HSBC-ի աշխատակցի գործով դատաքննությունը շարունակվում է, բայց գլխավոր կասկածյալներից մեկի բացակայությամբ
Մարտի 3-ին Կենտրոն և Նորք-Մարաշ վարչական շրջանների ընդհանուր իրավասության դատարանում կշարունակվի HSBC բանկի գլխավոր մասնագետ Աշոտ Առուշանյանի գործով դատաքննությունը:
Առուշանյանը արդեն 1 տարի 8 ամիս է, ինչ կալանքի տակ է և մեղադրվում է ՀՀ քրեական օրենսգրքի 38-177-րդ հոդվածի 3-րդ մասով, այն բանի համար, որ նա, խմբով առանձնապես խոշոր չափերի գողություն կատարելու դիտավորություն ունեցող իր ընկերներ Էդգար Կարաքեշիշյանին և ծանոթ Արտաշես Գալուստյանին օժանդակել է հանցագործության կատարմանը` նրանց տրամադրելով տեղեկատվություն հափշտակության առարկայի` առանձնապես խոշոր չափերի գումարի վերաբերյալ:
Կենտրոն և Նորք Մարաշ վարչական շրջանների ընդհանուր իրավասության դատարանի դատավճռով Աշոտ Առուշանյանը մեղավոր էր ճանաչվել ՀՀ քրեական օրենսգրքի 38-177-րդ հոդվածի 3-րդ մասի 1-ին կետով և դատապարտվել է ազատազրկման 5 տարի 6 ամիս ժամկետով` գույքի 30%-ի բռնագրավմամբ:
Նույն դատավճռով Էդգար Կարաքեշիշյանը մեղավոր էր ճանաչվել ՀՀ քրեական օրենսգրքի 177-րդ հոդվածի 3-րդ մասի 1-ին կետով և 324-րդ հոդվածի 2-րդ մասով և դատապարտվել ազատազրկման 7 տարի 6 ամիս ժամկետով: Սակայն դեռ նախորդ տարվա հուլիսի 23-ին ՀՀ վերաքննիչ քրեական դատարանը որոշել էր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճիռը բեկանել և գործն ուղարկել ընդհանուր իրավասության դատարան` այլ կազմով նոր քննության: Իսկ Վճռաբեկ դատարանն էլ որոշել էր մեղադրողի վճռաբեկ բողոքը վերադարձնել: Այժմ գործը Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում քննվում է դատավոր Մեսրոպ Մակյանի վարույթում:
Հատկանշական է, որ այս գործով անցնող Արտաշես Գալուստյանը, որը գործով կասկածյալ էր, մահացել է և այժմ գործը նոր քննությամբ շարունակվելու է առանց իրեն: Նա մասնավորապես, նախաքննության ժամանակ ցուցմունք էր տվել, որ 2011-ի ամռանը Օպերայի տարածքում գտնվող սրճարաններից մեկում ինքը, Էդգար Կարաքեշիշյանը և Աշոտ Առուշանյանը հանդիպել են և հանդիպման ժամանակ Աշոտը Էդգարին է փոխանցել HSBC բանկի համակարգչային բազայից հանված մի թուղթ, որի վրա իբր նշված է եղել տուժողի՝ «Մանանա Գրեյն» ՍՊ ընկերության տնօրենի կողմից տեղափոխված գումարի և դրա օրվա հաճախականության վերաբերյալ տեղեկատվություն: Նշյալ թերթիկում իբր նշվել էր ամենաքիչ գումարի՝ 10 միլիոնի, իսկ ամենաշատը՝ 200 միլիոնի մասին:
Առուշանյանի պաշտպան, Փաստաբանների պալատի անդամ Լիպարիտ Սիմոնյանը Panorama.am-ի թղթակցի հետ զրույցում ներկայացրեց, որ իր պաշտպանյալին առաջադրված մեղադրանքը հիմնված է միայն գործով անցնող Արտաշես Գալուստյանի ցուցմունքի վրա, իսկ նրա մեղադրանքի հիմքում դրված մյուս նյութերը, որոնք կոչված էին հիմնավորելու վերջինիս ցուցմունքը, հակասության մեջ են գտնվում Գալուստյանի ցուցմունքների հետ, այսինքն` հերքում են այն:
«Ավելին, Արտաշես Գալուստյանի ցուցմունքը հերքվում է նաև գործով ձեռք բերված ապացույցներով և հաստատվում է նրա ցուցմունքների մտացածին լինելու և իրականության չհամապատասխանելու մասին», -նկատեց փաստաբանը:
Սակայն փաստաբան Սիմոնյանը մատնանշում է «Մանանա Գրեյն» ՍՊԸ կողմից վարույթն իրականացնող մարմնին տրամադրված տեղեկանք, որից պարզվել է, որ «Մանանա Գրեյն» ՍՊԸ կողմից «Էյչ-Էս-Բի-Սի» բանկի հաշվարկային հաշվին 2011թ-ի մայիս ամսից մինչև հունիսի 5-ը` 200 միլիոն կամ դրանից ավելի գումար մուտք չի արվել հետևաբար, «Էյչ-Էս-Բի-Սի» բանկի համակարգչային բազայում նման տվյալ չէր կարող լինել, և Աշոտ Առուշանյանն էլ այդպիսի տվյալ չէր կարողանա ունենալ ու ավելին, փոխանցել այլ անձանց:
«Այդ փաստաթղթի համաձայն, մայիս ամսվա և մինչև հունիսի 5-ը տեղափոխված գումարը, ամենաքիչ քանակությունը կազմել է 5 միլիոն դրամը` 14.05.2011թ-ին, իսկ ամենախոշոր չափի գումարը կազմել է` 179 միլիոն դրամը` 17.05.2011թ: Ակնհայտ է, որ 5 միլիոնը նման չէ 10 միլիոնի, իսկ 179-ը 200 միլիոնի: Նշված փաստաթղթում առկա է 200 միլիոնից ավելի տեղափոխելու մեկ դեպք, ուղղակի նախաքննական մարմինը իմ կարծիքով, թելադրելուց կամ Արտաշես Գալուստյանը իրականությանը չհամապատասխանող տվյալ ներկայացնելուց հաշվի չէին առել, որ «Մանանա Գրեյն» ՍՊԸ կողմից այդ 200 միլիոնից ավելի գումար տեղափոխելու օրը` 07.06.2011թ Աշոտ Առուշանյանը արդեն մի քանի օր Հայաստանում չէր գտնվել և հետևապես նման ենթադրյալ տվյալներ չէր կարող ձեռք բերել համակարգչային բազայից և տրամադրեր ուրիշներին»,- ասում է փաստաբանը:
Սիմոնյանի ներկայացմամբ, իր պաշտպանյալը 2009 թ.-ին ընդունվել է Երևանի Պետական Համալսարանի Տնտեսագիտության ֆակուլտետի ասպիրանտուրան, և 2012 թ.-ի հունիսի 28-ին նախատեսված էր նրա՝ տնտեսագիտության թեկնածուի գիտական աստիճանի համար ատենախոսության հրապարակային պաշտպանությունը՝ «Հարկային վարչարարության կատարելագործման խնդիրները Հայաստանի Հանրապետությունում» թեմայով, որը սակայն տեղի չի ունեցել` Առուշանյանի` անազատության մեջ գտնվելու պատճառով:
Առայժմ հայտնի չէ, թե ինչ արդյունքներ կտա նոր քննությունը, բայց փաստաբանը հույս ունի, որ իր պաշտպանյալ Աշոտ Առուշանյանի նկատմամբ դատարանը արդարացման դատավճիռ կկայացնի:
«Աշոտ Առուշանյանի մեղքը ապացուցված չէ», -պնդեց փաստաբանը:
Լրահոս
Տեսանյութեր
Մի կողմում հայ ժողովուրդն է, մյուս կողմում թշնամին և մեր իշխանությունը միասին. Դավիթ Անանյան