Ձեր վստահելի աղբյուրը

Այսօր ՀՀ նախագահ Սերժ Սարգսյանն իր նստավայրում հանրապետության մի քանի բնագավառների՝ հայոց ցեղասպանության ճանաչման նշանակալի գործի, բնական, հումանիտար գիտությունների, ֆիզիկայի, արվեստի, գրականության, բժշկագիտության, մարդասիրական արժեքների տարածմանն ուղղված գործունեության ծրագրերի, կերպարվեստի և կինոյի, դասական երաժշտության 26 ներկայացուցիչների ընդունեց և մրցանակներ շնորհեց: Իր ելույթի սկզբում նախագահը նախ բոլոր ներկաներին շնորհավորեց առաջիկա տոնի`՝ Հանրապետության օրվա կապակցությամբ. « 90 տարի առաջ Սարդարապատում, Ղարաքիլիսայում, Բաշ-Ապարանում տարած պատմական հաղթանակների շնորհիվ հայ ժողովուրդը վերականգնեց իր անկախ պետականությունը: Անկախ պետականության վերականգնումը ենթադրում է նաև ժողովրդի արժեքային համակարգի՝ լայն առումով մշակույթի զարգացումը, համակարգ, որ դարեր շարունակ եղել է մեր ինքնության առանցքը»,-ասաց հանրապետության նախագահը:

Ս. Սարգսյանը համոզմունք հայտնեց, որ «հայկական պետությունը հայ մշակույթը պահպանելու, արդյունավետ իրականացնելու ճանապարհին լուրջ անելիքներ ունի»: «Հայաստանի տնտեսական զարգացմանը և միջազգային հեղինակության բարձրացմանը զուգընթաց` մեզ անհրաժեշտ է գիտական և հոգևոր մշակութային զարթոնք»,- նշեց նա: Երկրի նախագահը կարևորեց մշակութային կյանքում «խորքային և որակական» փոփոխությունների անհրաժեշտությունը, մտավորականի դերի և կերպարի արժեվորումը:

«Եթե մի երկրում դպրոցականները երազում են ոչ միայն իրավաբան ու բիզնեսմեն դառնալու, այլև` գիտնական ու երաժիշտ, համոզված եմ, որ նման երկրի գործերը բնականոն ընթացք կունենան»,-ընդգծեց նախագահն, մատնանշելով, որ դրա համար նոր սերնդին պետք են օրինակելի գործեր և մարդիկ:

Նախագահի բացման խոսքից հետո սկսվեց մրցանակների հանձման արարողությունը: Հայոց ցեղասպանության ճանաչման գործում նշանակալի ավանդ ներդրած անձանց շնորհվող մրցանակի (10 հազարական ԱՄՆ դոլար) արժանացան Ռուսաստանից՝ պրոֆեսոր Յուրի Բարսեղովը և Ֆրանսիայից՝ պատմաբան Իվ Տերնոնին: Բնական գիտությունների ասպարեզից (5000- ական ԱՄՆ դոլար) մրցանակներ հանձնվեցին ֆիզմաթ գիտությունների թեկնածուներ Արամ Պետրոսյանին, Հարություն Կարապետյանին և Ռուբեն Ափրեյանին, ֆիզիկայի ասպարեզից՝ ֆիզմաթ գիտությունների դոկտոր Հայկ Սարգսյանին, ֆիզմաթ գիտությունների թեկնածուներ Կարեն Դվոյանին և Լուդվիգ Պետրոսյանին, արվեստից՝ Արամազդ Կարապետյան-Շիրազին, գրականությունից՝ հրապարակախոս Զորի Բալայանին, հումանիտար գիտություններից՝ պատմական գիտությունների դոկտոր, պրոֆեսոր Նիկոլայ Հովհաննիսյանին, բժշկագիտությունից՝ բժշկական գիտությունների դոկտոր-պրոֆեսոր Գեորգի Օկոեվին, կենսաբանական գիտությունների թեկնածու Կարեն Ջինանյանին, բժշկական գիտությունների դոկտոր Կարեն Առուստամյանին և բժշկական գիտությունների թեկնածու Էմմա Տոտոյանին:

«Մարդասիրական արժեքների տարածմանն ուղղված գործունեութուն և ծրագիր» անվանակարգի նախագահի մրցանակին արժանացավ «Այաս» ծովային հետազոտությունների ակումբի նախագահ Կարեն Բալայանը: Մրցանակներ շնորհվեցին նաև «Հանրապետության նախագահի երիտասարդական մրցանակ» անվանակարգում (2500 ական ԱՄՆ դոլար): «Կերպարվեստ և կինո» ոլորտից՝ Լիլիթ Քանքանյանին, Նարեկ Արզումանյանին, Նարինե Մանուչարյանին և Լիանա Խաչատրյանին, գրականության ոլորտից՝ Ռուզաննա Ոսկանյանին, դասական երաժշտության բնագավառից՝ Լիլիթ Գրիգորյանին և Ասատուր Բալջյանին:
Նշենք, որ «Հանրապետության նախագահի մրցանակ»-ը շնորհվում է 2001 թ-ից՝
«Հայաստան համահայկական հիմնադրամի» ծրագրերի շրջանակներում: Հաղթողներին ընտրում են մրցութային հանձնախմբերը, որտեղ ընդգրկվում են տարբեր ոլորտների հեղինակավոր մասնագետները: