Գործատուների պահանջները փոխվել են, կարևորում են ոչ թե տարիքը, այլ փորձը. մասնագետ
Ֆունդամենտալ վերլուծության մասնագետ Անաիդ Համբարձումյանն այսօր լրագրողների հետ հանդիպման ժամանակ անդրադառնալով աշխատանքի տեղավորման խնդիրներին և պահանջարկ ունեցող մասնագիտություններին, նշեց, որ Հայաստանում մեծ պահանջարկ ունեն տեղեկատվական տեխնոլոգիաների ոլորտի մասնագետները, ֆինանսական վերլուծաբաններն ու մարկետոլոգները:
Նրա խոսքերով` մեծ է նաև բանվորների, վարորդների, էքսպերտների պահանջարկը, սակայն այս մասնագիտություններով մարդիկ գործակալություններին չեն դիմում:
«Ունենք վականսիա, բայց դիմող չունենք»,- ասաց Անաիդ Համբարձումյանը:
Ինչ վերաբերում է աշխատանք փնտրողներին, ապա գործակալություններին մեծամասամբ դիմում են տնտեսագետները, մենեջերներն ու առաքիչները:
Անդրադառնալով գործազրկության ցուցանիշներին, նա նշեց, որ հստակ վերլուծություն չկա, թե Հայաստանում քանի տոկոսն է գործազուրկ, սակայն իրենց ունեցած տվյալներով այդ թիվը հասնում է 16,2 տոկոսի:
Ռեկռուտինգի մասնագետ Նաթելլա Շահնազարյանն էլ ասաց, որ շատ հաճախ աշխատանք փնտրողները միանագամից մի քանի մասնագիտությունով են փնտրում, մինչդեռ մարդը պետք է կողմնորոշվի և հստակ նշի, թե որ մասնագիտությունն է իր համար ավելի նախընտրելի: Երկրորդ խնդիրը, ըստ նրա վերաբերում է նրան, որ մարդիկ չեն կարողանում ճիշտ «ռեզյումե» կազմել:
«Հայաստանում մարդիկ չեն կարողանում կազմել իրենց ինքնակենսագրությունը, իսկ գրագետ կազմված ինքնակենսագրությունը գործի 50 տոկոսն է: Մարդը կարող է լավ մասնագետ լինել, բայց ինքնակենսագրությանը նայելով ցանկություն չես ունենում աշխատել տվալ անձի հետ»,- ասաց Ն.Շահնազարյանը:
Խոսելով գործատուների պահանջներից, նա նշեց, որ բոլորը աշխատանքային փորձով մասնագետներ են փնտրում, բայց ցանկություն ունեն կամավորների ընդունել իրենց մոտ աշխատանքի, մինչդեռ նրանք հրաժարվում են:
«Միանգամից ուզում են բարձր վարձատրվող աշխատանք գտնեն, ուզում են միանգամից մինիստր դառնան, բայց դա սխալ մոտեցում է, պետք է փորձ ձեռք բերեն, որ կարողանան հետագայում բարձր աշխատավարձով աշխատանք ունենան»,- նշեց նա:
Ինչ վերաբերում է տարիքային սահմանափակումներին, Ն.Շահնազարյանն ասաց, որ այսօր նման խնդիր չկա: Օրինակ` եթե նախկինում պահանջում էին մինչև 25 տարեկան աղջիկների, այսօր նման պահանջ չի ներկայացվում, քանի որ կարևորվում է ոչ թե տարիքը, այլ փորձը:
«Ամեն ինչ կախված է աշխատանքի բնույթից»,- ասաց Ն.Շահնազարյանը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին