Ձեր վստահելի աղբյուրը

Globallookpress.com-ը հրապարակել է մի հոդված, որում լրագրող Ռոման Մունը փորձում է բացատրել Ամերիկայի գավաթի խաղարկությունում Բրազիլիայի ընտրանու կրած անհաջողության պատճառները:

Պարագվայի հավաքականի հետ հանդիպումը ցույց տվեց, որ Բրազիլիայի հավաքականն այժմ շատ է կախված Նեյմարից: Արդեն սկսել ենք հարմարվել այն մտքին, որ կարևոր խաղերում չարժե ռիսկային վառ ֆուտբոլ ակնկալել աշխարհի հնգակի չեմպիոնի կատարմամբ: Սակայն բրազիլացիները գիտեն հզոր հակագրոհներ կազմակերպել, ինչպես Կոնֆեդերացիաների գավաթի վերջին խաղարկության եզրափակչում: Երեկ պարագվայցիներն ագրեսիվ ֆուտբոլ ցուցադրեցին, գործեցին համախումբ, իսկ Նեյմարի բացակայության պայմաններում բրազիլացիներին չէր հաջողվում պաշտպանությունից արագ անցնել գրոհների: Կոուտինյոն, Ֆիրմինոն ու Վիլլիանը ոչինչ չցուցադրեցին, որը կարող էր Բրազիլայի հավաքականին ազատել մեկ խաղացողի պիտակից:
Ի դեպ, պարտվելով Պարագվայի թիմին՝ Բրազիլիայի հավաքականը զրկվեց այս մրցաշարում ևս 2 հանդիպում անցկացնելու հնարավորությունից: Եթե պարտվեր կիսաեզրափակչում, գոնե հանդիպում կանցկացներ երրորդ տեղի համար: Հիմա բրազիլացիները ստիպված կլինեն առանց Նեյմարի անցկացնել ԱԱ-2018-ի ընտրական փուլի մեկնարկային 2 խաղը:

Անկարգապահություն պաշտպանության կենտրոնում

Տիագո Սիլվան Բրազիլիայի հավաքականի այն եզակի խաղացողներից մեկն է, ում հեղինակությունը չի տուժել աշխարհի 2014 թ. առաջնության չարաբաստիկ կիսաեզրափակչից հետո: Բանն այն է, որ ՊՍԺ-ի պաշտպանը որակազրկման պատճառով բաց է թողել Գերմանիայի հավաքականի հետ հանդիպումը: Թվում էր՝ Սիլվան կդառնա Դունգայի հավաքականի կարևորագույն խաղացողը: Դրա փոխարեն Դունգան մարզիչ նշանակվելուց հետո հայտարարեց, որ ավագի թևկապը Սիլվայից վերցնում ու հանձնում է Նեյմարին: Մասնագետը դրա համար առիթ ուներ. Չիլիի ընտրանու հետ աշխարհի առաջնության 1/8 եզրափակչում պաշտպանը հրաժարվել էր իրացնել 11 մետրանոց հարվածը: Բացի այդ, վնասվածքի պատճառով Սիլվան չի մասնակցել աշխարհի առաջնությունից հետո կայացած մի քանի խաղին, իսկ Լուիզը նրա բացակայությամբ զույգ է կազմել Միրանդայի հետ:
Սիլվան ուղղակի հայտարարել է, որ դժգոհ է մարզչի որոշումից: Հաջողվել է խուսափել մեծ սկանդալից, սակայն Դունգան ոչինչ չի մոռացել: Ամերիկայի գավաթի խաղարկությունը պաշտպանության կենտրոնում սկսեցին Լուիզն ու Միրանդան, իսկ Սիլվան մնաց պահեստայինների նստարանին: Սակայն թիմի առաջատար հենակետայինի՝ Լուիս Գուստավոյի վնասվածքը մարզչին ստիպեց վերադասավորել կազմը և Տիագո Սիլվային վերադարձնել հիմնական կազմ:
Եվ հենց Սիլվան դարձավ գլխավոր մեղավորը, որ Բրազիլիայի հավաքականը դուրս մնաց Ամերիկայի գավաթի խաղարկությունից: Նա 11 մետրանոցը նվիրեց Պարագվայի թիմին՝ խաղավարտից 20 րոպե առաջ, չգիտես ինչու, ձեռքով խաղալով սեփական տուգանային հրապարակում: Դունգայի կասկածներն արդարացան. նախկին ավագը սայթաքեց վճռորոշ պահին:

Առանց ստեղծագործող կենտրոնական կիսապաշտպանի

Ֆեռնանդինյո, Լուիս Գուստավո, Էլիաս. լավ ֆուտբոլիստներ են, բայց նրանից և ոչ մեկը չի կարող կազմակերպել խաղը: Նրանք գնդակ են խլում, մամլիչ գործողություններ կատարում, անհրաժեշտության դեպքում խախտում կանոնները: Նրանց համար կարևորը չսխալվելն ու հնարավորինս քիչ ռիսկի դիմելն է:
Սա հին պատմություն է: Դեռ 80-ականներին Բրազիլիայում որոշեցին, որ թույլ հենակետային-ստեղծագործողներին կճզմեն եվրոպական ֆիզիկապես ուժեղ ընտրանիները: Մՙարզիչները հենվեցին վիճակագրական տվյալների վրա, որ եթե կոմբինացիան բաղկացած է ավելի քան 8 փոխանցումից, ապա նրա հաջող ավարտի հնարավորությունը կտրուկ նվազում է: Որոշվեց հարձակման գծում խաղը կառուցել եզրային հարձակողական ոճի պաշտպանների միջոցով, շեշտը դրվեց ստանդարտների ու հակագրոհների վրա
Դա աշխատեց 1994 և 2002 թթ.: Թվում է՝ այլևս չի աշխատում, հատկապես այն ժամանակ, երբ Բրազիլիայի հավաքականը հաշվի մեջ հետապնդողի դերում է հայտնվում: Ինչպես ասել է Դորիվալ Ժունիորը՝ Նեյմարի առաջին մարզիչներից մեկը, բրազիլացի կենտրոնական կիսապաշտպաններն այլևս չեն կարողանում փոխանցումներ կատարել:
Կա զգացում, որ Բրազիլիայի հավաքականը ոչնչի չի հասնի, եթե չունենա իր Խավիին ու Պիրլոյին:

Չկա նաև կենտրոնական հարձակվող

Գերմանիայի ընտրանին Բրազիլիայի հավաքականին նրա իսկ խաղադաշտում ցույց տվեց, որ աշխարհի գավաթը կարելի է նվաճել նաև առանց կենտրոնական հարձակվողների: Ընկերական խաղերում Դունգան աշխատել է առանց հարձակվողի խաղի կառուցման վրա, և այլ տարբերակ էլ չկար, քանի որ Դիեգո Տարդելլին ու Լուիս Ադրիանոն հավաքականում չեն ուրախացնում, իսկ Ֆիրմինոն ակումբում կենտրոնական հարձակվողի պարտականություններ չի կատարում:
Դատելով Ամերիկայի գավաթի խաղարկությունից՝ կարելի է ասել, որ Բրազիլիայի հավաքականի՝ առանց հարձակվողի խաղը չափազանց քաոսային է: Հակագրոհների ժամանակ չկա այն ֆուտբոլիստը, ով գնդակ կպահի, իսկ մրցակցի տուգանային հրապարակի մատույցներում իր վրևա կբևեռի պաշտպանների ուշադրությունը և գնդակը կփոխանցի խաղընկերներին: Ֆիրմինոյին դա չհաջողվեց. Կոլումբիայի հավաքականի հետ խաղում նա կարծես իր տեղում չէր, իսկ պարագվայցիների հետ հանդիպման ընթացքում պարզապես կորսվեց խաղադաշտում:
Բրազիլիայի ազգային թիմն առայժմ նոր Ռոնալդո կամ գոնե Լուիս Ֆաբիանո չունի: Այս ամենի արդյունքում ուժեղանում է ճնշումը Նեյմարի վրա, ումից առանց այդ էլ շատ բան են պահանջում:

Արդյունքը խաղից կարևոր է

Ամերիկայի գավաթի խաղարկությունից դուրս մնալուց հետո զգացումները նույնն են, ինչ աշխարհի առաջնությունից դուրս մնալուց հետո: Եվ խոսքը կոնկրետ որևէ խաղացողի, մարզչի, դիրքի կամ գրիպի հանելուկային համաճարակի մասին չէ: Բանն այն է, որ բրազիլական ֆուտբոլը վաղուց չի ընթանում ճիշտ ճանապարհով: Բրազիլիայի հավաքականը չափազանց շատ է կառչել արդյունավետությունից՝ ի վնաս ֆուտբոլի: Սա հաղթանակի համար ամեն ինչի պատրաստ Բրազիլիայի հավաքականն է՝ աշխարհի ամենահետաքրքիր թիմը: Նրա հետ միշտ որևէ դրամա է կատարվում, սեփական ավանդույթների հետ բախումը ցնցող է, նրա գլխավոր աստղը միշտ վեճերի մեջ է, իսկ նրա պարտությունը աշխարհի վերջ է թվում:
Ափսոս, որ Բրազիլիայի հավաքականի խաղին հետևելն ավելի ու ավելի անհետաքրքիր է դառնում: