Ձեր վստահելի աղբյուրը

Չեմպիոնների լիգայի որակավորման երկրորդ փուլում Երևանի «Փյունիկի» մրցակիցը խորվաթական «Դինամոն» է, որի հետ առաջին` տնային խաղում երևանցի ֆուտբոլիստները բավարարվեցին ոչ-ոքի արդյունքով: Հարկ է նշել, որ «Դինամոն» շատ լուրջ թիմ է, և նրա տարեկան բյուջեն, ըստ մեզ հասած տեղեկությունների, կազմում է մոտ 20 մլն դոլար: Հետևաբար, այդ ակումբը համալրման առումով, ի տարբերություն «Փյունիկի», շատ ավելի մեծ հնարավորություններ ունի և կարող է հրավիրել առավել բարձրակարգ ֆուտբոլիստների: Խաղը ցույց տվեց, որ, այո, «Դինամոն» հզոր թիմ է, որն իր հսկա ներուժը դեռ չի բացահայտել, քանզի առայժմ գտնվում է նախապատրաստական փուլում: Կասկած չկա, որ պատասխան խաղում մեր ֆուտբոլիստների համար շատ դժվար է լինելու, չնայած կան հանգամանքներ, որոնք կարծես թե Հայաստանի չեմպիոնի օգտին են. Բայց այդ մասին կխոսենք այս նյութի վերջում: Իսկ մինչ այդ կանդրադառնանք առաջին հանդիպման ընթացքում խաղադաշտում ծավալված գործողություններին:

Ասենք, որ «Փյունիկի» պաշտպանության ձախ թևը վստահվել էր Էմանուել Մբոլային: Նրա կողքին տեղ էր գրավել Վահագն Մինասյանը: Կենտրոնում Կարեն Խաչատրյանն էր, իսկ աջ թևում, ինչպես միշտ, գործում էր թիմի ավագ Սարգիս Հովսեփյանը: Վերջինս հաճախ էր միանում թիմի գրոհներին, փորձում սրություն մտցնել առջևում: Նրան դա հաջողվում էր, չնայած զգացվում էր, որ Սարգիսը երկար ուղերթերից հետո հոգնում է և դժվարությամբ է վերադառնում պաշտպանություն:

Հենակետային կիսապաշտպանի դիրքում գործում էին Արթուր Յուսպաշյանն ու Կառլեն Մկրտչյանը, իսկ թևերում` Գևորգ Ղազարյանն ու Էդգար Մալաքյանը: Առաջ քաշված կիսապաշտպանի պարտականությունները կատարում էր Դավիթ Մանոյանը, իսկ հարձակման սուր ծայրում դիրքավորվել էր Մարկոսը:

Հյուրերը, կարելի է ասել, հաղթանակի ակնկալիքով էին ժամանել Երևան և խաղում էին երկու ընդգծված հարձակվողով: Առջևի գծում Մարիո Մանձուկիչն ու Դիմիտրիոս Պապադոպուլոսն էին, կենտրոնից նրանց օգնում էր Իվիցա Վորդոլյակը: Կիսապաշտպանության թևերում արագաշարժ Ջորջ Կամպոսն ու Իլիա Սիվոնջիչն էին, ովքեր քիչ տհաճություններ չպատճառեցին մեր թիմի ֆուտբոլիստներին: Միլան Բադելը պաշտպաններից առաջ էր դիրքավորվել, իսկ պաշտպանական քառյակն այսպիսի տեսք ուներ` Կառլոս Սանտոս դե Հեսուս, Դեյան Լովրեն, Իգոր Բիսչան և Օելտոն Սանթոս:

Ինչպես արդեն նշեցինք, առաջին կեսում հյուրերը նկատելի խաղային ու տարածքային առավելություն ունեին և գրոհները զարգացնում էին աջ թևում` զգալով, որ Մբոլան չի հասցնում ֆուտբոլիստների հետևից: Նման ճեղքումներին սովորաբար միանում էր նաև պաշտպան Օելտոն Սանթոսը: Վերջինիս ու Իլիա Սիվոնջիչի խաղային կապն անխափան էր գործում, և Վահագն Մինասյանը ստիպված տեղաշարժվում էր դեպի ձախ` փոխապահովելու խաղընկերոջը: Բավական է նշել, որ առաջին կեսում հայ ֆուտբոլիստները միայն մեկ անգամ սպառնացին մրցակցի դարպասին: 12-րդ րոպեին Մարկոսն անսպասելիորեն խլեց գնդակը կենտրոնական պաշտպանից, խաբս տվեց նրան, դուրս եկավ հարվածային դիրք, սակայն շտապեց և թույլ հարվածեց: Դարպասապահ Բուտինան հանգիստ վերցրեց գնդակը: Իսկ «Դինամոն» աստիճանաբար, ի հաշիվ եզրային պաշտպանների, մեծ ուժեր էր նետում առաջ` գոլ խփելու և հաջորդ փուլ մտնելու խնդրի լուծումը հեշտացնելու համար: Վտանգավոր պահերը «Փյունիկի» դարպասի մոտ հաջորդում էին միմյանց, սակայն կամ պաշտպաններն ու դարպասապահը կարողանում էին չեզոքացնել սպառնալիքները, կամ էլ պարզապես մարզական բախտն էր ժպտում մեր թիմին: Իսկ 32-րդ րոպեին Էդվարդ Հովհաննիսյանն ստիպված էր ցուցադրել իր ողջ վարպետությունը, որպեսզի Միլան Բադելի հարվածից հետո գնդակը չհայտնվի դարպասում:

Առաջին կեսում հայ ֆուտբոլիստներին չէր հաջողվում գնդակ պահել, մեծ էր փոխանցումների խոտանը:
Երկրորդ խաղակեսում «Փյունիկն» ակտիվացավ և մեկնարկային երեք րոպեների ընթացքում 3 վտանգավոր գրոհ կազմակերպեց: Ճիշտ է` դրանք գոլային ավարտ չունեցան, սակայն ստիպեցին հյուրերին` մտածելու նաև պաշտպանության մասին: Այնուամենայնիվ, վերջիններս 49-րդ րոպեին կարող էին հաշվի մեջ առաջ անցնել, բայց Պապադոպուլոսի` սուր անկյան տակ կատարած դիմահար հարվածից հետո գնդակի ճանապարհը փակեց Էդվարդ Հովհաննիսյանը:

Արդեն 57-րդ րոպեին «Փյունիկը» կարող էր պատժել մրցակցին մեծ թվով գոլային հնարավորությունները չօգտագործելու համար: Անհատական բարձրակարգ խաղով Մարկոոսը ձերբազատվեց երկու պաշտպանների հսկողությունից և ուժգին հարված կատարեց: Այս անգամ Տոմիսլավ Բուտինային միայն հրաշքով հաջողվեց հեռացնել գնդակը:

Փոխարինման մտած Արթուր Եդիգարյանը կենտրոնում վստահություն հաղորդեց խաղընկերների գործողություններին: Նա շատ հաջող մտավ խաղի մեջ և կարողացավ «Դինամոյի» գրոհների դեմ ուժեղ պլացդարմ ստեղծել: Նաև մասնակցում էր գրոհներին, աչքի ընկնում ստեղծագործական խաղով: 60-րդ րոպեին հենց նա նուրբ փոխանցմամբ մրցակցի դարպասապահի դեմ մեն-մենակ հանեց Մարկոսին: Պաշտպաններից մեկին միայն վերջին պահին հաջողվեց գնդակը թռցնել նրա առջևից: 73-րդ րոպեին Սարգիս Հովսեփյանն աջ թևից ներխուժեց տուգանային հրապարակ, հայտնվեց հարվածային դիրքում, սակայն, ցավոք, ուժերը չբավարարեցին` դիպուկ հարված կատարելու համար:
Խաղավերջում հյուրերը նույնպես հնարավորություններ ունեին, սակայն գրեթե ողջ կազմով դարպասին գամված «Փյունիկին» հաջողվեց պահպանել 0:0 հաշիվը:

Լավ է, որ «Դինամոն» արտագնա խաղում չկարողացավ գրավել «Փյունիկի» դարպասը: Հայաստանի չեմպիոնը, իհարկե, կփորձի արդյունավետ գործել Զագրեբում կայանալիք պատասխան խաղում: Ի դեպ, մրցակիցը չի կարողանա օգտվել իր երկրպագուների աջակցությունից, քանի որ մարզադաշտը որակազրկված է ՈՒԵՖԱ-ի կողմից: Սա դրական հանգամանք է և կարող է նպաստել, որպեսզի «Փյունիկն» առավել անկաշկանդ խաղա:

«Փյունիկ» (Երևան)-«Դինամո» (Զագրեբ) 0:0
«Փյունիկ»- Էդվարդ Հովհաննիսյան, Սարգիս Հովսեփյան, Կարեն Խաչատրյան, Վահագն Մինասյան, Էմանուել Մբոլա, Գևորգ Ղազարյան (Ալբերտ Թադևոսյան, 79), Կառլեն Մկրտչյան, Արթուր Յուսպաշյան (Արթուր Եդիգարյան, 54), Էդգար Մալաքյան, Դավիթ Մանոյան, Մարկոս (Արտակ Ալեքսանյան, 68):
«Դինամո»- Տոմիսլավ Բուտինա, Դեյան Լովրեն (Տոմիսլավ Բարբարիչ, 46), Օելտոն Սանթոս, Ջորջ Սամիր Կրուզ Կամպոս, Կառլոս Սանթոս դե Հեսուս, Միլան Բադել, Մարիո Մանձուկիչ, Իվիցա Վորդոլյան, Իգոր Բիսչան,, Իլիա Սիվոնջիչ (Անդրեյ Կրամարիչ, 78), Դիմիտրիոս Պապադոպուլոս (Միրոսլավ Սլեպիսկա, 65):
Ք. Երևան, 14 հուլիսի 2009 թ., «Հանրապետական» մարզադաշտ:
Մրցավար` Պոլո Տագլիավենտո (Իտալիա):
Օգնականներ` Էլենիո դի Լիբերտատորե (Իտալիա), Քրիստիան Բագնոլի (Իտալիա):
4-րդ պաշտոնյա` Մաուրիսիո Սիամպի (Իտալիա):
Տեսուչ` Յան Լեմմեր (Լյուքսեմբուրգ):
ՈՒԵՖԱ-ի պատվիրակ` Ռենե Էբերլե (Շվեյցարիա):
Զգուշացումներ` Դավիթ Մանոյան (25), Դեյան Լովրեն (44), Կառլոս Սանթոս դե Հեսուս (50), Կարեն Խաչատրյան (52):