Ձեր վստահելի աղբյուրը

«Պետք է Ադրբեջանում հայ գերի Կարեն Պետրոսյանի սպանության  գործով ընդդեմ Ադրբեջանի գանգատ ներկայացնել Մարդու իրավունքների եվրոպական դատարան ու միջնորդել, որ այդ գործը քննվի Մանվել Սարիբեկյանի գործի հետ, քանի որ շատ նման գործեր են՝ փաստերը, իրավունքի վերաբերյալ հարցերը նույնանման են»,- Panorama.am-ի հետ զրույցում նման կարծիք հայտնեց փաստաբան Արա Ղազարյանը:

Հիշեցնենք, որ նախօրեին Հայաստանի Տավուշի մարզի Չինարի գյուղի բնակիչ Կարեն Պետրոսյանը գերեվարվել է Ադրբեջանում, իսկ այսօր ադրբեջանական լրատվամիջոցները գրեցին, իբր հանկարծամահ եղել:

ՀՀ Գեղարքունիկի մարզի Թթուջուր գյուղի բնակիչ Մանվել Սարիբեկյանը գերեվարվել էր 2010թ. սեպտեմբերի 18-ին, իսկ 2010թ. հոկտեմբերի 4-ին Ադրբեջանի պաշտպանության նախարարությունը և զինվորական դատախազությունը համատեղ հայտարարություն էին տարածել, թե Մանվել Սարիբեկյանն ինքնասպան է եղել կալանքի տակ գտնվելիս: «Արնի Քնսալթ» փաստաբանական գրասենյակի ղեկավար, փաստաբան Արա Ղազարյանը Մանվել Սարիբեկյանի գործով ընդդեմ Ադրբեջանի գանգատ է ներկայացնել Մարդու իրավունքների եվրոպական դատարան, որի դատաքննությունը դեռ չի սկսվել:

«Կոնվենցիայի 2-րդ հոդվածի համաձայն՝ Ադրբեջանի Հանրապետությունը՝ որպես պատասխանող պետություն, պատասխանատվություն է կրում հոդվածի նյութական իրավունքի և դատավարական իրավունքի բաղադրիչների ներքո: Անկախ այն հանգամանքից, թե որն է եղել Մանվելի մահվան պատճառը՝ պետությունը պատասխանատու է իր բացառիկ իրավազորության ներքո՝ կալանավայրում, գտնվող անձի կյանքի համար, քանի որ կրում է պոզիտիվ պարտականություն՝ կալանավորների կյանքի ու առողջության պահպանման համար»,-գործի մասին գրել էր «Փաստինֆոն»:

«Կարևոր է, որ Բաքվում սպանված Կարեն Պետրոսյանի գործով էլ գանգատ ներկայացնել եվրոպական դատարան: Իսկ երկու գործերի միասին քննությունն ավելի կամրապնդի մեկը մյուսին: Դա ցույց է տալիս որոշակի պրակտիկա, որը վարվում է Ադրբեջանի իշխանություններից կողմից: Սա նշանակում է կա օրինաչափությունը, իսկ եթե կա օրինաչափություն, առաջին հերթին վերագրվում է պետական քաղաքականությանը»,- մեզ հետ զրույցում ասաց փաստաբանը:

Ըստ նրա, պետք է լինի անհատական գանգատ, այսինքն ներկայացվի մահացածի ծնողների կողմից:

Արա Ղազարյանը միաժամանակ առաջարկեց Հայաստանին` ընդդեմ Ադրբեջանի հայտ ներկայացնել Մարդու իրավունքների եվրոպական դատարան կամ Արդարադատության միջազգային դատարան կապված Ադրբեջանի կողմից Հայաստանի տարածքային իրավազորությունը պարբերաբար խախտելու, երկրի ներքին գործերին միջամտելու և պետության ներսում կամ սահմանամերձ շրջաններում սթափ ռազմական գործողություններ կատարելու համար, որի ընթացքում խախտվում են մարդու իրավունքները:

«Հասունացել է այդ պահը: Կարծում եմ՝ կարևոր չէ, թե քաղաքական գործընթաներ կան, թե ոչ: Սա իրավական գործընթաց է լինելու: Պետք է այս ուղղությամբ մտածել»,- նշեց փաստաբանը:

Ըստ նրա, պետք է նաև Հակոբ Ինջիղուլյանի գործով էլ դիմել Մարդու իրավունքների եվրոպական դատարան. «Այս դեպքերում գործ ունենք խոշտանգման կամ կյանքի իրավունքից զրկելու հետ: Բայց պետք է դիտարկել ընդհանուր կոնտեքստում՝ հայատյացություն, որը կրկին մարդու իրավունքների հարց է բարձրացնում, որովհետև խոսքը խտրականության մասին է»:

Հիշեցնենք, որ 2013 թ. օգոստոսի 7-ի լույս 8-ի գիշերը ՀՀ քաղաքացի Հակոբ Ինջիղուլյանը տեղանքում չկողմնորոշվելու հետևանքով պատահաբար հատելով շփման գիծը հայտնվել էր ադրբեջանական զորքերի պահպանության տարածքում և գերեվարվել վերջիններիս կողմից: Մինչ օրս նա գերության մեջ է: