Ձեր վստահելի աղբյուրը

Ադրբեջանական բանակը, որն այդ երկրի ղեկավար Իլհամ Ալիևի համոզմամբ, անհրաժեշտության դեպքում ունակ է հայերին պատմական հայրենիքից դուրս մղել ցանկացած պահի, պարզվում է, ընթանում է ինքնաոչնչացման ճանապարհով, և ինչն առավել կարևոր է, բավականին տարօրինակ հանգամանքներում: Ստորև ներկայացվելիքն այլ կերպ մեկնաբանել չենք կարող:

Նախորդ շաբաթ տեղեկություն էր տարածվել այն մասին, որ ադրբեջանական բանակի ժամկետային զինծառայողներն անկանոն կրակահերթով սպանել ու վիրավորել էին իրենց անմիջական զինվորական ղեկավարներին:
Մասնավորապես, հուլիսի 13-ին Ադրբեջանի զինված ուժերի զորամասերից մեկում, որը գտնվում է Ֆիզուլիի շրջանում, Գյանջա քաղաքից զորակոչված զինվոր Էմին Ռահիմովը և նրա ծառայակիցներից մեկը կրակել էին հինգ սպաների վրա, որի արդյունքում զոհվել էին սպաներից երկուսը` մեկ ենթասպա և ավագ լեյտենանտ։Այնուհետև տեղեկություն տարածվեց, որ զոհերի թվում է նաև մայորի կոչումով մեկ սպա: Այս միջադեպի մասին հետագայում որևէ տեղեկություն չեղավ, քանի որ ադրբեջանական ԶԼՄ-ները թեման լռության էին մատնել, իսկ պաշտպանության նախարարությունն ընդհանրապես որևէ հայտարարություն չէր տարածել:

Եվ ահա երեկ` հուլիսի 30-ին, ադրբեջանական «Թուրան» գործակալությունը տարածում է տեղեկություն այն մասին, որ իրեն հաջողվել է պարզել հանցագործության շարժառիթները: «Բարձրաստիճան սպան ու ենթասպան փորձել են բռնաբարել երկու նորակոչիկների: Դրա պատասխանն էլ հենց եղել է «Կալաշնիկովի» կրակահերթը, որը Ռահիմովն արձակել է իրեն «նեղացնողների» վրա: Միայն սպայի մարմնի վրա քննիչները 27 հրազենային վնասվածք են հայտնաբերել»,- գրում է «Թուրանը»:

Աղբյուրի համաձայն, Ադրբեջանի պաշտպանության նախարարությունը մինչև օրս ոչ մի կերպ չի մեկնաբանել միջադեպը: Սակայն, ըստ ադրբեջանական գործակալության, պաշտպանության նախարար Սաֆար Աբիևն այս միջադեպի պատճառով պաշտոնանկ է արել Բեյլագանի բանակային կորպուսի հրամանատարի` անձնակազմի հետ աշխատանքների գծով տեղակալ, գնդապետ Սարվար Ջաբրաիլովին: Ըստ «Թուրանի», զորամասի հրամանատարական կազմից ոչ ոք միջադեպի հետևանքով պաշտոնանկ չի արվել, քանի որ «նրանք բարձրաստիճան անձանց բարեկամներ են»:
Ադրբեջանական գործակալությունը տեղեկացնում է, որ 2009 թվականին զինված ուժերում 50 զինծառայող է զոհվել, որոնցից միայն 12-ն են հայկական կողմի հետ փոխհրաձգության արդյունքում զոհվել:

«Մեծամասնությունը ոչ կանոնադրական հարաբերությունների զոհեր են»,- հայտնում է գործակալությունն ու նշում. «Այս իրավիճակում ծնողները` կախված ֆինանսական հնարավորություններից, փորձում են իրենց որդիներին ազատել ծառայությունից կամ հոգալ, որ նրանք քիչ թե շատ բարվոք զորամասում ծառայեն»:
Ադրբեջանցի լրագրողի հաջորդ մտահոգությունը պարզապես մարտահրավեր է Իլհամ Ալիևին, ով վստահցենում է, թե ադրբեջանական բանակն օր-օրի հզորանում է:

«Տեղի ունեցածի նկատմամբ երկրի քաղաքական ղեկավարության արձագանքի բացակայությունից դատելով` դժվար թե արժե բանակում բարոյական վիճակի բարելավման հույս ունենալ»,- գրում է «Թուրանը»: