Ձեր վստահելի աղբյուրը

Սեպտեմբերի 3-ին Նովի Սադի «Կարաջորջե» մարզադաշտի մամուլի ասուլիսների սրահում տեղի ունեցավ Հայաստանի ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանի մամուլի ասուլիսը: Ինչպես տեղեկացնում է ՀՖՖ պաշտոնական կայքը, հայ մասնագետը հայտարարել է, որ իրենք առաջին հերթին խաղում են երկրպագուների համար և նվիրվածությամբ հանդես կգան:

- Տեղյա՞կ եք սերբական ֆուտբոլում տիրող իրավիճակի և Սերբիայի հավաքականի վատ արդյունքների մասին:
- Իհարկե, տեղյակ ենք: Այնուամենայնիվ, ես համարում եմ, որ Սերբիայի ընտրանին շատ ուժեղ թիմ է: Ինչ-որ չափով խաղերը չստացվեցին: Հիշում ենք Ալբանիայի հավաքականի հետ չարաբաստիկ խաղը, որի արդյունքում Սերբիան զրկվեց միավորներից: Հետևում ենք նաև Սերբիայի առաջնությանը և գիտենք, որ լավ երիտասարդ ֆուտբոլիստներ կան, ովքեր ապագայում կարող են լրջորեն մրցակցել Սերբիայի հավաքականի հիմնական կազմի ֆուտբոլիստների հետ:

- Ինչպե՞ս եք դիտարկում այս հանդիպումը՝ հաշվի առնելով, որ երկու հավաքականներն էլ գրեթե կորցրել են հնարավորությունները՝ խաղալու Եվրոպայի առաջնությունում:
- Սերբիայի հավաքականն ավելի վատ վիճակում է, քանի որ -2 միավոր ունի, իսկ մենք դեռ տեսական հնարավորություններ ունենք: Սակայն եթե նույնիսկ ոչ մի հնարավորություն չունենայինք՝ գրավելու երրորդ տեղը, միևնույն է, խաղում ենք մեր ազգի, մեր ֆուտբոլասերների համար, որպեսզի ուրախություն պարգևենք նրանց:

- Ձեր գլխավորությամբ Հայաստանի հավաքականն անցկացնելու է պաշտոնական երկրորդ հանդիպումը: Առաջին խաղում կային կադրային որոշակի խնդիրներ, մի քանի խաղացողներ էլ լավ մարզավիճակում չէին: Այս անգամ ավելի հե՞շտ է, թե՞ ոչ:
- Եթե հաշվի չառնենք, որ Բերեզովսկին ավարտել է կարիերան և արդեն մարզիչ է, առաջին անգամ է, որ բոլոր ֆուտբոլիստները, որոնց ես ուզում էի տեսնել հավաքականում, այժմ այստեղ են: Խաղը ցույց կտա, թե թիմի վիճակն ինչպիսին է: Մարզիչը 3 օրում չի կարող բարելավել ֆիզիկական վիճակը: Մեր խնդիրն ավելի շատ տղաներին վերականգնելն է, քանի որ նրանք հանդիպումներ են ունեցել ակումբներում: Մենք ավելի շատ աշխատել ենք տակտիկական պատրաստվածության ուղղությամբ: Ես գոհ եմ մարզումներից, գոհ եմ, որ տղաները խաղում են ակումբներում, բայց հանդիպումը ցույց կտա, թե որքանով են նրանք պատրաստ:

- Դժվա՞ր է թիմին տրամադրել հաղթանակի, երբ այլևս հնարավորություններ չկան…
- Ինչ-որ չափով դժվար է: Բացի այդ, խաղալու ենք դատարկ տրիբունաների ներքո և, և հանդիպումը կարող է ընկերական խաղի տպավորություն թողնել: Սակայն ես ամեն ինչ անում եմ, որպեսզի առավելագույն նվիրավածություն լինի այս խաղում: Մենք պետք է անմնացորդ նվիրվենք, քանի որ երկրի պատիվն ենք պաշտպանում:

- Նախորդ տարի Հայաստանի հավաքականը Սերբիայի գլխավոր թիմի հետ մրցել է Երևանում: Մրցակցի կազմում այս մեկ տարվա ընթացքում շոշափելի փոփոխություններ տեսնո՞ւմ եք, թե՞ ոչ:
- Որոշ փոփոխություններ կան: Տեղյակ եմ, որ վնասվածք ունեցող ֆուտբոլիստներ կան: Կան նաև խաղացողներ, ովքեր չեն ընդգրկվել հայտացուցակում: Նաև նորեկներ կան:

- Գևորգ Ղազարյանը երկուշաբթի խաղ ուներ և բավական ուշ է միացել հավաքականին, քանի որ Պորոտւգալիայից Հայաստան հասնելը հեշտ խնդիր չէ: Արդյոք նա հասցրե՞լ է վերականգնվել:
- Իհարկե, բավական հոգնեցուցիչ է մի քանի ինքնաթիռ փոխելով ժամանելուց հետո լինել լավ մարզավիճակում: Այսօրվա մարզումից ամեն ինչ պարզ կլինի: Եթե տեսնենք, որ չի վերականգնվել, ապա կհանգստանա և կպատրաստվի Դանիայի ընտրանու դեմ խաղին: