Ձեր վստահելի աղբյուրը

«Ղարաբաղյան հակամարտության կարգավորման գործընթացում միակ ընդունելի լուծումը խաղաղ բանակցություններ են: Այլ տարբերակ չկա»,-լրագրողների հետ հանդիպման ժամանակ ասաց ՀՀ-ում ԱՄՆ արտակարգ և լիազոր դեսպան Ջոն Հեֆերնը:

Նա նշեց, որ վերջին դեպքերը ցույց տվեցին, որ ամբողջ տարածաշրջանին է անհրաժեշտ այս հակամարտության կարգավորումը:

«Ամերիկայի Միացյալ Նահանգները, մյուս միջնորդ երկրների՝ Ռուսաստանի և Ֆրանսիայի հետ ամեն ինչ անում է այս հարցի կարգավորման ուղղությամբ: Համանախագահները չեն կարող լուծում պարտադրել կողմերին, չեն էլ ասի, թե ինչ պետք է անել: Համանախագահներն այս հակամարտության լուծման հարցում միջնորդներն են: Մեր դերն այն է, որ կողմերին հորդորենք, որպեսզի քաղաքական կամք դրսևորեն, ճկուն լուծումներ, փոխզիջումներ գտնեն հակամարտության լուծման համար: Մենք շարունակելու ենք այս ուղղությամբ մեր աշխատանքը»,- ասաց դեսպանը՝ միաժամանակ ընդգծելով, որ համանախագահների նպատակն այն է, որ կողմերին պահեն բանակցային սեղանի շուրջ, երկխոսությունը շարունակվի և առաջընթաց գրանցվի:

Ինչ վերաբերում է հրադադարի ռեժիմի խախտումներից հետո միջնորդների հայտարարություններին, որոնք մշտապես երկու կողմերին ուղղված հորդորներ են, այլ ոչ թե հասցեական, Ջ. Հեֆերն ասաց, որ այդ հայտարարությունները մշտապես լինում են շատ ազդեցիկ, կոչ են անում վերջ տալ բռնությանը, հռետորաբանությանը, հրադադարի խախտումներին, սպառազինություններին:

«Դրանք ուղղված են լինում երկու կողմին էլ: Որպես միջնորդներ՝ իրենց դերակատարումն այդպես են զգում»,-նշեց դեսպանը: 

Պատասխանելով ԼՂՀ-ին որպես բանակցային կողմ ներգրավելու մասին հարցին, Ջ. Հեֆերնն ասաց. «Ինչպես նշեցի, միջնորդները կարող են հորդորել հանդես բերել ճկունություն, իսկ կողմերն իրենք պետք է որոշեն, թե որ ձևաչափը լավագույնս կգործի և համանախագահները կպաշտպանեն այդ մոտեցումը»: