակցության հանձնաժողովի նախագահ Սամվել Ֆարմանյանը` անդրադառնալով փետրվարի 5-6-ը Ստրասբուրգում տեղի ունեցած հանձնաժողովի հերթական նիստի աշխատանքներին:
Հիշեցնենք, սա առաջին դեպքն էր, երբ Եվրամիություն-Հայաստան խորհրդարանական համագործակցությունն ավարտվում է առանց հայտարարության:
Ս.Ֆարմանյանը լրագրողներին բացատրեց, թե ինչու է այդպես ստացվել, բայց մինչ այդ փորձեց փոխանցել այն մթնոլորտը, որում ՀՀ պատվիրակությունը աշխատել է այդ նիստում. «ԵԽ-ում գործող շատ պատգամավորների մոտ իսկապես կա չհասկացվածություն` կապված ՀՀ արտաքին քաղաքականության վերջին որոշումների հետ: Այստեղ մենք, որպես օրենսդիրներ, որոշակի անելիքներ ունենք»:
Ինչ վերաբերում է այն արձագանքին, որ նիստում տեղի ունեցած իրադարձություններից հետո եղան, ապա Ս.Ֆարմանյանը շեշտեց` սկանդալային ձևակերպումներին, թե տապալվել է գործընթացը և այլն, ինքը համաձայն չէ. «Կատարվածը ձևակերպել որպես սկանդալ, ներկայացնել Հայաստան-ԵՄ հարաբերություններում որպես փակվող դուռ` շատ հեռու է իրականությունից: Մեր կողմից եղել է առաջարակությունների նախագիծ, որն աշխատանքային կարգով փոխանցվել է ԵԽ մեր գործընկերներին: Իմ գործընկերը ինձ է ներկայացրել ԼՂ հակամարտության վերաբերյալ ձևակերպումների իրենց տարբերակը` նշելով, որ դա ԵԽ քաղաքական բոլոր ուժերի կոնսոլիդացված կարծիքն է և երկրորդ, որ դա քննարկման ենթակա չի: Այդ փաստաթուղթը երկու իրավահավասար սուբյեկտների` ՀՀ ԱԺ և ԵԽ կողմից ընդունվող փաստաթուղթ է, որը պետք է ներառի երկու կողմերի մոտեցումները: Բայց իրենց կողմի ներկայացված դրույթները համարել եմ անընդունելի, ներկայացված տարբերակը ԼՂ հակամարտության խաղաղ կարգավորմանը չնպաստող, տարբեր մանիպուլյացիաների և ինտերպրետացիաների տեղ թողնող փաստաթուղթ էր»,- պարզաբանեց Ս.Ֆարմանյանը:
Նշենք, որ հանդիման ընթացքում լրագրողներին բաժանվեց Լեռնային Ղարաբաղի հակամարտության վերաբերյալ ԱԺ պատվիրակության ներկայացրած տարբերակը, ինչպես նաև ԵՄ տարբերակը:
«Ես համարում եմ, որ ՀՀ անունից արվող հայտարարությունները ոչ թե պետք է չհակասեն ՀՀ շահերին, այլև հակառակը` ներառեն Հայաստանի շահերը ամենաարդյունավետ ձևով: Պատվիրակությունը եղել է միակարծիք, որ ՀՀ շահերը առավելագույնս պետք է պաշտպանվեն, մեր բանակցությունների ընթացքում այդպես էլ արվել է»,- հավելեց նա` շեշտելով, որ դա էր ճիշտ ուղին:
Այն մեղադրանքներին, թե ինքը նման փաստաթուղթ չունենալու որոշումը միանձնյա է կայացրել , մինչդեռ պատվիրակության անդամներից շատերը այն կարծիքին էին, որ փաստաթուղթը պետք է ընդունվեր, Ս.Ֆարմանյանը նշեց.«Այո, իրավիճակը դասավորվել է այնպես, որ հանձնաժողովի նիստի երկրորդ օրը շատ քիչ ժամանակ ենք ունեցել տեքստի շուրջ համաձայնության գալու համար: Եվ տվյալ իրավիճակում ես առաջարկությամբ եմ հանդես եկել ընդմիջում վերցնել` պատվիրակության անդամների հետ ևս մեկ անգամ քննարկելու համար: Ստեղծված իրավիճակում հանձնաժողովի նախագահի պարտականությունն է իր վրա վերցնել որոշակի պատասխանատվություն և եթե հարկն է` կրել այդ պատասխանատվությունը»,- նշեց նա ու նաև ավելացրեց, որ պատրաստ է և չի խուսափում մասնագիտական նեղ քննարկումից, քանի որ վստահ է` փաստաթղթում առկա ձևակերպումները չեն բխում ՀՀ և ԼՂՀ շահերից:
Պատվիրակության ՀՅԴ-ական անդամ Աղվան Վարդանյանն իր խոսքում նշեց, որ իրականում ոչ մի ողբերգություն տեղի չի ունեցել:
«Մենք գնացել էինք այս նիստին սեպտեմբերի 3-ի հայտնի որոշումից հետո, ամբողջ հանձնաժողովի նպատակը մեկն էր` փորձել բացատրել եվրոպացի գործընկերներին իրավիճակը, Հայաստանի առկա դժվարությունները և այն, որ այո, ՄՄ-ն կատարված փաստ է, բայց մենք ուզում ենք ԵՄ հետ շարունակել հարաբերությունները: Մեր նպատակը սա էր և այս մթնոլորտում էինք աշխատում»,- նշեց նա:
Ա.Վարդանյանի խոսքով, սակայն, այդ ամենը մոռացվելու է և որոշ ժամանակ անց հիշվելու է միայն այն, որ առաջին անգամ ԵՄ-ն ու Հայաստանը չկարողացան փաստաթուղթ ստորագրել և դա տեղի է ունեցել սեպտեմբերի 3-ին հնչեցրած որոշումից հետո:
«Ես վախենում եմ, որ այս քայլով մենք կկորցնենք բարեկամներ ու ամենևին կարևոր չի, որ մայիսյան ընտրություններում նրանցից մի մասը կարող է պատգամավոր էլ չդառնալ... »,- ընդգծեց նա:
Պատվիրակության ԲՀԿ-ական պատգամավոր Ստեփան Մարգարյանն էլ իր հերթին նշեց, որ Հայաստան վերադառնալուց հետո էլ մնում է այն կարծիքին, որ փաստաթուղթը ճիշտ էր ընդունելը:
Իսկ պատգամավոր Էդմոն Մարուքյանը շեշտեց. «Ակնհայտ է, որ Եվրոպայի դուռը մեր համար դեռ փակված չէ, բայց եվրոպացիների համար այսօր պարզ չէ, թե որ ոլորտներում կարող են շարունակել համագործակցությունը մեր երկրի հետ: Ես կարծում եմ, որ մենք շատ լուրջ գործ ունենք անելու թե Հայաստանում, թե արտաքին վեկտորում` խորհրդարանական դիվանագիտության մակարդակում»:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան