Ավարտվեց ՀՖՖ կողմից անցկացվող մարզչական «Բ» արտոնագրի հերթական դասընթացը
Այսօր ՀՖՖ Տեխնիկական կենտրոնում՝ Ֆուտբոլի ակադեմիայում, ավարտվեց ՀՖՖ կողմից անցկացվող մարզչական «Բ» արտոնագրի հերթական դասընթացը, որը չորրորդն էր այս տարվա ընթացքում: Դասընթացի մասնակիցների թիվն այս անգամ 16-ն էր: Ի թիվս Արարատի, Արագածոտնի, Սյունիքի և Գեղարքունիքի մարզերի, մասնակիցների թվում էին նաև Գյումրիի 7 ներկայացուցիչներ: Այս մասին հայտնում է ՀՖՖ պաշտոնական կայքը:
Նկատի առնելով Գյումրիում ֆուտբոլի ակադեմիայի առկայությունը, որի բացումը տեղի ունեցավ ամիսներ առաջ, Գյումրիում ֆուտբոլի, հատկապես՝ մանկապատանեկան ֆուտբոլի զարգացման համար ստեղծված բոլորովին նոր և նախանձելի պայմանները, այն հանգամանքը, որ մանկապատանեկան ֆուտբոլի զարգացումը Հայաստանում ՀՖՖ կառաջնահերթությունների շարքում է, ՀՖՖ պաշտոնական կայքի թղթակիցը զրուցել է Գյումրիից մարզչական «Բ» արտոնագրի մասնակից մի քանի ներկայացուցիչների հետ:
Սենիկ Առաքելյանը նշեց, որ դասընթացը չափազանց օգտակար էր: «Ես ունեմ մարզչական որոշակի փորձ, մարզել եմ աղջիկների թիմեր, բայց այն գիտելիքները, որոնք ստացա այստեղ, անհամեմատելի են: Շատ գոհ եմ թե դասընթացից, թե մեզ դասավանդող հրահանգիչներից, թե պայմաններից: «Բ» արտոնագրի դասընթացը ոչ մեկի չի դարձնում պատրաստի մասնագետ, բայց այն տալիս է բազային գիտելիքներ, ցույց է տալիս մարզիչ դառնալու ճիշտ ճանապարհը: Եթե դու կարողանաս շարժվել ճիշտ ճանապարհով, անպայման կհասնես լավ արդյունքի»:
Արտյոմ Հակոբյանի կարծիքով՝ ստեղծված էին բոլոր պայմանները թե գործնական, թե տեսական պարապմունքների համար: «Շատ հաճելի էր գտնվել ՀՖՖ Տեխնիկական կենտրոնում: Դասընթացի ընթացքում արծարծվում էին ամենատարբեր թեմաներ՝ տեխնիկական և տակտիկական պատրաստվածություն, հոգեբանության հետ կապված հարցեր և սպորտային բժշկություն»:
Գագիկ Տեր-Գևորգյանն էլ շատ կարևոր համարեց հատկապես Գյումրիի ներկայացուցիչների մասնակցությունը դասընթացին: «Իմ կարծիքով՝ այն, որ «Բ» արտոնագրի դասընթացին մասնակցում էին երիտասարդ մարզիչներ Գյումրիից, շատ կարևոր է: Գյումրիում հետաքրքրությունը ֆուտբոլի նկատմամբ շատ մեծ է, իսկ հիմա՝ ակադեմիայի բացումից հետո, ստեղծվել են նաև մարզումային գերազանց պայմաններ: Կարծում եմ, որ երիտասարդ մարզիչները «Բ» արտոնագրի դասընթացի ժամանակ ստացած իրենց գիտելիքներով կարող են նպաստել Գյումրիում ֆուտբոլի հետագա զարգացմանը»:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
