Ձեզ խորհուրդ կտամ ընդհանրապես ոտի տակ չընկնեք. Փաշինյանը՝ Շաբոյանին
«Երբ երեկ ես այստեղ հայտարարեցի, որ Հայաստանում շաքարավազի գինը 395 դրամ է, ՏՄՊՊՀ նախագահ Արտակ Շաբոյանը մինգամից հակադարձեց, թե «Երևան սիթի»-ում շաքարավազը այսօր վաճառվում է 369 դրամով: Պարոն Շաբոյան, լավ է չասացիք՝ «Երևան սիթի»՝ ամենաէժան գները տարածաշրջանում՝ գումարած 3 անվճար լավաշ, հարգելի քաղաքացիներ չմոռանաք Ձեզ հետ բերել ձեր անձնագրերը»,- այսօր Ազգային ժողովում շարունակվող ՏՄՊՊՀ տարեկան գործունեության ծրագրի քննարկման ժամանակ հայտարարեց ԱԺ պատգամավոր Նիկոլ Փաշինյանը:
Նրա խոսքով, եթե նման հայտարարություն արած լիներ Շաբոյանը, ժողովրդի առաջ ավելի անկեղծ կերևար, քանի որ նրա գործառույթները մենաշնորհը պաշտպանելն է, այլ ոչ թե հակառակը:
Ինչ վերաբերում է Հայաստանում շաքարավազի գնին ու դրա սահմանմանը, Փաշինյանը ներկայացրեց հետևյալը. «Բոլորին է հայտնի, որ շաքարավազի մոնոպոլիան և «Երևան սիթի» խանութների ցանցը պատկանում է մեկ մարդու՝ ԱԺ պատգամավոր Սամվել Ալեքսանյանին: Նա իր խանութում շաքարավազի մանրածախ գին է սահմանել 369 դրամը, բայց այդ նույն գնով նա ոչ միայն իր խանութում է վաճառում սովորական հաճախորդներին, այլև մանր ու միջին խանութներին: Այդ գինը Ալեքսանյանի համար շահութաբեր գին է, բայց մանր ու միջին խանութների համար շահութաբեր չէ, ու այս խանութները ստիպված հինգ-տասը տոկոս էլ վրադիր պետք է սահմանեն, որ կարողանան շահույթ ունենալ ու արդյունքում մինիմում 390 դրամ շաքարավազի կգ-ն են վաճառում: Սակայն այս խանութները ունեն մրցակից՝ ի դեմս «Երևան սիթի»-ի, որն ավելի էժան է վաճառում: Ի՞նչ է սա, պարոն Շաբոյան, եթե ոչ գերիշխող դիրքի չարաշահում: Հակամրցակցությունն էլ ո՞նց է լինում, պոզով-պոչո՞վ է լինում»:
Պատգամավորն իր ելույթում անդրադարձավ նաև «Քարֆուր»-ի գործունեությանը և զարմանք հայտնեց. «Այդ ոնց եղավ, որ «Քարֆուրն» ու «Երևան Սիթին» շաքարավազը վաճառում են ճիշտ և ճիշտ նույն գնով: Պարզ է՝ «Քարֆուրը» Հայաստան գալուց առաջ պարտավորվել է, որ շաքարավազ չի ներկրելու, իշխանությունն էլ պայմանավորվել են «ախպերագնով» շաքարավազ կտան «Քարֆուրին»: Սա է հենց հակամրցակցային համաձայնությունը, իսկ սրա մասին, պարոն Շաբոյան, դուք անգամ մտածելու համարձակություն չեք ունենա, որովհետև հենց սկսեք մտածել, ձեզ էս պաշտոնից ընենց կհանեն, որ դուք էլ չեք իմանա: Իսկ երեկ դուք հանդուգն ու լկտիության հետ սահմանակցող հայտարարություններ էիք թույլ տալիս պատգամավորների հասցեին: Դուք Ձեզ ինչ եք թույլ տալիս: Եթե ձեր հայտարարւթյունների շնորհիվ օլիգարխիան 50 դոլարով ձեր պարգևավճարն ավելացվելու է էս ամիս, ես ուրախ եմ ձեզ համար: Բայց անկեղծ ասած ես ձեզ հետ բանավեճ չունեմ, որովհետև դուք չափազանց փոքր ֆիգուր եք: Իմ բանավեճը ձեր քաղաքական ծնողների հետ է, այնպես որ Ձեզ խորհուրդ կտամ ընդհանրապես ոտի տակ չընկնեք»,- Շաբոյանին ասաց Փաշինյանը:
Նա շարունակեց ելույթը անդրադառնալով բանանի շուկայում տիրող մենաշնորհին, որտեղ ըստ նրա «Քեթրին» ընկերության հիմնադիր ԱՆ ԴԱՀԿ ծառայության ղեկավար Միհրան Պողոսյանը «ձեռքը դրել է բանանի շուկայի վրա ու ասում է՝ էս սարն իմն է, էս ծառն իմն է»:
«Էս ֆոնին մարդն ասում է՝ հայրենասեր եմ, նոր ծառայողներին տանում է Ծիծեռնակաբերդ շարում է, ասում է երդվեք: Էդքան հայրենասեր եք, թողեք մարդիկ Հայաստանում ապրեն, թողեք բիզնես անեն, ամեն օր գրպանները մի մտեք, թալանեք: Էդքան հայրենասեր եք, մի թողեք մարդիկ ստիպված փախնեն: Թե՞ սիրում եք այն անձանց ու հայրենասեր եք այն անձանց դեպքում, որոնք վաղուց վերածվել են մահարձանի, տապանաքարի, կամ ծայրահեղ դեպքում՝ պուլպուլակի»,-եզրափակեց ելույթը Փաշինյանը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ