Ձեր վստահելի աղբյուրը

Թուրքիան հանդես է եկել Կովկասյան պլատֆորմ ստեղծելու նախաձեռնությամբ ու այդ առիթով շահագրգռված է բարելավել Հայաստանի հետ իր փոխհարաբերությունները, քանի որ պլատֆորմի ստեղծման հարցում Հայաստանի դրական մոտեցումն ու գորխընթացին մասնակցությունը կարևոր նշանակություն ունի: Այս մասին ասաց Գիտությունների ազգային ակադեմիայի (ԳԱԱ) Արևելագիտության ինստիտուտի տնօրեն Ռուբեն Սաֆրաստյանը:

«Պատկերացնու՞մ եք, եթե Հայաստանը հրաժարվի մասնակցել պլատֆորմի շուրջն ընթացող բանակցություններին… Վրաստանն արդեն հրաժարվել է: Փաստորեն, Հարավկովկասյան երկրներից կմնա միայն Ադրբեջանը, իսկ դա Թուրքիայի համար ձեռնտու չէ»,-ասաց թուրքագետը: Ըստ Ռ. Սաֆրաստյանի, նոր է դիմագծվում, թե ինչ տեսք կունենա տարածաշրջանի կոնֆիգուրացիան, դրա համար էլ այս փուլում Թուրքիան շահագրգռված է ակտիվորեն ներգրավվել տարածաշրջանում ընթացող բոլոր գործընթացներին:

«Թուրքիայի այս երկու ակնկալիքները, որ ունի Հայաստանի նկատմամբ` մեր առավելություններն են այդ երկրի հետ հարաբերություններում: Մենք պետք է կարողանանք դրանք ճիշտ օգտագործել»,-նշեց Ռ. Սաֆրաստյանը:

Ըստ նրա, Թուրքիան հասկանում է, որ Վրաստանը չի մասնակցելու պլատֆորմի կայացման գործընթացներին ու շատ է կարևորում Հայաստանի դերը, քանի որ միայն Ադրբեջանի մասնակցությամբ Կովկասյան պլատֆորմը չի կայանա: Պլատֆորմի կայացման գործում Թուրքիայի շահը ներկայացնելով, թուրքագետը նկատեց, որ համաձայն չէ այն վերլուծաբանների հետ, որոնք գտնում են, թե պլատֆորմը ռուս-թուքական հարաբերությունների մերձեցման արդյունք է:

«Ես գտնում եմ, որ Թուրքիայի կողմից պլատֆորմի նախաձեռնությունը փորձ է մեր տարածաշրջանում հնարավորինս ուժեղացնելու իր ազդեցությունը: Վրաստանը, որպես Թուրքիայի դաշնակից արդեն գոյություն չունի, այս պայմաններում, երբ աշխարհաքաղաքական իմաստով կտրուկ ուժեղացավ Ռուսաստանի դիրքը, Թուրքիան հանդես է գալիս նախաձեռնությամբ ու դրա մեջ ներգրավվում է Ռուսաստանին ու դուրս է թողնում Ամերիկային»,-պարզաբանեց Ռ. Սաֆրաստյանը: 

Սաֆրաստյանն այս քայլը գնահատում է որպես Թուրքիայի կողմից փորձ` տարածաշրջանը Ռուսատանի հետ կիսելու: Իսկ Ռուսաստանը, Ռ. Սաֆրաստյանի դիտարկումների համաձայն` կիսվելու ցանկություն չունի:

Այսպիսով, Կովկասյան պլատֆորմ ստեղծելու Թուրքիայի նախաձեռնությունը թուրքագետն անհեռանկար համարեց, սակայն նշեց, որ այդ բանակցությունների ընթացքում թե´ Թուրքիան, թե´ Ռուսաստանը որոշակի նպատակների հասնելու ակնկալիքներ ունեն: