Ձեր վստահելի աղբյուրը

ԱՄՆ դաշնային հետաքննության բյուրոյի (FBI) նախկին թարգմանիչ, Թուրքիայում ծնված (ըստ ադրբեջանցիների` ազգությամբ ադրբեջանցի) 34-ամյա Սիբել Էդմոնդսը, ով հայտնի է FBI-ի հետ կապված է իր սենսացիոն բացահայտումներով և ԱՄՆ-ում թուրքական հետախուզության գործունեության գաղտնազերծումներով, հայտարարել է, որ «Բեն Լադենի ընտանիքի անդամները մասնավոր ինքնաթիռներով 1997-2001 թթ-երին բազմիցս այցելել են Բաքու, ինչին տեղյակ են եղել և Ադրբեջանի, և Թուրքիայի ղեկավարությունները»:

Ինչպես հայտնում է «Մուսավաթքոմ» (musavat.com) կայքը` Սիբել Էդմոնդսը որպես թարգմանիչ է սկսել աշխատել FBI-ում` սեպտեմբերի 11-ի ահաբեկչական հարձակումներից հետո և այդ կառույցում աշխատել մոտ մեկ տարի: Աշխատանքից ազատվելուց հետո նա սկսել է ամերիկյան մամուլին տրամադրել ԱՄՆ-ի և Թուրքիայի հետախուզական ծառայությունների գաղտնի գործողությունների վերաբերյալ սենսացիոն տեղեկություններ:

Օրերս The American Conservative հանդեսին Սիբել Էդմոնդսը հայտնել է, թե FBI-ում ինքը զբաղվել է թուրքական հետախուզության հավանական գործակալների և ԱՄՆ-ում նրանց հետ կապված մարդկանց միջև խոսակցությունների թարգմանությամբ, և որ աշխատանքից իրեն ազատել են այն բանից հետո, երբ 2002 թ-ին պարզել են, որ իր հետ միևնույն բաժնում աշխատողներից մեկը թուրքական հետախուզության գործակալ է: Նրա խոսքերով, այդ անձը զբաղված է եղել նաև թմրանյութերի անօրինական շրջանառությամբ, կեղտոտ փողերի լվացմամբ և միջուկային նյութերի տարածմամբ: Հետաքրքրքական է, որ Էդմոնդսի, անգամ ԱՄՆ Կոնգրեսում առկա կաշառակերության մասին բացահայտած աղմկահարույց փաստերը, մինչ այժմ ոչ ոք չի հերքել կամ հետազոտել:

Էդմոնդսի խոսքերով, FBI-ի գրանցած խոսակցություններում, որտեղ խոսք էր գնում ԱՄՆ վարչախմբի` Միջին Ասիայի հետ կապված և կյանքի կոչած գաղտնի գործերի մասին, ներկա էին նաև Բեն Լադենի ընտանիքի անդամներ: Էդմոնդսն ասել է, որ FBI-ի գրանցած խոսակցություններում երբեք չի օգտագործվել «Ալ Ղաիդա» անունը, սակայն, բազմիցս հիշատակվել է «մուջահիդներ» և «բենլադեններ» խոսքերը: «Այդ խոսակցություններից պարզվել է, որ Բեն Լադեններից մի քանիսը մասնավոր ինքնաթիռներով այցեր են կատարել Ադրբեջան և Տաջիկստան: Ադրբեջանում Թուրքիայի այն ժամանակվա դեսպանը տեղյակ էր այդ այցերից: Բեն Լադենի ընտանիքը, պակիստանցի և սաուդարաբացի որոշ անձանց միջոցով, գտնվել է ԱՄՆ հսկողության տակ: Այդ գործերը ղեկավարում էր ԱՄՆ պետքարտուղարի տեղակալ Մարկ Գրոսմանը: Բենլադենյան զինյալներին արևելյան Թուրքեստանից փոխադրում էին Ղրղզստան, այնտեղից` Ադրբեջան, Ադրբեջանից էլ` Չեչնիա, կամ Բոսնիա: Թուրքիայում նրանց նստեցնում էին ՆԱՏՕ-ի ինքնաթիռները: Այդ երթուղով մի ուղղությամբ զենք և մարդիկ, մյուս ուղղությամբ փող և թմրանյութեր էին փոխադրելու», -ասել է Էդմոնդսը:

Ըստ Էդմոնդսի, հիշյալ ժամանակաընթացքում ՆԱՏՕ-ի ինքնաթիռներով Բելգիա մեծ քանակությամբ թմրանյութեր է փոխադրվել: Հետո թմրանյութի մի մասը տարվել է Բրիտանիա, այնտեղից էլ ռազմական ինքնաթիռներով հասցվել ԱՄՆ-ի Չիկագո քաղաք: «Երբեք չստուգվող թուրք դիվանագետները ԱՄՆ էին ժամանում ճամպրուկները լի թմրանյութերով», -ամերիկյան հանդեսի թղթակցի հետ զրույցում պնդել է Սիբել Էդմոնդսը: