Ձեր վստահելի աղբյուրը

ԱԺ պատգամավոր Էդմոն Մարուքյանը facebook-յան իր էջում կիսվել է իրեն անհանգստացնող մի երևույթով, որին ականատես է եղել «Զվարթնոց» օդանավակայանում:

«Ես միշտ նյարդայնանում էի, որ Երևան ժամանելիս Զվարթնոց օդանավակայանում սահմանապահներից ոմանք ռուսերեն են խոսում Հայաստան ժամանած մարդկանց հետ:

Երեկ Վիեննա-Երևան չվերթով գործուղումից վերադառնալիս սպասում էինք, որ մեր հերթը հասնի և մոտենանք անձնագրային ստուգման կետին և այդ ընթացքում մի կին սահմանապահ ծառայողի համազգեստով ռուսերեն լեզվով ցուցումներ էր տալիս հերթում սպասող և տարբեր երկրներից ժամանած մարդկանց, որոնց մի մասը հայեր չէին և ակնհայտորեն ռուսերեն չգիտեին, իսկ մյուս մասը սփյուռքահայեր էին, որոնք նույնպես ռուսերեն չգիտեին:

Կարճ պատմեմ. երբ իմ հերթը հասավ անձնագիրս ստուգման հանձնելու համար մոտեցա սահմանապահ ծառայողներից մեկին և բացատրություն պահանջեցի թե ինչու է այդ կինը ռուսերեն ցուցումներ տալիս ՀՀ պետական սահմանը հատող մարդկանց և պատասխանը հետևյալն էր. այդ կինը ազգությամբ ռուս է, իսկ սահմանապահ ծառայությունը ՀՀ-ն ՌԴ-ի հետ համատեղ է իրականացնում… Պարզվեց նաև, որ խոսքը միայն գնում է Զվարթնոց օդանավակայանի մասին, քանի որ Բագրատաշենում, Բավրայում և մյուս սահմանային անցակետերում չկա համատեղ ծառայություն: Անգամ սահմանապահներից մեկը բողոքեց, որ ռուս սահմանապահները մոտ մեկ միլիոն դրամ աշխատավարձ են ստանում ՌԴ բյուջեից, իսկ ՀՀ սահմանապահները մի քանի անգամ քիչ:

Իմ վրդովմունքը կայանում էր նրանում, որ ՀՀ պետական սահմանը հատող մարդկանց ռուսերեն լեզվով են ցուցումներ տալիս և մարդիկ տարակուսած նայում էին միմյանց` երևի մտածելով թե այս ուր ենք ժամանել Հայաստանի Հանրապետություն, թե այլ երկիր:

Վրդովմունքս հայտնելով և բացատրություն պահանջելով, պարզեցի, որ ՀՀ սահմանապահները մեր պետական սահմանը ՌԴ սահմանապահների հետ համատեղ են հսկողություն իրականացնում և դա նոր բան չէ, սակայն բազմաթիվ հարցեր ունեմ դրա հետ կապված ինչն էլ փորձելու եմ ճշտել»,- գրառել է պատգամավորը, ինչպես նաև հետգրությամբ հավելել,- «P.S. ՀՀ Սահմանադրություն. Հոդված 12. «Հայաստանի Հանրապետության պետական լեզուն հայերենն է»: