Հուլիսի 6-ին կմեկնարկի Դիջիքեմփ ամենամյա նորարարական ճամբարը
Beeline-ը և Ինֆորմացիոն տեխնոլոգիաների ձեռնարկությունների միությունն այսօր հայտարարեցին Դիջիքեմփ երրորդ ամենամյա ճամբարի անցկացման մասին: Այս տարի այն կանցկացվի հուլիսի 6-16-ը, Դիլիջանում: Ճամբարին կմասնակցեն 14-22 տարեկան երիտասարդներ:
«Հայաստանն ունի տեղեկատվական տեխնոլոգիաների ոլորտի արտադրանքի տեղական շուկայի զարգացման մեծ ներուժ, սակայն այսօր այս արտադրությունը թույլ է զարգացած: Նման միջոցառումներն ուղղված են այս բացը լրացնելուն, տեղական շուկան զարգացնելուն, ինչն էլ թույլ կտա արագացնել, ընդհանուր առմամբ, ամբողջ ոլորտի զարգացումը: Ճամբարի զարգացման գործում մենք առանձնակի ուշադրություն ենք դարձնում, որպեսզի մասնակցեն երիտասարդներ ՀՀ բոլոր մարզերից: Սա մեզ հնարավորություն կտա փնտրել տաղանդներ նույնիսկ երկրի ամենահեռավոր բնակավայրերում»,- այսօր լրագրողների հետ հանդիպմանը նշեց Ինֆորմացիոն տեխնոլոգիաների ձեռնարկությունների միության տնօրենի տեղակալ Հայկ Չոբանյանը:
Նա նշեց, որ ամեն տարի իրենք երիտասարդների մասնակցության աճ են արձանագրում:
Beeline-ի գլխավոր տնօրեն Անդրեյ Պյատախինն էլ ընդգծեց, որ երիտասարդությունը, ինչպես միշտ, գտնվում է Beeline-ի ուշադրության կենտրոնում. «Մենք ձգտում ենք աջակցել նրանց, ովքեր իրենց ուժերով փորձում են հասնել հաջողության: Առավել քան վստահ եմ, որ այս տարի ճամբարի երիտասարդ մասնակիցները մեզ հաճելիորեն կզարմացնեն իրենց գաղափարներով»:
Դիջիքեմփի հիմնական նպատակն է տեղեկատվական տեխնոլոգիաների ոլորտում ներգրավված երիտասարդությանը համախմբել, մոտիվացնող և կրթական միջավայր ձևավորել, երիտասարդ սերնդին ոգեշնչել՝ սեփական բիզնես և բիզնես ծրագրեր ստեղծելու համար:
Բանախոսները տեղեկացրեցին, որ լավագույն բիզնես ծրագրերի հեղինակները կստանան տարբեր մրցանակներ Beeline-ի և ԻՏՁՄ-ի կողմից:
Հիշեցնենք, որ նախորդ տարվա եզրափակիչ փուլ անցած մասնակիցների եռյակը գլխավորել էր Սերմնացան ռոբոտի ծրագիրը, երկրորդ տեղում էր «Top Tariff» բջջային հավելվածի ծրագիրը, որը հետագայում լայն տարածում գտավ Հայաստանում սմարթֆոն օգտագործողների շրջանում: Երրորդ տեղը զբաղեցրեց պաղպաղակի արտադրության համար նախատեսված ավտոմատ մեքենայի ծրագիրը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին