Հայկ Դեմոյանը ԱԿԲԱ-ԿՐԵԴԻՏ ԱԳՐԻԿՈԼ բանկի քայլը բարձր գնահատեց
Փարիզի քաղաքապետարանում շարունակվում է Հայոց ցեղասպանության 100-րդ տարելիցի կապակցությամբ կազմակերպված ցուցահանդեսը, որը բացվել է ապրիլի 28-ին: Լրագրողների հետ հանդիպման ժամանակ Հայոց ցեղասպանության թանգարան-ինստիտուտի տնօրեն Հայկ Դեմոյանն ասաց, որ ակնկալում են մինչև ցուցահանդեսի ավարտը՝ հուլիսի սկիզբը, ցուցահանդես կայցելի կես միլիոնից ավելի մարդ:
«Փարիզում բացված ցուցահանդեսը միջպետական նշանակություն ունեցող միջոցառում է, հպարտության արժանի քայլ էր, երևույթ: Երկու ամիս շարունակ Փարիզի քաղաքապետարանի երկու խոշոր սրահները տրամադրված են մեր ցուցադրությանը: Աշխատակիցները հավաստիացնում են, որ երբեք այս սրահներում օրական կտրվածքով այսքան մեծ թվով այցելուներ չեն եղել»,- ասաց Հ. Դեմոյանը:
Նա նշեց, որ պատմական այս ցուցադրությունը հնարավոր չէր կազմակերպել, եթե չլիներ Փարիզի քաղաքապետի բարձր պատրաստակամությունը, Ֆրանսիայում Հայաստանի դեսպանության, թանգարանի բարեկամ և բարերար Ջևան Չելոյանցի, ԱԿԲԱ-ԿՐԵԴԻՏ ԱԳՐԻԿՈԼ բանկի ցուցաբերած աջակցությունը:
«Բանկի աջակցությամբ հրատարակել են հատորներ, որոնք մեծ հաջողություն ունեցան ցուցադրության ընթացքում: Ցուցադրությունում կա գրքերի առանձին գրախանութ, մի հատված տրամադրված էր հենց այդ գրքերին: Երեք օր անց մեր տարած մեծ քանակությամբ ողջ տպաքանակը սպառված էր: Այցելուները նախընտրում էին հենց այդ գրքերը, որոնք ֆրանսերեն լեզվով առաջին անգամ էին թարգմանվել ու տպագրվել Հայաստանում»,- ասաց թանգարան-ինստիտուտի տնօրենը:
Այսօր թանգարանում տեղի ունեցավ Փարիզի և Երևանի քաղաքապետարանների և Հայոց ցեղասպանության թանգարան-ինստիտուտի համագործակցությամբ կազմակերպված ցուցադրության շրջանակներում ԱԿԲԱ-ԿՐԵԴԻՏ-ԱԳՐԻԿՈԼ բանկի ֆինանսավորմամբ ֆրանսերեն լեզվով հրատարակված գրքերի շնորհանդեսը: Դրանք են՝ Հայկ Դեմոյանի «Հայոց ցեղասպանության լուսաբանումը համաշխարհային մամուլի առաջին էջերին» պատկերազարդ հատորը, Սարգիս Թորոսյանի «Դարդանելիից մինչև Պաղեստին» սկզբնաղբյուրային հուշագրությունը, «100 լուսանկարչական պատմություններ Հայոց ցեղասպանության մասին» հատուկ նախագիծը և Ավրորա Մարդիգանյանի «Հոշոտված Հայաստան» գիրքը:
Ասուլիսին ներկա ԱԿԲԱ-ԿՐԵԴԻՏ ԱԳՐԻԿՈԼ բանկի գլխավոր գործադիր տնօրեն Հակոբ Անդրեասյանն ասաց, որ իրենք չէին կարող անմասն մնալ Հայոց ցեղասպանության 100-րդ տարելիցն նվիրված միջոցառումներից և հատկապես Փարիզի քաղաքապետարանի շենքում Հայոց ցեղասպանության թանգարան-ինտիտուտի կողմից նախաձեռնված ցուցադրությունից:
«Իրականացվող ցուցադրությունը բացառիկ էր թե իր անցկացման վայրով, թե ստացած հնչեղությամբ: Համոզված եմ, որ ցուցադրության շնորհիվ բազմաթիվ մարդիկ տեսան և իմացան, թե ինչ է իրականում կատարվել 20-րդ սկզբին: Շատ կարևոր էր Հայոց ցեղասպանության մասին նման մակարդակով բարձրաձայնելը միջազգային հանրության շրջանակներում»,- նշեց նա:
Հ. Անդրեասյանի խոսքով, իրենց համար մեծ պատասխանատվություն էր այս նախագծին միանալն ու համեստ ներդրում ունենալ այն միջոցառումներին, որոնք անցկացվում են աշխարհի տարբեր երկրներում: Նրա խոսքով, գրքերը պարունակում են հարուստ նյութեր, լուսանկարներ, որոնք խոսուն վկայություններն են այն իրադարձությունների, որոնք տեղի են ունեցել Օսմանյան Թուրքիայի տարածքում:
«Այս նախագծում ընդգրկվել են նաև մեր ֆրանսիացի բարեկամները, նրանք նույնպես հետաքրքրված էին և ակտիվ մասնակցություն են ունեցել: Կարծում եմ՝ այս տարիների ընթացքում տպագրական նման մեծ ծավալի աշխատանք չէր արվել»,- նշեց բանկի գլխավոր գործադիր տնօրենը:
Հ. Անդրեասյանի խոսքով, ուրախ կլինեն շարունակել համագործակցությունը Հայոց ցեղասպանության թանգարան-ինստիտուտի հետ. «Պատրաստ ենք ազգանվեր միոջացոռումներին մեր ակտիվ մասնակցությունը ցուցաբերել, գաղափարները ձեր կողմից լինի, ֆինանսական աջակցությունը՝ մեր: Այս թանգարանը ցանկացած հայի համար չափազանց կարևոր նշանակություն ունի»:
Հայկ Դեմոյանն իր խոսքում նշեց, որ հաճելի էր աշխատել ԱԿԲԱ-ԿՐԵԴԻՏ ԱԳՐԻԿՈԼ բանկի հետ, ամեն ինչ կատարվել է հստակ, արագ, ճիշտ ժամանակացույցով. «Լիահույս ենք, որ ապագայում բազմաթիվ նախաձեռնություններ կիրակացանենք հենց այս որակով»:
Նա նաև ընդգծեց այն փաստը, որ սակավաթիվ այն դեպքերից է, երբ համագործակցության առաջարկություն արել է հենց կազմակերպությունը, տվյալ դեպքում բանկը. «Բարձր գնահատելի մոտեցում է, քայլ, որ նախաձեռնությունը գալիս է գործընկեր կազմակերպությունից»:
Հ. Անդրեասյանը նշեց, որ իրենք պատրաստ են շարունակել համագործակցությունը յուրահատուկ այս թանգարանի հետ. «Մեր այս համագործակցությունը նմանատիպ այլ միջոցառումների սկիզբն է ազդարարում»:
Թանգարանի տնօրենը տեղեկացրեց, որ այս պահին քննարկվում է երկրորդ նախագիծը, որ կարող են իրականացնել բանկի հետ, թեև մանրամասներ չներկայացրեց, թե կոնկերտ ինչ նախագիծ է այն լինելու:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին