Ձեր վստահելի աղբյուրը

ՀՀ Ազգային ժողովի արտահերթ նիստում քննարկվում է «Հայաստանի Հանրապետության Նախագահի վարձատրության, սպասարկման և անվտանգության ապահովման մասին» Հայաստանի Հանրապետության օրենքում լրացումներ և փոփոխություն կատարելու մասին և «Պետական պաշտոններ զբաղեցրած անձանց սոցիալական երաշխիքների մասին» Հայաստանի Հանրապետության օրենքում փոփոխություններ կատարելու մասին օրենքների նախագծերը:

ՀՀ աշխատանքի և սոցիալական հարցերի նախարար Արտեմ Ասատրյանը ներկայացնելով օրենքների նախագծերի փաթեթը, նշեց, որ ներկայումս ՀՀ պաշոտնաթող նախագահի կենսաթոշակային ապահովությունն իրականացվում է 2014թ-ի հուլիսի 1-ից ուժի մտած «Պետական պաշտոններ զբաղեցրած անձանց սոցիալական երաշխիքների մասին» օրենքով, որով, ըստ նախարարի, անհավասար պայմաններ են ստեղծվել պետական պաշտոններ զբաղեցրած որոշ կատեգորիաների անձանց կենսաթոշակի չափի հաշվարկման և ՀՀ պաշտոնաթող նախագահի կենսաթոշակի չափի հաշվարկման կարգերում:

Նոր օրենով առաջարկվում է պաշտոնաթողությունից հետո ՀՀ Նախագահի համար, բացառությամբ այն դեպքերի, երբ նա պաշտոնանկ է արվում, նշանակել հատուկ կենսաթոշակ` ՀՀ Նախագահի` օրենքով սահմանված աշխատավարձի 70 տոկոսի չափով: Նախագծով ՀՀ Նախագահի` օրենքով սահմանված աշխատավարձի չափը բարձրանալու դեպքում ՀՀ պաշտոնաթող Նախագահի կենսաթոշակը համամասնորեն կվերահաշվարկվի:

Երկրորդ խնդիրը վերաբերում է նրան, որ գործող օրենսդրությամբ գրասենյակը պաշտոնաթող նախագահին տրամադրվում է իր ցանկությամբ, սակայն, մինչև 70 տարին լրանալը: Կառավարությունն առաջարկում է հանել այս ժամկետը և պաշտոնաթող նախագահին հնարավորություն տալ գրասենյակն օգտագործել ցկյանս:

Հեղինե Բիշարյանի դիտարկմանը, թե ինչու այս փոփոխությունները չեն վերաբերում նաև հանրապետության երկրորդ և երրորդ դեմքերին, Ա.Ասատրյանը պատասխանեց, որ կա ընդունված օրենք, որով սահմանված է մեկ միասնական համակարգ և մոտեցումը միասնական է եղել բոլոր պետական պաշտոն զբաղեցրած անձանց համար:

Հարցին, եթե սահմանադրական բարեփոխումներ լինեն և փոխվի նախագահի ինստիտուտի գաղափարը, ապա այդ դեպքում ինչպիսի մոտեցում է ցուցաբերվելու, Ա.Ասատրյանը նշեց, որ բացարձակ չեն նսեմացնում մյուս պաշտոնատար անձանց դերակատարումը, պարզապես այսօր գործում է «Հայաստանի Հանրապետության նախագահի վարձատրության, սպասարկման և անվտանգության ապահովման մասին» օրենք և ըստ էության այս օրենքի մեջ է վերականգնվում այդ դրույթը:

«Ժառանգություն» խմբակցության պատգամավոր Զարուհի Փոստանջյանն էլ հետաքրքրվեց, թե արդյոք պաշտոնաթող նախագահներն ունե՞ն այդ թոշակի կարիքը, հաշվի առնելով այն, որ բավական բարեկեցիկ կյանքով են ապրում: Մինչդեռ Հայաստանում ավելի քան 1 միլիոն մարդ ապրում է աղքատության մեջ, և այդ պապիկ-տատիկները ավելի կարիք ունեն կենսաթոշակի: «Հնարավո՞ր է, որ սա կապված է նրա հետ, որ երկրորդ նախագահ Ռոբերտ Քոչարյանին ուզում են թոշակի ուղարկել»,- հարցրեց Փոստանջյանը:

Արտեմ Ասատրյանը ասաց, որ պաշտոնաթող նախագահին թոշակ հատկացնելու ինստիտուտը ներդրվել է 1996 թվականից: Ներկայումս նշանակված կենսաթոշակի չափը կազմում է 320 հազ. ՀՀ դրամ:

Նախարարի խոսքերով` չպետք է այս կենսաթոշակը կապել նրանց բարեկեցիկ լինելու կամ այլ հանգամանքների հետ: «Բարեկեցիկ ու ոչ բարեկեցիկ ապրելու հետ կապված երկրում գործում են ապահովության բալեր: Սա սոցիալական ապահովության ծրագիր չէ, սա նախագահի ինստիտուտի համար է սահմանված, միայն Հայաստանում չէ ընդունված»,- նշեց նախարարը:

Ա. Ասատրյանը նաև նշեց, որ օրենքի ընդունումը պայմանավորված է առաջին նախագահի հանգամանքով, քանի որ գործող օրենքով գրասենյակը մինչև 70 տարեկանն է անհատույց հատկացվում:

Նշենք, որ հունվարի 9-ին լրացել է ՀՀ առաջին նախագահի 70 տարին: