Գյումրեցիները արտագնա աշխատանքից վերադառնում են, այլ ոչ թե գնում ու մնում են քյավառցոց պես. Ֆելիքս Ցոլակյան
2014թ-ին Շիրակի մարզպետարանին պետական բյուջեից հատկացվել է 12 մլրդ 727 մլն դրամ, որն ամբողջությամբ ծախսվել է: Այս մասին այսօր ՀՀ Ազգային ժողովում ընթացող «Հայաստանի Հանրապետության 2014թ. պետական բյուջեի կատարման մասին» տարեկան հաշվետվության ժամանակ ասաց Շիրակի մարզպետ Ֆելիքս Ցոլակյանը:
Մարզպետը նշեց, որ չի ցանկանում բոլոր ծախսերն առանձին թվարկել, քանի որ ՀՀ գլխավոր գանձապետ Ատոմ Ջանջուղազյանն արդեն հանդես է եկել հաշվետվությամբ:
«Միայն ուզում եմ ասել, որ մեզանից անկախ 122 մլն դրամի տնտեսում են ունեցել: Խոսքը սոցփաթեթի մասին է»,- ասաց նա:
Ֆ.Ցոլակյանի խոսքերով՝ նախորդ տարի մարզում մի շարք ձեռնարկություններ են շահագործման հանձնվել, այս տարի ևս նախատեսվում է շահագործման հանձնել մի շարք կառույցներ, այդ թվում՝ Երկրաֆիզիկայի ինստիտուտի մասնաշենքը, Գյումրու թիվ 3 և Ամասիայի արհեստագործական պետական ուսումնարանները և այլն:
ԲՀԿ խմբակցության պատգամավոր Միքայել Մելքումյանը մարզպետին հարցրեց, թե իր մարզպետության օրոք Շիրակի մարզում արդյոք աղքատությունը կրճատվում է, թե՞ ավելանում:
«Շիրակի մարզում աղքատությունը գտնվում է բարձր մակարդակի վրա՝ 47.7 տոկոս: 2012թ-ի տվյալներով մարզում բնակչության թիվը կազմում է 250 հազար, որից 120 հազարը աղքատ է: Օրենքը թո՞ւյլ է տալիս այնպիսի ազդեցություն ունենաք, որ ազդեք այդ գործընթացի վրա, թեկուզ անուղղակի»,- հետաքրքրվեց պատգամավորը:
Մարզպետը ընդունեց, որ իր ղեկավարած մարզը համարվում է հանրապետությունում ամենաղքատը, սակայն խոստովանեց, որ առաջին անգամ է լսում, թե մարզույ 120 հազարն աղքատ են: «Այդ թվերը խաբուսիկ են այն իմաստով, որ բնակչության տեղաշարժի, արտագնա աշխատանքի հետ կապված խնդիրներ կան: Եթե վիճակագրությամբ համեմատենք, ապա այդ թիվը կնվազի»,-ասաց նա:
Այդուհանդերձ, ըստ նրա, որպեսզի աղքատությունը նվազի, դրա համար իրականացնում են մի շարք ծրագրեր, այդ թվում՝ նոր ձեռնարկությունների հիմնում, ինչը նոր աշխատատեղերի հարց կլուծի:
Ինչ վերաբերում է արտագաղթին, Շիրակի մարզպետը նշեց, որ իսկապես արտագաղթ կա, բայց դա ավելի շատ արտագնա աշխատանքի հաշվին է: «Մեր մարզից, ինչպես և Գեղարքունիքից, նախկինում էլ արտագնա աշխատանքի են մեկնել, սակայն կարևորում եմ, որ գյումրեցիները գնում են ու հետո վերադառնում, այլ ոչ թե գնում ու մնում են քյավառցոց պես»,- նշեց Ֆ.Ցոլակյանը:
Միքայել Մելքումյանը նաև հարցրեց, թե խորհրդային տարիներին Գյումրին լուրջ արդյունաբերական քաղաք է եղել, արդյոք այսօր տեքստիլ արդյունաբերության վերակենդանացման համար շանս կա՞: Մարզպետը պատասխանեց, որ իսկապես Գյումրին արդյունաբերական քաղաք էր, արդյունաբերության հիմնական ճյուղը համարվում էր տեքստիլը, սակայն դա քանդվեց և հիմա վերականգման խնդիր կա:
«Թուրքիայում այսօր գործում է 40 հազար տեքստիլ ձեռնարկություն, դրանք բոլորն էժան արտադրանք են թողարկում: Գյումրիում արտադրվածը պետք է սպառման խնդիր ունենա: Գյումրիում այսօր կա տեքստիլի արտադրությամբ զբաղվող մի քանի ձեռնարկություն, որից մեկ կամ երկուսը շատ հաջող են աշխատում, մյուսները այդքան էլ չէ: Պատճառը իրացումն է»,-նկատեց Ֆ.Ցոլակյանը:
Մարզպետը նաև հայտնեց, որ այսօր նոր ուղիներ են բացվում, մասնավորապես, Ռուսաստան հետ, ուստի հնարավոր է, որ դա տեքստիլի զարգացման համար խթան կհանդիսանա: Բացի այդ, ըստ նրա,նոր ձեռնարկությունների ստեղծման ծրագրեր կան, բայց թե ինչքանով դրանք հաջողություն կունենան, մարզպետը չկարողացավ պատասխանել:
Նախորդող հրապարակումներ՝
«Ամեն տարի Արմավիրի մարզում 170-180-ով ավելանում է առաջին դասարան հաճախող աշակերտների թիվը»
Լոռու մարզը 2014-ին տնտեսել է 9 մլն 656 դրամ
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին