Ձեր վստահելի աղբյուրը

«Grand Chess Tour»-ի առաջին՝ Ստավանգերում կայացած մրցաշարում Լևոն Արոնյանն զբաղեցրեց մրցաշարային աղյուսակի վերջին հորիզոնականը, իսկ Սենթ Լուիսում տեղի ունեցած երկրորդ մրցաշարում նվաճեց հաղթողի կոչումը: Առայժմ այսպիսին է շարքի դրամատուրգիան: Ով հաղթի լոնդոնյան ավարտական փուլում, նա էլ շարքի հաղթող կհռչակվի: Այսպես է կարծում Վեսելին Թոփալովը, ով սենթլուիսյան մրցաշարի վերջին տուրում փորձում էր խանգարել Լևոն Արոնյանին՝ ձեռք բերելու անհրաժեշտ կես միավորը: Սակայն բուլղարացի շախմատիստը չկարողացավ դա անել: Եվ Թոփալովը մեկնաբանել է պարտիան. «Լևոնն այնքան արագ ու լավ խաղաց, որ ես այնպիսի զգացողություն ունեի, որ այդ ես չեմ ողջ առավոտյան պատրաստվել այդ տարբերակին, այլ նա…»:

Ի պատասխան՝ Արոնյանը նկատել է. «Եթե դու սևերով Ռոգոզինի պաշտպանություն կամ վիեննական գամբիտ ես խաղում, կհասնես այն դիրքին, որն ստացվեց մեր պարտիայում: Դու չես կարող չիմանալ այն: Ես այն կրկնել էի մրցաշարից առաջ: Ընդհանուր առմամբ՝ դիրքս ինձ դուր եկավ, նույնիսկ կարելի էր պայքարել հաղթանակի համար: Բայց տվյալ պարագայում ես գերադասեցի իրատես լինել»:

Հայ շախմատիստը նշել է նաև, որ մեկ շաբաթից մեկնելու է Բաքու:

«Այս տարի սա առայժմ իմ լավագույն նվաճումն է: Ընդհանրապես՝ տարվա մեջ նվազագույնը մեկ գերմրցաշարում ես հաղթում եմ: Վերջին հաղթանակս Վեյկ ան Զեեում գրանցվեց, 2014 թ.: Այնպես որ, տարվա նվազագույն պլանն արդեն կատարել եմ, եկել է ավելիի մասին մտածելու ժամանակը:

Այսքան անհաջողություններից հետո ինքս ինձ պետք է ապացուցեի, որ դեռ կարող եմ ինչ-որ բան անել:

Իմ հոգեբանն ընկերուհիս է՝ Արիանան, իսկ շախմատում ինձ օգնում է միջազգային վարպետ Աշոտ Նադանյանը: Նրա հետ վերջին ժամանակներս բավական շատ ենք աշխատել, և վերջապես, ինչ-որ բան արդեն ստացվում է:

Իմ գլխավոր երկրպագուն մայրս է: Այսօրվա պարտիայում, երբ ես կասկածում էի՝ արդյոք չխաղա՞լ հաղթանակի համար, մտածեցի, որ պետք է ոչ-ոքի անեմ, որպեսզի ծնողներս հանգիստ գնան քնելու: Չէ՞ որ նրանք Եվրոպայից էին հետևում իմ պարտիային, որտեղ արդեն շատ ուշ էր:

Մեկ շաբաթից կմեկնեմ Բաքու, իսկ աշխարհի գավաթի խաղարկությունից հետո հանդես կգամ Բեռլինում կայանալիք արագ շախմատի և բլիցի աշխարհի առաջնությունում:

Ցավոք, մենք՝ շախմատիստներիս համար դժվար է ինչ-որ կերպ օգնել հակամարտող կողմերին: Բայց չէ՞ որ երաժիշտները, ստեղծագործական տարբեր մասնագիտությունների ներկայացուցիչները մեկնում են Ադրբեջան՝ որպես խաղաղություն բերող մարդիկ, և ես կաշխատեմ հետևել նրանց օրինակին: Կաշխատեմ ցույց տալ, որ հարգում եմ հարևան երկրին, ցուցադրել լավագույն շախմատը և հաճույք պարգևել տեղի երկրպագուներին»,- Արոնյանի խոսքերը մեջբերել է chess.news.ru-ն: