Ձեր վստահելի աղբյուրը

«Ցանկացած անձի փոփոխություն չի կարող երկրում հանգեցնել բացառիկ դրական փոփոխությունների, եթե երկրում չլինեն համակարգային փոփոխություններ, եթե իշխանությունների վարած քաղաքականությունը չփոխվի, չի կարող հասարակությունը սոցիալ-տնտեսական քաղաքականության ոլորտում տեսնել առաջընթաց»,- լրագրողների հետ հանդիպման ժամանակ նման կարծիք հայտնեց ՍԴՀԿ ատենապետ Նարեկ Գալստյանը:

Ըստ նրա, թե ինչպիսին կլինի նոր վարչապետն ու կառավարությունը, պետք է դատել այն քաղաքական ու տնտեսական արդյունքներից, որոնք կգրանցվեն երկրում:

«Եթե իշխանության, ընդդիմության որոշ հատվածը շարունակի ծառայել օլիգարխներին, քաղաքացիները վաղ թե ուշ կանգնելու են սոցիալական պայթյունի առջև, որն ուղղորդվելու է ոչ թե հրաշալի քառյակի, հնգյակի կողմից, այլ այդ պահին փողոցում գտնվող քաղաքացիների կողմից»,- ասաց նա:

Ն. Գալստյանի խոսքով, նոր կառավարությունը պետք է փորձի սոցիալական լարվածությունը մեղմացնել, իսկ եթե շարունակի օլիգարխների հաղթարշավը, սոցիալական պայթյունից չի խուսափի: Հայաստանի թիվ մեկ մարտահրավերը օլիգարխների դեմ պայքարն է:

Ն. Գալստյանն ասաց, որ ՍԴՀԿ-ն շարունակում է իրեն տեսնել արդարության, օլիգարխիայի դեմ պայքարում:

«Նախաձեռնել էինք ձախ ուժերի միություն դաշինքի ստեղծում, օբյեկտիվ ու սուբյեկտիվ պատճառներով ձգձգվում է, բայց ակտիվորեն շարունակվում են կոնսուլտացիաները, սպասում ենք ձևավորմանը, դրանից հետո մեր ասելիքը կասենք նոր կառավարության մասին»,-հայտարարեց Ն. Գալստյանը: