ԱՄՆ-Ռուսաստան՝ փոխադարձ մեղադրանքներ, ուժգնացող հռետորաբանություն
Ռուսաստանի արտգործնախարարությունը շարունակում է սուր արձագանքների տեղատարափը եվրոպական երկրների և Միացյալ Նահանգների հասցեին՝ նրանց կողմից ուկրաինական ճգնաժամի առնչությամբ Ռուսաստանին ուղղված հայտարարությունների ու գործողությունների կապակցությամբ։
Այս անգամ ԱԳ գերատեսչությունը ԱՄՆ-ին մեղադրում է իր արտաքին քաղաքականությունը «բացահայտ ստի վրա կառուցելու» համար։
«Դատելով Ռուսաստանի նկատմամբ չթուլացող հերյուրանքների արշավից, որը կազմակերպվում է Միացյալ Նահանգների վարչակազմի կողմից, փաստում ենք, որ ԱՄՆ-ն իր արտաքին քաղաքականության հարցերում գնալով ավելի շատ է սկսում հիմնվել բացահայտ ստի վրա։ Բավական է տեսնել ԱՄՆ նախագահ Բարաք Օբամայի մամուլի քարտուղար Ջոզ Էրնստի հայտարարությունները, որոնք ուղղակիորեն մեղադրում են մեր երկրին Ուկրաինայի տարածքում «Մալազիական ավիաուղիներին» պատկանող օդանավի կործանման համար», - ասված է ԱԳ հայտարարության մեջ, որը վկայակոչում է «Ռիա Նովոստի» գործակալությունը։
Նշենք, նախօրեին Սպիտակ Տան պաշտոնական ներկայացուցիչ Ջոզ Էրնստը օդանավի կործանման համար ուղղակիորեն մեղադրել էր Ռուսաստանին, ավելի կոնկրետ՝ ՌԴ նախագահ Վլադիմիր Պուտինին։
«Մենք գիտենք, որ օդանավը խփվել է ցամաքից արձակված հրթիռով։ Այն խփվել է անջատողականների կողմից վերահսկվող տարածքից, որտեղ ուկրաինական հակաօդային պաշտպանության համակարգերը չեն գործում։ Այդ իսկ պատճառով մենք եկել ենք այն եզրակացությանը, որ Վլադիմիր Պուտինն ու ռուսներն են մեղավոր այդ ողբերգության համար», - ասել էր Էրնստը։
Ռուսաստանի ԱԳ գերատեսչությունն այս առնչությամբ հանդիմանում է Սպիտակ տանը` իրականությունը «համարժեք չընկալելու» և իր «եզրակացություներում փաստերի ու ապացույցների իսպառ բացակայության մեջ»:
«Վաշինգտոնյան վարչախումբը իր եզրահանգումներում հիմվում է իրականությանը չհամապատասխանող հակառուսական վարկածների վրա, որոնք հավաքվում են համացանցում։ Թե ովքեր են համացանցը լցնում նման աղբով՝ պարզ է՝ նույն Վաշինգտոնը և հավանաբար Կիևը», - ասված է հայտարարությունում։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
