Մշակույթի նախարարությունը` Թումանյանի կկվի դերում
Այնպիսի տպավորություն է, որ ՀՀ մշակույթի նախարարությունը հենց այսօր պարզեց, որ Փակ շուկայի շինարարությունը ապօրինի է: Այնինչ` ինքն արդեն նույն շրջանը անցնում է երրորդ անգամ` երիցս դիմում է քաղաքապետարանին:
Առաջին երկու անգամ քաղաքապետարանը ընդամենը տուգանել է մշակութային արժեքը ոչնչացնողին: Վերջին անգամ իրավապահները օրենքի խախտում չեն «տեսել»...
Հետևյալ հակիրճ մեջբերումը panorama.am-ի 01/03/2013 -ի հրապարակումից է. Փակ շուկա… Մինչ նախագիծը քննարկվում է, «վանդալը բարբարոսաբար ոչնչացնում է հուշարձանը»
Պետությունը անտարբեր է մեր մշակութային ժառանգության նկատմամբ.- հանրային քննարկման ժամանակ ասել է Ճարտարապետների միության նախագահ Մկրտիչ Մինասյանը:
«Այսօր քաղաքաշինության ոլորտում կարգապահության մասին խոսելը իմաստ չունի, սեփականաշնորհման գործընթացի հետևում որևէ օրինապահության չկա». ճարտարապետ Սաշուր Քալաշյան:
«Երևանի սրտի կենդանի շնչերից մեկը կացնահարել է ոչ թե թուրքը, այլ հայ օլիգարխը». ճարտարապետ Աշոտ Ալեքսանյան:
Դատի տալ Երևանի քաղաքապետարանին.-առաջարկում է ազգագրագետ Հրանուշ Խառատյանը`փոխնախարար Ա. Սամուելյանին: Ինչին Սամուելյանը պատասխանում է, որ չկա օրենք, որով մի պետական մարմինը կարող է դատի տալ մյուսին:
Նշենք, որ ճարտարապետները դիմել են Տարոն Մարգարյանին` «Կենտրոնական ծածկած շուկայի սեփականատիրոջ նկատմամբ հարուցել դատական գործ»:
Այսօր մշակույթի նախարարությունը, այն բանից հետո, երբ մշակույթի նախարարը, տոներից հետո, այցելել է բարբարոսաբար քանդված մշակույթի շենքի տարածք, «տեղեկույթ է տարածել «Երևանի թիվ 1 շուկա» ՍՊԸ-ի սեփականություն հանդիսացող, Մաշտոցի պողոտայի N 5 հասցեում գտնվող Կենտրոնական ծածկած շուկայի շենքի շուրջ ստեղծված իրավիճակի վերաբերյալ»: Համոզվելուց հետո, որ շինարարությունը ի հեճուկս և ակտիվ ընթանում է, մշակույթի նախարարությունը «դիմել է Երևանի քաղաքապետարան պահանջելով ձեռնարկել համապատասխան միջոցառումներ` հուշարձան-շենքում իրականցվող ապօրինի շինարարական աշխատանքները կանխելու, դադարեցնելու և տարածքում հսկողություն սահմանելու համար»:
Թույլ տվեք հարցնել. Հիմա ո՞ր մեկը չի հասկանում իրավիճակը` պատգամավորը, որ անտեսելով տուգանք ու օրենք քանդում ու շինում է շենքը, թե՞ մշակույթի նախարարությունը, որ կրկին ու կրկին ընդամենը գրությունով «պահանջում է» «ապօրինի շինարարական աշխատանքները կանխել, դադարեցնել և տարածքում հսկողություն սահմանել»:
Հիշեցնենք օրենսդիր ու գործադիր մարմիններին, իրավապահներին, Փակ շուկայի ավիրման «գործունեության» մեջ ներգրավված նրանց ներկայացուցիչներին. Կա օրենք և այդ օրենքը լրիվ թույլ է տալիս հարցը լուծել ու փակել:
«Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենք, գլուխ 8-րդ, հոդված 38, 40. «Հուշարձանն օգտագործողները, եթե իրենց կանխամտածված կամ ոչ կանխամտածված գործողություններով վնասել են հուշարձանի պահպանությանը, կորցնում են օգտագործման իրավունքը:
Հուշարձան օգտագործող իրավաբանական և ֆիզիկական անձինք պատասխանատվություն են կրում դրանց պահպանության ու անվթարության ապահովման համար և պարտավոր են կատարել հուշարձանների պահպանության ու օգտագործման՝ Հայաստանի Հանրապետության օրենսդրության պահանջները:
Այդ պայմանները չկատարելու դեպքում՝
ա) հուշարձանն օգտագործման տրամադրողն իրավասու է վաղաժամկետ դադարեցնել վարձակալական պայմանագիրը՝ Հայաստանի Հանրապետության օրենսդրությամբ սահմանված կարգով.
բ) հուշարձանի սեփականատերը, լիազորված մարմինը, պետական կառավարման տարածքային կամ տեղական ինքնակառավարման մարմինն իրավասու են դատական կարգով գանգատարկելու օգտագործման իրավունքը և պահանջելու՝ օգտագործողի մեղքով հուշարձանին հասցված վնասի հատուցում»:
Սա` թե ինչ պետք է պահանջի մշակույթի նախարարությունը: Իսկ շենքի վերականգնումը պարտադրելու համար պիտի դիմի դատարան:
Թույլ տվեք Փակ շուկայի գործով բոլոր գլխավոր դերակատարներին չհավաստել որևէ հարգանք և ավելացնել, որ panorama.am-ը, պահանջելով իշխանություններից պահպանել պետական արժեքը, որևէ փոխհատուցում չի պահանջում այս անվճար իրավաբանական խորհրդատվության համար:
Այս ամենը շատ հիշեցնում է Թումանյանի «Չարի վերջը», որտեղ կկվի դերում մշակույթի նախարարությունն է` դիմում է ու դիմում է, մինչ ձագերին ուտում ու ուտում են:
Նախորդող նորություններ`
Փակ շուկայում ընթացող շինարարությունը բուռն ընթացք է ստացել... նախագիծ էլի չկա (լուսանկարներ)
Բնակիչները` Փակ շուկայի շինարարության մասին. Պահանջում ենք վերջապես արձագանքեք և շտապ դադարեցնեք ապօրինությունը
Մշակույթի նախարարություն. Ապամոնտաժել Փակ շուկայի նորակառույց ծավալի երկաթբետոնյա հիմնական հատվածն ընդունելի ծավալով
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1
Փակ շուկա… Մինչ նախագիծը քննարկվում է, «վանդալը բարբարոսաբար ոչնչացնում է հուշարձանը»
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր
