Իրականացվեց փորձնական թվային ազդանշանի հեռարձակումը
ՀՀ տրանսպորտի և կապի նախարարությունում այսօր իրականացվեց փորձնական թվային ազդանշանի հեռարձակումը:
Ինչպես նշեց ՀՀ տրանսպորտի և կապի նախարար Գագիկ Բեգլարյանը, մեր հանրապետությունում հեռուստատեսային թվային հեռարձակման գործընթացի սկիզբը համարվում է 2009 թվականը, երբ ՀՀ կառավարության որոշմամբ հաստատվեց թվային հեռարձակման հայեցակարգը: Թվայնացման պայմաններում աշխատելու իրավական հիմքերը սահմանվել են 2010-ին ընդունված «Հեռուստատեսության և ռադիոյի մասին» անցումային օրենքով, որով 2015 թվականի հուլիսի 1-ը սահմանվել է վերջնաժամկետ՝ իրավահարաբերությունների կարգավորման համար:
«Հեռուստառադիոհեռարձակման թվայնացման գործընթացում մենք առաջիններից չենք: Եվրոպական որոշ երկրներում թվայնացման աշխատանքները սկսվել են 1998-99 թվականներից, Մերձբալթիկայում ամբողջական թվայնացված հեռարձակման են անցել արդեն 2010-12 թթ-ից: Միևնույն ժամանակ, տարածաշրջանում մենք առաջ ենք որոշ երկրներից»,- ասաց Գ.Բեգլարյանը:
Նրա խոսքերով՝ Հայաստանում թվային հեռուստահեռարձակման ներդրման տեխնիկական աշխատանքները սկսվել են 2014 թվականի հունվարի 14-ից: Աշխատանքներն իրականացնում է ՀՀ տրանսպորտի և կապի նախարարության «Հայաստանի հեռուստատեսային և ռադիոհաղորդիչ ցանց» ՓԲ ընկերությունն իր հիմնական գործընկեր շվեդական «ԷՐԻՔՍՈՆ» կազմակերպության հետ: Մասնակցում են նաև համաշխարհային ճանաչում ունեցող իտալական «Թելսատ», սլովենական «Էլթի», իսպանական «Պրոմաքս» և այլ ընկերություններ:
Ծրագրի ամբողջական արժեքը կազմում է 6 միլիարդ 922 միլիոն դրամ, որից ավելի քան մեկ միլիարդ դրամ հարկերի և տուրքերի ձևով վերադարձվելու է ՀՀ պետական բյուջե: Ծրագրով նախատեսված է իրականացնել ներկայումս գործող 64 հեռարձակման հեռուստակայանների ամբողջական վերազինման, ինչպես նաև թվով 150 նոր աշտարակ-կայանների կառուցման և շահագործման աշխատանքներ:
Նշվեց նաև, որ Հայաստանը որպես թվային հեռուստահեռարձակման ստանդարտ ընդունել է եվրոպական DVB-T2 (ԴԻՎԻԲԻ- ԹԻ2) ձևաչափը, ազդանշանների սեղմման MPEG-4 (ԷՄ ՓԻ Ի ՋԻ-4) ժամանակակից ալգորիթմով:
Համակարգը իրականացվում է եվրոպական առաջավոր արտադրողների համակարգչային լուծումների, սարքերի, սարքավորումների և ծրագային ապահովման միջոցով:
Գ. Բեգլարյանը հայտնեց, որ հեռուստառադիոհեռարձակման համակարգի թվայնացման գործընթացը մտել է ավարտական փուլ. «Էրիքսոն» կազմակերպության կողմից արդեն առաքվել է պայմանագրով նախատեսված սարքավորումների 100%-ը: Առաքված սարքավորումները մաքսազերծվել են, պահեստավորվել և համապատասխան խմբաքանակներով ուղարկվում են մարզային կայաններ: Ըստ սահմանված ժամանակացույցի, ավարտվել են հանրապետական գլխամասային կայանի մոնտաժման աշխատանքները, և ներկայումս այն թեսթավորվում է «Էրիքսոնի» մասնագետների կողմից: Ավարտվել են Երևանի հեռուստակայանի հաղորդիչ անտենայի և հաղորդակների մոնտաժման աշխատանքները»:
Նա նշեց նաև, որ նախարարությունը հրավեր է ուղարկել իտալացի և սլովենացի գործընկերներին՝ Երևանի հաղորդիչ կայանի փորձնական գործարկմանը մասնակցելու համար: Գ. Բեգլարյանը հայտնեց, որ մեկնարկել է թվային հեռուստահեռարձակման փորձնական թողարկումը: Աշտարակ քաղաքում սկսվել է փորձնական թվային հեռուստահեռարձակումը, որով փորձակվում է երևանյան գլխակայանից մարզային քաղաքներում ազդանշանների հեռահաղորդումը։
«Ազդանշանի հեռահաղորդման և հեռարձակման որակը գոհացուցիչ է»,- ասաց նախարարը՝ հավելելով, որ անցումը թվային հեռարձակման ունի բազմաթիվ դրական կողմեր ինչպես երկրի, այնպես էլ հեռահաղորդող կազմակերպությունների և բնակչության համար:
Գ. Բեգլարյանը նշեց, որ թվայնացման գործընթացը պահանջում է ներդրման զգալի ծախսեր, այդ թվում նաև որոշ ծախսեր բնակչության կողմից՝ ապահովելու իրենց հեռուստացույցները թվային ընդունիչներով: Իսկ բնակչությանն օժանդակելու նպատակով Հայաստանում ընտրվել է հեռուստահեռարձակման թվայնացման շեշտված սոցիալական ուղղվածություն: Այս ծրագրով, Երևանում և մերձակա բնակավայրերում նախատեսվել և իրականացվում է թվային 18, իսկ մարզերում՝ 9 հեռուստածրագրերի անվճար հեռարձակում: Այսպիսով, մայրաքաղաքի բնակիչների համար սոցիալական փաթեթում ընդգրկված են ներկայումս հեռարձակվող բոլոր հեռուստածրագրերը՝ առանց բացառության, իսկ մարզային բնակավայրերում անվճար հեռարձակվող ծրագրերի միջին թիվը, ըստ նախատեսվածի՝ կրկնապատկվելու է:
Նախարարը հայտնեց, որ սոցիալական ծրագրով ՀՀ բնակչության անապահով շերտերի ծախսերի խնդիրը կհոգա պետությունը։
«Թվայնացումից հետո հանրապետությունում որոշ ժամանակ պահպանվելու է նաև զուգահեռ անալոգային հեռարձակումը՝ իրենց հեռուստատեսային ընդունիչներում անհրաժեշտ փոփոխությունը կատարել չհասցրած բնակիչների համար»,- ասաց Գ.Բեգլարյանը:
Նա նշեց, որ չնայած լարված ռեժիմին, աշխատանքներն ընթանում են ըստ սահմանված ժամանակացույցի, և ըստ ծրագրի, պետք է ամբողջովին ավարտվեն 2015 թվականի հուլիսի 10-ին:
«Այս վերջին փուլում մեր կողմից հատուկ կարևորվում են օրենսդրական նախաձեռնությամբ օժտված պետական մարմինների և հասարակական կազմակերպությունների բոլոր նախաձեռնությունները և կառուցողական առաջարկները: Նախարարությունը պատրաստ է իր համապատասխան կառույցներով մասնագիտական և փորձագիտական օժանդակություն մատուցելու այդ համագործակցությանը»,-ընդգծեց Գ. Բեգլարյանը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ