Ձեր վստահելի աղբյուրը

Մարտի 1-ի դեպքերն ուսումնասիրող ԱԺ ժամանակավոր հանձնաժողովն այսօր փակ նիստում լսել է ՀՀ ոստիկանության զորքերի նախկին հրամանատար, գեներալ-լեյտենանտ Գրիգոր Գրիգորյանին, որից հետո տեղի ունեցած ասուլիսի ժամանակ նրանք հայտարարել են, որ հենց Գրիգոր Գրիգորյանի հրահանով է դիպուկահարը կրակել ու վիրավորել ցուցարարներից մեկին: Թեև նիստը փակ է եղել, սակայն, ըստ հանձնաժողովի նախագահ Սամվել Նիկոյանի, այն ամբողջությամբ նկարահանվել է, և ցանկացողները կարող են տեսաերիզը դիտել:

Նիստից հետո հանձնաժողովի անդամները հանդիպել են լրագրողների հետ և ներկայացրել նիստի մանրամասները: Ըստ այդմ, ոստիկանության զորքերի նախկին հրամանատարը հանձնաժողովին տեղեկացրել է, որ ինքը դիպուկահարին ցուցարարներից մեկին «վնասազերծելու» հրահանգ է տվել այն բանից հետո, երբ վերջինս կրակել ու վիրավորել է ներքին զորքերի զինծառայող Տիգրան Աբգարյանին: Գ. Գրիգորյանն ասել է, որ դիպուկահարը, որը եղել է հատուկ նշանակության ջոկատից և գործել է միայնակ, ոտքից վիրավորել է ցուցարարին, սակայն հետո ցուցարարը փախել է, և նրա ինքնությունը չի պարզվել:

ՈԶ նախկին հրամանատարը հայտնել է նաև, որ իր` որպես «կռված մարդու» կարծիքով, ցուցարարները ունեցել են զենք, այդ թվում նաև` ավտոմատ, քանի որ ինքը լսել է նման ձայներ: Նա հանձնաժողովին տեղեկացրել է նաև, որ ցուցարարները նպատակ չեն ունեցել սպանել ոստիկաններին, այլ միայն վախեցնելու համար օդ են կրակել կամ ոստիկանների ոտքերի տակ:

Գեներալ-լեյտենանտը նշել է, որ ցուցարարները օգտագործել են նաև «Զարյա» տեսակի ձայնալուսային ազդեցության հատուկ միջոցներ, նռնակներ, «ոզնի», քարեր և հեղուկով շշեր: Գ. Գրիգորյանը փոխանցել է, որ ոստիկանությունն ունեցել է 10 տեսակի հատուկ միջոցներ, որոնցից օգտագործվել են 6-ը, մինչդեռ պարոն Գրիգորյանը նկատել է, որ 20 տեսակի հատուկ միջոցներ են եղել, ինչը ենթադրում է, որ ցուցարարները ևս կիրառել են «Զարյա» տեսակի հատուկ միջոց: Ընդ որում` գեներալը մինչև մարտի 1-ը չճ\տված տեղեկություններ է ունեցել, որ ցուցարարները Վրաստանից զենք են ներկրել` ոստիկանների դեմ կիրառելու համար, սակայն տեղեկատվությունը Վրաստանի իշխանությունների հետ չի ճշտվել` ոչ հավաստի լինելու պատճառով:

Հարցին, թե արդյոք հանձնաժողովը դիմե՞լ է Վրաստանի դեսպանատուն, ճշտելու համար, թե հնարավո՞ր է առանց թույլտվության զենք ներկրել Հայաստան, Ս. Նիկոյանը պատասխանել է, որ չեն դիմել ու հավելել, որ մեծ դժվարություն չէ մեկ արկղ զենք ներկրելը:

Գ. Գրիգորյանը նաև ասել է, որ իրենց կիրառած հրազենից մարդ չի մահացել, թեև հայտնի է, որ 10 զոհերի մեծ մասը հենց հրազենից են մահացել:

Հիշեցնենք, որ ցուցարարներից մի քանիսը զոհվել են հենց հրազենային վնասվածքներից: Նա հայտարարել է, որ հնարավոր չէ պարզել, թե «Չերյոմուխա 7» տեսակի հատուկ միջոց կիրառած 4 հոգուց ո՞ր մեկի կրակոցն է դարձել ցուցարարի մահվան պատճառ, ինչին հանձնաժողովի անդամ Գուրգեն Արսենյանը արձագանքել է. «Հնարավոր է պարզել»:

Դրանից զատ, Ս. Նիկոյանը լրագրողներին տեղեկացրել է, որ իրենք դիմել են ԱՄՆ դեսպանատուն` «Չերյոմուխա 7»-ի պարկուճները դատաձգաբանական փորձաքննության ենթարկելու հարցում օգնելու համար: Այս առնչությամբ նիստին առաջին անգամ մասնակցող ՆԺԿ ղեկավար Արամ Կարապետյանն ասել է, որ ինքը ռուսական շրջանակների օգնությամբ կկարողանա պարզել, թե որ հատուկ միջոցին են պատկանում պարկուճները: