Ձեր վստահելի աղբյուրը

ՀՀ քաղաքացիական ծառայության խորհրդում այսօր Համաշխարհային բանկի ներկայացուցիչների հետ տեղի է ունեցել աշխատանքային քննարկում «Զարգացման քաղաքականության գործառնության» (ԶՔԳ) ծրագրի երրորդ փուլից բխող` քաղաքացիական ծառայության համակարգում իրականացվող բարեփոխումների վերաբերյալ:

ՔԾԽ-ի մամուլի ծառայությունից հայտնում են, որ քննարկման հիմնական առարկան քաղծառայության համակարգը մրցունակ և գրավիչ դարձնելու, քաղաքացիական ծառայողների մոտիվացիան և աշխատանքի արտադրողականության մակարդակը բարձրացնելու նոր մեխանիզմների մշակման ուղղությամբ արված աշխատանքի ամփոփումն էր և առաջիկա անելիքների հստակեցումը:

Ներկայացվել է ՀՀ Կառավարության հետ մշակվելիք քաղաքացիական ծառայողների կատարողականի գնահատման համակարգի մասին այն հիմնական սկզբունքները կամ գաղափարները, որոնք, ՀՀ Քաղաքացիական ծառայության խորհրդի կարծիքով, կապահովեն ըստ արժանիքների՝ քաղծառայողների պարգևատումների համակարգի, կարիերային աճի կառուցակարգերի ներդաշնակ գործարկումը:

ՀՀ ՔԾԽ նախագահ Մանվել Բադալյանը շեշտել է, որ հեռանկարային նպատակը զուտ աշխատանքի կատարողականի գնահատումից դեպի քաղաքացիական ծառայողների արդյունավետության, որակական ու մասնագիտական հատկանիշների համալիր գնահատմանն անցնելն է:

Համաշխարհային բանկի պատվիրակության ղեկավար Դոնատո դե Ռոսան առանցքային է համարել քաղաքացիական ծառայողների ֆինանսական խրախուսման համար կատարողականի գնահատման համակարգի կատարելագործումը իրավական կարգավորումների ենթարկելու և այս հարցում ՀՀ Կառավարության հետ համագործակցելու անհրաժեշտությունը՝ հաշվի առնելով, որ բարեփոխումն իրականացնելը տևական ժամանակ է պահանջում:

Գործընթացի հաջողությունն ապահովելու և սահուն իրականացնելու առումով երկուստեք կարևորվել է պիլոտային ծրագրերով առաջնոդրվելու խնդիրը: