Ձեր վստահելի աղբյուրը

Մատաղիսի հայտնի գործը կրկին զինվորական դատախազությունում է և կրկին ընթանում է նույն ոճով:

Հիշեցնենք, որ անցյալ տարի դեկտեմբերի 22-ին Վճռաբեկ դատարանը որոշում կայացրեց անհապաղ ազատել կալանքից 2004 թվականի ապրիլից «Նուբարաշեն» քրեակատարողական հիմնարկում գտնվող երեք երիտասարդների` Ռազմիկ Սարգսյանին, Մուսա Սերոբյանին և Արայիկ Զալյանին: Նրանք մեղադրվում էին իրենց հետ Մատաղիսի նույն զորամասում ծառայող երկու զինվորների սպանության համար: Առաջին ատյանի դատարանը վերջիններին դատապարտել էր 15 տարվա, իսկ Վերաքննիչ դատարանը` ցմահ ազատազրկման: Իսկ տղաները շարունակ պնդում են, որ իրենք որևէ առնչություն այդ սպանության հետ չունեն: Այդպիսով, Վճռաբեկ դատարանն անցյալ տարեվերջին բեկանեց երկու ատյանների որոշումները, գործն ուղարկեց լրացուցիչ նախաքննության, իսկ երիտասարդներին անհապաղ ազատեց կալանքից:

Ինչպես Panorama.am-ի հետ զրույցում վստահեցրեց գործով նախկին փաստաբան Զարուհի Փոստանջյանը, ով չի դադարում այս գործով հանդես գալ որպես շահագրգիռ անձ, այսօր գործը կրկին զինվորական դատախազությունում է և սա նշանակում է, որ կրկին ընթանում է նույն ուղղությամբ: Լրացուցիչ նախաքննության միակ տարբերությունն այն է որ երիտասարդներն այժմ ազատության մեջ են: «Այն դատախազը, որը դատարանում երիտասարդների համար ցմահ ազատազրկում է պահանջել, բնականաբար, չի կարող անաչառ լինել»,-ասում է նախկինում գործում ընդգրկված փաստաբանը: Զ. Փոստանջյանը վստահ է, որ վարույթն իրականացնող մարմինն ի սկզբանե որդեգրել էր ապօրինի մեղադրանքը դատարանում ամեն կերպ հաստատելու քաղաքականություն և այսօր էլ հետ չի կանգնի դրանից: Իսկ ասածը հիմնավորում է նրանով, որ «արդեն մի քանի անգամ կեղծ փորձաքննություն իրականացրած կենտրոնին կրկին փորձաքննություն են պատվիրել»:

Զ. Փոստանջյանը նաև տեղեկացրեց, որ գործը զինդատախազությունից տեղափոխելու մասին պաշտպանական կողմի բացարկը մերժվել է, նրանք պատրաստվում են բացարկի մերժման մասին բողոք ներկայացնել ՀՀ վճռաբեկ դատարան: Զարուհի Փոստանջյանը վստահ է, որ չնայած զինդատախազության ջանքերին, միևնույն է, որևէ մեղադրանք չեն կարող հիմնավորել:

Ավելին, պնդում է, որ Մատաղիսի գործով հասնելու են նրան, որ ռազմական ոստիկանության որոշ աշխատակիցներ, քննիչներ, զինդատախազության դատախազներ` Անահիտ Եղիազարյանը, Աշոտ Ապրեսյանը, նախկին զինդատախազ Գագիկ Ջհանգիրյանը և ներկայիս զինվորական դատախազ Արմեն Խաչատուրյանը պատասխանատվության ենթարկվեն: «Նրանք պետք է պատասխանատվություն կրեն այն երեք տարիների համար, որ խլեցին 20 ամյա երիտասարդների կյանքից նաև նրանց առողջությունը քայքայելու համար: Պետք է պատասխանատվության ենթարկվեն, որովհետև իրենց մեղքով է գործը հայտնվել դատարանում»,-նշում է նախկին փաստաբանը: Նա վստահեցնում է, որ պատասխանատվությունից չեն խուսափելու նաև այս գործով դատավորներ` Վոլոդյա Մանասարյանը, Մհեր Արղամանյանը, Արթուր Պողոսյանը և Արմեն Դանիելյանը:

Իսկ ընդհանրապես, արդեն ԱԺ պատգամավոր Պետաիրավական հանձնաժողովի անդամ Զարուհի Փոստանջյանը լրացուցիչ նախաքննության ինստիտուտը աբսուրդ է համարում: «Դատախազությունն օգտվում է այդ ինստիտուտի առկայությունից, քանի, որ նրանց կազմած «բռակ» գործերը վերադարձվում են լրացուցիչ նախաքննության և արդյունքում քրեական գործերը թաղվում են»:

Իրավաբանն անհասկանալի է համարում, թե ինչպես կարող է դատարանը կայացրած որոշումով հերքի անձի մեղավորությունը, բայց գործը վերադարձնի լրացուցիչ նախաքննության: Նրա համոզմամբ, «մեր քրեադատավարական պրակտիկան ցույց է տալիս, որ այդ դեպքերում նախաքննական մարմինը, նոր գործողություներ չի կատարում, նույն ձևով էլ գործը կրկին ներկայացնում է դատարան»: Զարուհի Փոստանջյանը լրացուցիչ նախաքննությանն այսպիսի բացատրություն է տալիս. «դատարանը կարծես բռակ գործերը շտկելու շանսեր է տալիս, որպեսզի ինքն էլ կարողանա մի բան անել»: