Ոչ արդար ընտրությունների մասին է պետք խոսալ, թե չէ` դեմ ենք սրան, կուտակայինին, եսիմ ինչ. Տ.Կարապետյան
«Որևէ լավ բան ժողովրդի համար ես չեմ ակնկալում, որովհետև ժողովուրդը կապ չունի այն ամենի հետ, ինչ վերջին շրջանում տեղի ունեցավ, ժողովուրդը չի արել հեղափոխությունները. դա արել է իշխանավորը` պայմանավորվել է ինքն իր մեջ, առանց ժողովրդին տեղյակ պահելու, կուլիսներից դուրս»,- լրագրողների հետ հանդիպմանը հայտարարեց «Ժողովրդական» կուսակցության նախագահ Տիգրան Կարապետյանը:
Նրա խոսքով, երկրի ներքաղաքական կյանքում տիրում է այն տրամադրությունը, որ նախագահը երեք տարիներն էլ անփորձանք իշխի ու անփորձանք հեռանա և բոլոր փոփոխությունների տրամաբանությունը հենց սրա մեջ է:
Անդրադառնալով վարչապետ Հովիկ Աբրահամյանի նշանակմանը, Տ.Կարապետյանը հիշեցրեց, որ վերջինս եղել է ՀՀ փոխվարչապետ, բացի դա տարիներ շարունակ եղել է ՀՀԿ նախընտրական շտաբի ղեկավարը, որը միշտ կեղծել է ընտրություններ: Այնպես որ, հավելեց միտքը կուսակցապետը, որևէ լավ բան սպասել ժողովրդի համար ամենևին էլ պետք չէ:
«Ես կզգուշանայի մտածել, որ լավ բան կանեն ժողովրդի համար, ոչ մի բան էլ չեն անի: Իրենց համար` այո, ճանապարհներ են հարթվում, միավորվում են, բլոկեր են կազմում: Ամեն ինչ ասում են ժողովրդի անունից, բայց ժողովուրդը ընդհանրապես կապ չունի` ի՞նչ է ժողովուրդը տեսել իրենցից, որ այսօր էլ տեսնի՞» ,- նշեց նա:
Ավելացրեց նաև, որ անկախ նրանից Հ.Աբրահամյանը կշարունակի նախկին վարչապետի քաղաքականությունը, թե ոչ` դեպի լավը փոփոխություններ նա չի ակնկալում. «Ի՞նչ, կսկսեն կիսվե՞լ, իրենց փողերը բաժանեն ժողովրդի՞ն, դա եք ակնկալում»:
Տ.Կարապետյանը թերահավատորեն է վերաբերվում քաղաքացիական հասարակության զարգացմանն ու գործողություններին: Բանախոսը նշեց, որ եթե տարիներ առաջ հանրահավաքներին 300-500 հազար մարդ էր հավաքվում ու ոչինչ չփոխվեց, ապա այսօր էլ չի փոխվի:
«Հիմա պիտի փոխվի, որ ասենք ասում են դեմ ենք: Ինչի՞ն են դեմ: Իշխանավորին ձեռք է տալիս, որ ինչ-որ խնդրի դեմ են, հիմա ես էլ կարող եմ ասել` դեմ եմ, բայց դրանից իշխանավորը կուրախանա, որովհետև մանրացնում ենք խնդիրը: Այստեղ խնդիրը այլ է. իշխանությունն ընտրվում է միշտ ոչ արդար, կառավարում է ոչ արդար, մարդիկ մտածում են սեփական հարստացման մասին, հարստանում են, միլիարդներ են կուտակում, ժողովրդի հաշվին ու ժողովուրդը ոչ մի բան չի ստանում: Դրա մասին է պետք խոսել, ոչ թե` դեմ ենք սրան, կուտակայինին, եսիմ ինչ….»,- կիսանյարդայնացած թվարկեց նա:
Ճշտող հարցին` կուտակայինը, փաստորեն, մանր խնդիր է համարում արձագանքեց. «Ոչ թե մանր խնդիր եմ համարում, այլ համարում եմ, որ այն շեղում է հասարակությունը: Ի վերջո դա կարդինալ հարց, խնդիր չի, որ ձերբազատվենք…. Հիմա ի՞նչ են անելու, 100 մլն փող են վերցրել, բայց դա հո հետ չե՞ն վերադարձնելու: Հեսա մի կիսամիջոց, մի բան կհնարեն, բայց ժամանակն է գնում, կյանքն է առաջ գնում»:
Ըստ Տ.Կարապետյանի հարկավոր է պայքարել սրա դեմ, բայց պայքարը պետք է լինի ժողովրդի կողմից բռնկուն, ժողովուրդը պետք է միանգամից բռնկվի, ոչ թե պայմանավորվեն` քեզ սա, ինձ սա, կարելի է միավորվել և այլն:
Իսկ թե ինչ է անելու ինքը, որպես կուսակցության առաջնորդ, Տ.Կարապետյանը նախ ասաց, որ ասուլիս է տալու, հարցերին է պատասխանելու, իսկ հետո էլ ավելացրեց, որ կուսակցության կարծիքն այն է, որ այսօր ժողովուրդը պետք է միավորվի և ոչ թե քառյակ, եռյակը և պետք է լինի ազգային ճակատ, որը մինչ օրս չկա:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին