ԼՂՀ Ազգային ժողովում անցկացվել են խորհրդարանական լսումներ
ԼՂՀ Ազգային ժողովում այսօր անց են կացվել խորհրդարանական լսումներ՝ նոր ընտրական օրենսգրքի նախագծի շուրջ: Լսումներին մասնակցել են օրենսդիր և գործադիր իշխանությունների, արտախորհրդարանական քաղաքական կուսակցությունների, կենտրոնական ընտրական հանձնաժողովի ներկայացուցիչները, ՀՀ ԱԺ պետական-իրավական հարցերի մշտական հանձնաժողովի
անդամները, ՀՀ և ԼՂՀ ԿԸՀ նախագահներ Տիգրան Մուկուչյանը և Սրբուհի Արզումանյանը: Այս մասին հայտնում են ԼՂՀ ԱԺ մամլո ծառայությունից:
Խորհրդարանական լսումները վարել են ԼՂՀ և ՀՀ ԱԺ պետական-իրավական հարցերի մշտական հանձնաժողովների նախագահներ Գ.Պետրոսյանը և Հ.Սահակյանը: Հանդիպման մասնակիցներին ողջունել ու ազատ քննարկումների կոչ է արել ԼՂՀ ԱԺ նախագահ
Աշոտ Ղուլյանը:
ԼՂՀ ԿԸՀ նախագահ Սրբուհի Արզումանյանը ներկայացրել է ընտրական օրենսգրքի նոր նախագծով նախատեսվող փոփոխությունների հիմնական ուղղությունները, որոնք վերաբերում են ընտրական գործընթացների ժամանակացույցերի, հանձնաժողովների
աշխատանքների կազմակերպման, ընտրագրավների, նախընտրական քարոզչությունների սահմանափակումների, բողոքարկման համակարգի, խորհրդարանական և ՏԻՄ ընտրությունների հետ կապված հարցերին։
Լսվել են խորհրդարանական և արտախորհրդարանական քաղաքական ուժերի տեսակետներն ու առաջարկություններն ընտրական նոր օրենսգրքով նախատեսվող մի շարք հարցերի շուրջ: Քննարկվող նախագծի վերաբերյալ իրենց տեսակետներն են արտահայտել նաև ՀՀ ԿԸՀ նախագահը, ԱԺ պատգամավորներ:
Ամփոփելով խորհրդարանկան լսումների արդյունքները՝ ԼՂՀ ԱԺ նախագահ Աշոտ Ղուլյանը կարևորել է նման քննարկումները, ինչը թույլ կտա քաղաքական համաձայնության պայմաններում ընդունել ընտրական նոր օրենսգիրքը, որը կնպաստի ԼՂՀ-ում հերթական ազատ և ժողովրդավարական ընտրությունների անցկացմանը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ