Ձեր վստահելի աղբյուրը

ՀՀ Ազգային ժողովում «Հայաստանի Հանրապետության 2014թ. պետական բյուջեի կատարման մասին» տարեկան հաշվետվության ժամանակ ՀՀ նախագահի աշխատակազմի ղեկավար Վիգեն Սարգսյանը ներկայացնելով Նախագահի աշխատակազմի «Հանրային կապերի և տեղեկատվության կենտրոն» ՊՈԱԿ-ի գործունեությունը, նշեց, կենտրոնի գործառույթներն ուղղված են եղել Հայաստանի, Սփյուռքի և Արցախի շահերից բխող տեղեկատվական հոսքերի ապահովմանը, սպասարկմանը, այդ թվում՝ մշտադիտարկմանը, ռիսկերի ախտորոշմանն ու գնահատմանը, դրանց կանխարգելմանն ու նվազեցմանը միտված միջոցառումների իրականացմանը:

Նրա խոսքերով՝ կենտրոնի փորձագետների կողմից լրատվամիջոցների շուրջօրյա դիտարկումներին զուգահեռ նախորդ տարի ուսումնասիրվել են միջազգային տարբեր կառավարական և ոչ կառավարական կազմակերպությունների կողմից հրապարակվող զեկույցները, որոնց վերաբերյալ հասցեատերերին են տրամադրվել համապատասխան տեղեկանքներ, անհրաժեշտության դեպքում նախաձեռնվել են համապատասխան գործողություններ:

«Կարևորելով երիտասարդության հետ աշխատանքը, կենտրոնը Երևանում, մարզերում և Արցախում իրականացրել է շուրջ 40 դասընթաց՝ կապված Հայաստանի Հանրապետության արդի քաղաքականության ու տեղեկատվական անվտանգության խնդիրների հետ»,- ասաց Վ.Սարգսյանը:

Նա նաև հայտնեց, որ կենտրոնի կողմից շարունակական բնույթ են կրել քաղաքական ամփոփագրերի, վերլուծական տեղեկանքների և առանձին հանձնարարականների հետ կապված նյութերի պատրաստման գործառույթները՝ ՀՀ արդի քաղաքականության հետ կապված, որոնց ընդհանուր թվաքականը շուրջ 50 է:

Վ.Սարգսյանը նշեց, որ նախորդ տարի «Հանրային կապերի և տեղեկատվության կենտրոն»-ի կողմից իրականացվել են մի շարք աշխատանքներ Հայոց ցեղասպանության 100-րդ տարելիցին նվիրված միջոցառումների շրջանակներում: Մասնավորապես՝ իրականացվել է «Սա ցեղասպանություն է» վավերագրական ֆիլմի նկարահանումը, «Մեկ դար տևած ցեղասպանություն. սև հունվար» ֆիլմի նկարահանումը, որի շնորհահանդեսը կայացել է Երևանում և ԱՄՆ-ում: Բացի այդ, ավարտին են հասցվել «Սումգայիթի ողբերգության ականատեսների վկայություններ» փաստավավերագրական գրքի երկրորդ հատորի կազմման աշխատանքները, որում ներկայացված են կենտրոնի կողմից ձեռքբերված նախկինում չհրապարակված բացառիկ նյութեր և փաստաթղթեր:

ՀՀ աշխատակազմի ղեկավարի խոսքերով՝ կենտրոնի կողմից իրականացվել են նաև թուրքալեզու, արաբալեզու, պարսկալեզու, անգլալեզու տեղեկատվական դաշտերի մոտ 300 մշտադիտարկում, ցանցային լրատվամիջոցների և տեղեկատվական այլ հարթակների շուրջ 1565 մշտադիտարկում և վերլուծություն, Հայաստան-Ադրբեջան տեղեկատվական հակամարտության ոլորտում շուրջ 3135 նյութերի պատրաստում, հրատարակվել և տարածվել է ՀՀ շահերին առնչվող միջազգային կառույցների դիրքորոշումների շուրջ 520 մոնիթորինգ և վերլուծական նյութեր: Բացի այդ, իրականացվել է քաղաքական թեմաների շուրջ 50 փորձագիտական-մասնագիտական քննարկումների կազմակերպում, տարածաշրջանային զարգացումներին վերաբերող շուրջ 190 տեղեկատվական նյութի պատրաստում: