«Մենք պետք է դադարեցնենք Հայոց ցեղասպանության ժխտումը»
Բրիտանական International Business Times կայքը «Հոլոքոստի հիշատակման օր 2015. մենք պետք է մեկ դար անց դադարեցնենք Օսմանյան Թուրքիայի կողմից Հայոց ցեղասպանության ժխտումը» վերնագրով հոդված է տպագրել: Հոդվածի հեղինակ Րաֆֆի Սարգսյանն անդրադարձ է կատարել այն փաստին, որ ապրիլի 24-ին Մեծ Բրիտանիան պատրաստվում է բարձր մակարդակով մասնակցել Լոնդոնում և Թուրքիայում կայանալիք միջոցառումներին, մինչդեռ այդ օրը ողջ աշխարհի հայերը հիշատակում են Հայոց ցեղասպանության զոհերին:
Հոդվածը ներկայացնում ենք որոշ կրճատումներով.
«Մեծ Բրիտանիայի վարչապետ Դևիդ Քեմերոնը հայտարարել է, որ Լոնդոնում ապրիլի 25-ին՝ Անզակի օրը, հիշատակի միջոցառում է անցկացվելու, որին բարձր մակարդակով մասնակցելու են Մեծ Բրիտանիայի, Ավստրալիայի ու Նոր Զելանդիայի ներկայցուցիչները:
Ապրիլի 24-ին Մեծ Բրիտանիան Թուրքիայում բարձր մակարդակով մասնակցելու է նաև Գալիպոլի ճակատամարտի 100-ամյակին նվիրված միջոցառմանը: Ուելսի արքայազնը ղեկավարելու է Մեծ Բրիտանիայի պատվիրակությունը: Սակայն 2015 թվականը նաև Հայոց ցեղասպանության հարյուրամյակն է` 20-րդ դարի առաջին ցեղասպանության, որը կազմակերպել և իրականացրել է երիտթուրքերի կառավարությունը Առաջին համաշխարհային պատերազմի տարիներին:
Աշխարհով մեկ սփռված հայ ժողովուրդը Ցեղասպանության օրը նշում է ամեն տարի ապրլի 24-ին: Մեծ Բրիտանիայի հայ համայնքն ամեն տարի Դաուն Սթրիթում կառավարությանը կոչ է անում պաշտոնապես ճանաչել Հայոց ցեղասպանությունը, դադարեցնել աջակցել Թուրքիայի ժխտողական քաղաքականությանը:
Ժխտողականության կոպիտ արարք էր այն, որ Թուրքիայի նախագահ Ռեջեփ Թայիփ Էրդողանը Հայաստանի նախագահ Սերժ Սարգսյանին հրավիրեց 2015 թվականի ապրիլի 24-ին մասնակցելու Գալիպոլի ճակատամարտի 100-ամյակին, մինչդեռ այդ օրը հիշատակում են Հայոց ցեղասպանության զոհերին: Սա առաջին դեպքն է, որ Գալիպոլի ճակատամարտի օրը նշվում է ապրիլի 24-ին:
Նախագահ Սարգսյանը մերժեց Էրդողանի հրավերը` հիշեցնելով, որ ամիսներ առաջ ինքն էր Թուրքիայի նախագահին հրավիրել Հայաստան` մասնակցելու Ցեղասպանության հարյուրամյակին:
Ցեղասպանագետները գտնում են, որ հայ ժողովրդի 70 տոկոսը` 1.5 մլն հայ, սպանվել է կամ զոհ է գնացել սովին, հիվանդություններին և բռնի տեղահանմանը: Կոտորածները և տարհանումները շարունակվել են 1916 թվականի ընթացքում և քիչ ինտենսիվությամբ` մինչև 1923 թվականը:
2005 թվականին Թուրքիայի վարչապետին ուղղված բաց նամակում Ցեղասպանագետների միջազգային ասոցացիան Թուրքիային պատմությանը դեմ առ դեմ կանգնելու և Հայոց ցեղասպանությունը պաշտոնապես ճանաչելու կոչ արեց:
Թուրքիան և իր դաշնակիցները շարունակում են ժխտել: Մեծ Բրիտանիայի, ԱՄՆ-ի և Իսրայելի կառավարությունները չեն գիտակցում, որ աջակցելով Թուրքիայի ժխտողական քաղաքականությանը` նրանք նպաստում են անարդարությանը: Մեծ Բրիտանիայի կառավարության պարագայում նրանք ժխտում են սեփական պատմությունը` մոռանալով, որ Առաջին համաշխարհային պատերազմի ընթացում բրիտանական կառավարությունը բացահայտել է հայերի ցեղասպանված ճակատագրի մասին ճշմարտությունը: Այսպիսով, ինչու՞ 100 տարի անց Մեծ Բրիտանիայի այժմյան կառավարությունը հրաժարվում է ճանաչել այդ ճշմարտությունը:
Հաշվի առնելով Թուրքիայում տեղի ունեցած վերջին փոփոխությունները և թուրքահայ լրագրող Հրանտ Դինքի սպանությունը` այսօր Թուրքիայում նշվում է Հայոց ցեղասպանության զոհերի հիշատակը: Թուրք մտավորականները բացահայտ խոսում են այս թեմայի շուրջ` կոչ անելով իրենց երկրի կառավարությանը փոխել ժխտողական քաղաքականությունը:
Թուրքիայի կառավարությունը պետք է հասկանա, որ 100 տարի ժխտելուց հետո ժամանակն է ճանաչել անցյալը և ընդունել, որ միլիոնավոր հայեր և այլ քրիստոնյաներ զոհ են դարձել քրիստոնյա փոքրամասնությունների «վերաբնակեցման» քաղաքականությանը: Ճշմարտությունն ընդունելով` նրանք կարող են ճանապարհ հարթել դեպի ժողովրդավարությունը և մոտենալ եվրոպական արժեքներին»,-գրում է հեղինակը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին