Ձեր վստահելի աղբյուրը

«Իրանի հայ և ասորի եկեղեցիների առաջնորդները բաց նամակ են հղել ԱՄՆ նախագահ Բարաք Օբամային»,-այդ մասին հաղորդում է իրանահայ համայնքի «ԱԼԻՔ» օրաթերթը:

Տեղեկատվության համաձայն՝ Իրանի հայ և ասորի եկեղեցիների առաջնորդները, ինչպես նաև ԻԻՀ Մեջլիսի երկու համայնքների պատգամավորները ԱՄՆ նախագահ Բարաք Օբամային բաց նամակ են հղել, որտեղ, նշել են, որ Իրանում ապրող կրոնական փոքրամասնություններն ունեն հավասար ներկայություն Իրանի օրենսդիր մարմնում, ինչպես նաև օժտված են հասարակական-համայնքային կյանքի, կրթական, կրոնական և մայրենի լեզվի ուսուցման ազատությամբ:

Անդրադառնալով Իրանի միջուկային խնդրի շուրջ ընթացող զարգացումներին՝ նամակի հեղինակները նախ ընդգծել են Իրանի հոգևոր առաջնորդի՝ զանգվածային ոչնչացման զենքի կիրառումն արգելելու մասին արձակած ֆեթվայի կարևորությունը, այնուհետև հավելել, որ Իրանը միջուկային էներգիան խաղաղ նպատակներով օգտագործելու իրավունք ունի:

«Մենք՝ հայ և ասորի եկեղեցիների առաջնորդներս, ինչպես նաև խորհրդարանում հայ և ասորի պատգամավորներս, աջակցելով Իրանի և «5+1 խմբի» միջև շարունակվող բանակցային գործընթացին, ակնկալվող դրական արդյունքները համարում ենք խաղաղության հիմնական գրավական: Միևնույն ժամանակ համոզված լինելով, որ բանակցություններից ակնկալվող արդար ելքը կարող է տարածաշրջանում հանգեցնել խաղաղության և համագործակցության մթնոլորտի, որը կարող է փոխարինել տիրող անմարդկային ագրեսիային»,-նշված է բաց նամակում:

Նկատնեք, որ Իրանի միջուկային խնդրի շուրջ Վիեննայում 7 օր տևած բանակցությունները ավարտվեցին առանց վերջնական համաձայնության: Իրանի և «5+1 խմբի» անդամ երկրների ներկայացուցիչները որոշում են կայացրել բանակցությունները երկարացնել մինչև 2015 թ. հուլիսի 1-ը (իրանական թիր ամսվա 10-ը):

Թեմայի առնչությամբ այլ հրապարակումներ՝
Ի՞նչ առաջընթաց է արձանագրվել Իրանի միջուկային խնդրի կարգավորման հարցում
Հասան Ռոհանի. Միջուկային խնդրի շուրջ ընթացող բանակցությունները հանգեցնելու են վերջնական համաձայնության
Ալի Խամենեի. ԱՄՆ-ն և եվրոպական գաղութարար երկրները չեն կարող Իրանին ծնկի բերել