Երկրի ներսում անջատողականության հետ բախվող Չինաստանը զգուշավոր է Ղրիմի հարցում
Չինաստանի ԱԳՆ-ի պաշտոնական ներկայացուցիչ Խուա Չունինը նախօրեին հայտարարել է, որ Չինաստանի դիրքորոշումը Ղրիմը Ռուսաստանին միանալու և ուկրաինական ճգնաժամը կարգավորելու հետ կապված մնում է անփոփոխ: Ղրիմը Ռուսաստանին միանալուց հետո պաշտոնական Պեկինը հայտարարել էր, որ միշտ հարգում է ինքնիշխանության և տարածքային ամբողջականության սկզբունքը: Չինաստանը չի միացել հակառուսական պատժամիջոցներին և ՄԱԿ-ի ԱԽ-ում Ղրիմի հարցով քվեարկության ընթացքում ձեռնպահ է մնացել:
Պեկինի յուրահատուկ մոտեցումը ուկրաինական ճգնաժամին
Չինաստանը չի միջամտելու Ուկրաինայի ներքին գործերին և պատրաստ է շարունակել համակողմանի փոխշահավետ երկկողմ համագործակցությունը: Այդպիսի հայտարարությամբ է հանդես եկել Չինաստանի ԱԳՆ-ի պաշտոնական ներկայացուցիչ Խուա Չունինը:
Նա նշել է, որ չինական կողմը հարգում է ուկրաինական ժողովրդի ընտրությունը, որն իրականացվել է երկրում ձևավորված յուրահատուկ իրավիճակի հետևանքով և իրենք Ուկրաինային դիտարկում են որպես կարևոր ռազմավարական գործընկեր:
Չինաստանի ԱԳՆ-ն ուկրաինական ճգնաժամի կարգավորումը տեսնում է միայն քաղաքական ճանապարհով, իսկ Ռուսաստանի դեմ կիրառված պատժամիջոցները կարող են վատթարացնել և խորացնել ճգնաժամը:
Երկրի ներսում ույգուրական, տիբեթական անջատողականության և վերջերս էլ Հոնկոնգում ինքնավարության ընդլայնման հետ կապված խնդիրներ ունեցող Չինաստանը զգուշանում է Ղրիմի նախադեպից՝ ժողովրդական հանրաքվեների միջոցով երկրների սահմանների փոփոխություններից և անջատոկանությունից: Պեկինը այդ պատճառով նախապատվությունը տալիս է միջազգային հարաբերություններում տարածքային ամբողջականության պահպանման սկզբունքին:
Չինաստանը չի ցանկանում կորցնել Ուկրաինան
Պեկինը սերտ առևտրա-տնտեսական և էներգետիկ կապերով կապված լինելով Ռուսաստանի հետ չի ցանկանում միանալ Արևմուտքի հակառուսական պատժամիջոցներին և վատթարացնել հարաբերությունները Մոսկվայի հետ: Մյուս կողմից, Չինաստանը չի ցանկանում ճանաչել Ղրիմի միացումը Ռուսաստանին՝ այդ դեպքում վատթարացնելով հարաբերությունները Ուկրաինայի հետ, որի հետ Պեկինը ունի լուրջ տնտեսական նախագծեր և կարող է ուկրաինական տարածքը օգտագործել որպես պլացդարմ՝ Արևելյան Եվրոպայում իր տնտեսական էքսպանսիան իրականացնելու համար:
Ուկրաինա-չինական հարաբերությունները վերջին տասնամյակների ընթացքում զարգացել են բավականին ակտիվ: 2013թ.-ին դեկտեմբերին Ուկրաինայի նախագահ Վիկտոր Յանուկովիչը պետական այցով գտնվելով Պեկինում չինական կողմի հետ ստորագրել է 20-ից ավել համաձայնագրեր: Վ. Յանուկովիչը նշել էր, որ իր այցի ընթացքում ստորագրված համաձայնագրերը թույլ կտան Ուկրաինային ներգրավել 8 միլիարդ դոլարի հասնող չինական ներդրումներ:
Դեկտեմբերյան այցի ընթացքում Չինաստանի և Ուկրաինայի միջև ստորագրվել են մի շարք համաձայնագրեր գյուղատնտեսության, էներգետիկայի, առողջապահության, զբոսաշրջության և այլ ոլորտներում համագործակցության վերաբերյալ:
Ուկրաինայի պետական վիճակագրական ծառայության տվյալներով, 2013թ.-ին երկրի ամենախոշոր առևտրային գործընկերներ են Ռուսաստանը՝ 38.2 միլիարդ դոլար, Չինաստանը՝ 10.6 միլիարդ դոլար և Գերմանիան՝ 8.4 միլիարդ դոլար: Ուկրաինան Չինաստանի հետ առևտրային հաշվեկշռում ունի 6 միլիարդ դոլարի հասնող բացասական սալդո, այսինքն, Կիևը ավելի շատ ապրանքներ է գնում Չինաստանից, քան թե վաճառում:
Ուկրաինան և Չինաստանը առևտրա-տնտեսական կապերի խորացմանը զուհագեռ զարգացնում է նաև ռազմա-տեխնիկական համագործակցությունը: Ռազմական փորձագետները նշում են, որ վերջին 20 տարվա ընթացքում Ուկրաինան Չինաստանին է վաճառել մոտ 30 ռազմական տեխնոլոգիաներ: Կիևը Պեկինին է վաճառել «Վարյագ» ավիակիրը, ինչպես նաև արդիականացնում է չինական օդուժը, չինական ուղղաթիռների շարժիչները արտադրվում են ուկրաինական ռազմաարդյունաբերական ձեռնարկություններում:
Պեկինը և Կիևը հայտարարել են, որ մոտակա տարիների ընթացքում նպատակ ունեն երկկողմ ապրանքաշրջանառությունը հասցնել 20 միլիարդ դոլարի, այդ թվում շեշտը դնելով ռազմա-տեխնիկական համագործակցության վրա:
Չինական «AVIC» ավիացիոն ընկերությունը ցանկություն է հայտնել ուկրաինական «Իվչենկո-Պրոգրես» ընկերության հետ զբաղվել ավիացիոն շարժիչների համատեղ արտադրությամբ: Այդ մասին հայտարարել է «AVIC» ավիացիոն ընկերության նախագահ Լին Ցումինը ՝ ուկրաինական ընկերության ներկայացուցիչների հետ հանդիպման ընթացքում: http://rus.newsru.ua/finance/26nov2014/kitukraina.html
Արտյոմ Բալասանով, վերլուծաբան
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին