Ձեր վստահելի աղբյուրը

Մանկատների շրջանավարտներին պետական աջակցություն նախատեսող ծրագրով բյուջետային միջոցների օգտագործման վերահսկողության արդյունքում Հայաստանի վերահսկիչ պալատը լուրջ չարաշահումներ է հայտնաբերել: Ինչպես այսօր ՎՊ խորհրդի նիսում նշեց այդ կառույցի գլխավոր աուդիտոր Խաչիկ Վարդանյանը, պետական աջակցությունը նախատեսում է մանկատան շրջանավարտներին 10 տարի ժամանակով անհատույց մեկ սենյականոց բնակարաններ տրամադրել, որոնք ըստ տեխնիկական նկարագրի պետք է լինեն բնակության համար պատրաստի վիճակում և չունենան վերանորոգման կարիք, մինչդեռ ՎՊ վերահսկողության արդյունքում պարզվել է, որ, ստուգված բնակարաններում բացակայել է ջեռուցման համակարգը, մանրահատակը, դրանց մի մասը գտնվել են ոչ բնակելի տարածքներում` տեխնիկական հարկերում, որտեղով անցնում են կոյուղագծերը:

Այս ծրագրի պատվիրատուն, ըստ ՎՊ նախագահ Իշխան Զաքարյանի սոցիալական ապահովության նախարարությունն է, ով ծրագրի կատարման համար պայմանագիր է կնքել «Սոկոլ» կազմակերպության հետ: Ըստ այդմ, 2003-2008 թվականներին պետբյուջեից այդ նպատակով հատկացվել է 1 միլիարդ 439 միլիոն դրամ, սակայն ծրագիրը կատարվել է 59 տոկոսով: Ընդհանուր առմամբ կազմակերպության կողմից չի գնվել 92 բնակարան` 509 միլիոն դրամի: 2008 թվականին նույն նպատակով հատկացվել է 235 միլիոն դրամ, սակայն ոչ մի բնակարան այս տարի չի գնվել մանկատան շրջանավարտների համար:

«Խայտառակ վիճակ է տիրում բնակարաններում, որոնք մենք հատիկ-հատիկ նայել ենք: Ոչ մեկիս նյարդերը չեն դիմացել առաջին քննարկումների ժամանակ, քանի որ խոսքը վերաբերում է մանկատան երեխաներին»,- իր խոսքում նշեց ՎՊ նախագահն ու հավելեց, որ «Սոկոլ» կազմակերպության կողմից գնված բնակարանները 38 քառակուսի մետրի փոխարեն եղել են 25-32 քմ, դրանց մի մասը ոչ բնակելի հարկերում են, բացակայում է հատակը, առաստաղը բարակ գիսային շերտ է, խոնավությունից ծեփերը թափվում են, բնակարանները չունեն նախամուտք, որոշ դեպքերում պատուհանները հանված են կամ դեֆորմացված, բացակայում է անգամ առաստաղը:

Այս առնչությամբ «Ժառանգության» պատգամավոր Անահիտ Բախշյանը հայտարարեց, որ այն քաղաքական ուժը, որը պատասխանատու է տվյալ նախարարության համար, պետք է պատասխան տա ծնողազուրկ երեխաների հաշվին բյուջեի միջոցները վատնելու համար: Նշենք, որ խոսքը վերաբերում է Դաշնակցությանը, ում վստահված է սոցիալական ապահովության նախարարությունը: Ի. Զաքարյանը դրան ի պատասխան նշեց, որ իրենք չեն ցանկանում մտնել քաղաքական դաշտ, այլ միայն իրենց գործն են կատարում: Նա միայն լրագրողներին հայտնեց, որ «Սոկոլ» կազմակերպությունը սերմերի ծրագիր է շահել նաև գյուղատնեսության նախարարությունում և որի տնօրենի անունը Լևոն Աղաբաբյան է: